40-сонли мактабда жорий ўқув йили якунига бағишланган "Сўнгги қўнғироқ" тадбири ўтказилди
25 май куни мамлакатимизнинг барча жойларида бўлгани каби Амударё туманидаги умумтаълим мактабларида ҳам сўнгги қўнғироқ жаранглаб, жорий ўқув йили ниҳоясига етиши муносабати билан “Хайр, мактабим!” номли тадбирлар ўтказилди.
Туман ХТБга қарашли 40-сонли мактабнинг 2021-2022 ўқув йили якунига бағишланган “Сўнгги қўнғироқ” тадбирида туман ҳокими Султонбой Йўлдошев иштирок этди.
Тадбирни мактаб директори Санобар Хўжамуратова очиб, барча ўқитувчи ва ўқувчиларни 2021-2022 ўқув йилини муваффақиятли якунлаганликлари билан самимий қутлади.
Айтиш керакки, бу йил Амударё туманидаги умумтаълим мактабларини 6 минг 68 нафар 9-ва 11-синф ўқувчилари тугатмоқда. Шундан 11-синф битирувчилари 2 минг 581 нафарни ташкил қилади. Улардан 15 нафари олий даражали шаҳодатнома эгалари бўлиб, мактабни олтин медаллар билан, 2 нафар битирувчи эса кумуш медаль билан тугатишмоқда.
Туман ҳокими Султонбой Йўлдошев барча битирувчиларни ҳаётидаги унутилмас кун – мактабни тамомлаб, етуклик шаҳодатномасини олиш, вояга етиб, мустақил ҳаёт сари қадам ташлаш арафасида тургани билан табриклади.
Президентимизнинг матаб битирувчиларига йўллаган табригида таъкидланганидек, сўнгги йилларда мактабгача таълим, олий ва ўрта махсус таълим тизими сифат жиҳатидан кескин ўзгарди. Айниқса, мактаб таълимини ривожлантириш умумхалқ ҳаракатига айланиб, бу борада туб ислоҳотлар амалга оширилмоқда. Ҳозирги вақтда юртимизда 10 мингдан зиёд давлат умумтаълим мактаблари билан бирга кўплаб нодавлат, давлат-хусусий шериклик шаклидаги мактаблар, Президент, ихтисослаштирилган ва ижод мактаблари фаолият юритаётгани ушбу тизимда қисқа муддатда чуқур таркибий ва сифат ўзгаришлари юз берганини кўрсатади.
Биргина ўтган йилда 3,3 триллион сўм маблағ ҳисобидан 789 та мактабда қурилиш ва таъмирлаш ишлари амалга оширилди. Халқаро фан олимпиадаларида ўқувчиларимиз қўлга киритган медаллар сони 3 баробар, минтақавий олимпиадаларда эса қарийб 2 баробар кўпайгани, “Бир миллион дастурчи” лойиҳаси доирасида 900 мингдан зиёд ўқувчи дастурлаш асосларини ўрганиб, сертификатга эга бўлгани барчамизни хурсанд қилади.
Тадбирда туман ҳокими битирувчи ёшларни табриклаб, келгусидаги ўқиш ва ишларида омадлар тилади ҳамда мактабни муваффақиятли тамомлаётган битирувчиларни, илғор ўқитувчиларни ва ибратли ота-оналарни, шунингдек турли танлов ва мусобақаларда фаол иштирок этиб, фахрли ўринларни эгаллаган ёшларни ва уларнинг устозларини тақдирлади.
Айтиш керакки, мактаб ўқувчилари бу йил ҳам катта ютуқларни қўлга киритдилар. Жумладан, 4 нафар 11-синф ўқувчилари – Коммуна Ражабова, Лобар Йўлдошева, Моҳимжон Жабборбергенова ва Гулинур Нураддиновалар инглиз тилидан В2 сертификатига эга бўлдилар. Улар эндиликда олий таълим муассасаларига кириш тест синовларида инглиз тили бўйича максимал баллга эга бўладилар ва чет тили фанидан тест синовидан озод этилади.
Тадбир давомида туман Маданият бўлими санъаткорлари томонидан куй-қўшиқлар ижро қилиниб, битирувчилар жонажон мактаби ва ўқитувчилари билан хайрлашдилар.
Барча битирувчиларнинг давлат имтиҳонларидан муваффақиятли ўтиб, олий таълим муассасалари талабаси бўлиш бахтига эришишларига тилакдошмиз!
Ўйлаймизки, ёшларимиз Президентимиз ишонч билдирганларидек, мамлакатимизда яратилган имкониятлар асосида етук мутахассислар бўлиб, келгусида юртимиздаги замонавий кластерлар, фермер хўжаликлари, ишлаб чиқариш корхоналари, катта-катта қурилишлар, фирма ва компаниялар, давлат ва нодавлат ташкилотлар, маданий ва ижодий жамоаларда иш бошлайди ҳамда Ватанимиз равнақи, халқимиз фаровонлигини оширишга муносиб ҳисса қўшади.
Туман ҳокимлигининг ахборот хизмати.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
