40-sonli maktabda joriy oʻquv yili yakuniga bagʻishlangan "Soʻnggi qoʻngʻiroq" tadbiri oʻtkazildi
25-may kuni mamlakatimizning barcha joylarida boʻlgani kabi Amudaryo tumanidagi umumtaʼlim maktablarida ham soʻnggi qoʻngʻiroq jaranglab, joriy oʻquv yili nihoyasiga yetishi munosabati bilan “Xayr, maktabim!” nomli tadbirlar oʻtkazildi.
Tuman XTBga qarashli 40-sonli maktabning 2021-2022 oʻquv yili yakuniga bagʻishlangan “Soʻnggi qoʻngʻiroq” tadbirida tuman hokimi Sultonboy Yoʻldoshev ishtirok etdi.
Tadbirni maktab direktori Sanobar Xoʻjamuratova ochib, barcha oʻqituvchi va oʻquvchilarni 2021-2022 oʻquv yilini muvaffaqiyatli yakunlaganliklari bilan samimiy qutladi.
Aytish kerakki, bu yil Amudaryo tumanidagi umumtaʼlim maktablarini 6 ming 68 nafar 9-va 11-sinf oʻquvchilari tugatmoqda. Shundan 11-sinf bitiruvchilari 2 ming 581 nafarni tashkil qiladi. Ulardan 15 nafari oliy darajali shahodatnoma egalari boʻlib, maktabni oltin medallar bilan, 2 nafar bitiruvchi esa kumush medal bilan tugatishmoqda.
Tuman hokimi Sultonboy Yoʻldoshev barcha bitiruvchilarni hayotidagi unutilmas kun – maktabni tamomlab, yetuklik shahodatnomasini olish, voyaga yetib, mustaqil hayot sari qadam tashlash arafasida turgani bilan tabrikladi.
Prezidentimizning matab bitiruvchilariga yoʻllagan tabrigida taʼkidlanganidek, soʻnggi yillarda maktabgacha taʼlim, oliy va oʻrta maxsus taʼlim tizimi sifat jihatidan keskin oʻzgardi. Ayniqsa, maktab taʼlimini rivojlantirish umumxalq harakatiga aylanib, bu borada tub islohotlar amalga oshirilmoqda. Hozirgi vaqtda yurtimizda 10 mingdan ziyod davlat umumtaʼlim maktablari bilan birga koʻplab nodavlat, davlat-xususiy sheriklik shaklidagi maktablar, Prezident, ixtisoslashtirilgan va ijod maktablari faoliyat yuritayotgani ushbu tizimda qisqa muddatda chuqur tarkibiy va sifat oʻzgarishlari yuz berganini koʻrsatadi.
Birgina oʻtgan yilda 3,3 trillion soʻm mablagʻ hisobidan 789 ta maktabda qurilish va taʼmirlash ishlari amalga oshirildi. Xalqaro fan olimpiadalarida oʻquvchilarimiz qoʻlga kiritgan medallar soni 3 barobar, mintaqaviy olimpiadalarda esa qariyb 2 barobar koʻpaygani, “Bir million dasturchi” loyihasi doirasida 900 mingdan ziyod oʻquvchi dasturlash asoslarini oʻrganib, sertifikatga ega boʻlgani barchamizni xursand qiladi.
Tadbirda tuman hokimi bitiruvchi yoshlarni tabriklab, kelgusidagi oʻqish va ishlarida omadlar tiladi hamda maktabni muvaffaqiyatli tamomlayotgan bitiruvchilarni, ilgʻor oʻqituvchilarni va ibratli ota-onalarni, shuningdek turli tanlov va musobaqalarda faol ishtirok etib, faxrli oʻrinlarni egallagan yoshlarni va ularning ustozlarini taqdirladi.
Aytish kerakki, maktab oʻquvchilari bu yil ham katta yutuqlarni qoʻlga kiritdilar. Jumladan, 4 nafar 11-sinf oʻquvchilari – Kommuna Rajabova, Lobar Yoʻldosheva, Mohimjon Jabborbergenova va Gulinur Nuraddinovalar ingliz tilidan V2 sertifikatiga ega boʻldilar. Ular endilikda oliy taʼlim muassasalariga kirish test sinovlarida ingliz tili boʻyicha maksimal ballga ega boʻladilar va chet tili fanidan test sinovidan ozod etiladi.
Tadbir davomida tuman Madaniyat boʻlimi sanʼatkorlari tomonidan kuy-qoʻshiqlar ijro qilinib, bitiruvchilar jonajon maktabi va oʻqituvchilari bilan xayrlashdilar.
Barcha bitiruvchilarning davlat imtihonlaridan muvaffaqiyatli oʻtib, oliy taʼlim muassasalari talabasi boʻlish baxtiga erishishlariga tilakdoshmiz!
Oʻylaymizki, yoshlarimiz Prezidentimiz ishonch bildirganlaridek, mamlakatimizda yaratilgan imkoniyatlar asosida yetuk mutaxassislar boʻlib, kelgusida yurtimizdagi zamonaviy klasterlar, fermer xoʻjaliklari, ishlab chiqarish korxonalari, katta-katta qurilishlar, firma va kompaniyalar, davlat va nodavlat tashkilotlar, madaniy va ijodiy jamoalarda ish boshlaydi hamda Vatanimiz ravnaqi, xalqimiz farovonligini oshirishga munosib hissa qoʻshadi.
Tuman hokimligining axborot xizmati.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
