Амударё туманида фуқаролар йиғинлари раиси сайлови ошкоралик ва муқобиллик принциплари асосида ўтказилмоқда

Маҳалла бу − ўзини ўзи бошқаришнинг ўзига хос ўзбекона, бошқа мамлакатларда ўхшаши топилмайдиган модели бўлиб ҳисобланади. Маҳалла мамлакатимизда амалга оширилаётган барча соҳалардаги ислоҳотларда катта аҳамиятга эга бўлганлиги боис ўзгаришларни бевосита маҳалла фуқаролар йиғинларисиз тасаввур қилиш қийин.

Маълумки, Ўзбекистон Республикаси Олий Мажлиси Сенати Кенгашининг тегишли қарорига мувофиқ шу ойда юртимизнинг барча ҳудудларида муҳим ижтимоий-сиёсий тадбир − фуқаролар йиғинлари раислари сайлови ўтказилмоқда. Бу муҳим сиёсий тадбирнинг намунали ўтказилишини таъминлаш мақсадида фуқаролар йиғинлари раислари сайловини ташкил этиш ва ўтказишга кўмаклашувчи туман комиссияси ва бевосита маҳалла фуқаролар йиғинларида фаолият олиб борувчи ишчи гуруҳлари ташкил этилган.

Бу йил туманимиздаги 49 та овул ва маҳалла фуқаролар йиғинларида ҳам йиғин раисини сайлаш жараёнлари ошкоралик, муқобиллик ва тенг сайлов принцплари асосида ўтказилмоқда. 16 май кунидан бошланган сайлов жараёнлари қизғинлик билан давом этмоқда. 27 май санасига қадар туманимизнинг 43 та овул ва маҳалла фуқаролар йиғинларида сайловлар ўтказилиб, вакиллар томонидан яширин овоз бериш йўли орқали номзодлардан энг муносиблари йиғин раиси қилиб сайланди.

Туманимизнинг барча ҳудудларида бўлгани сингари Қизилчоли маҳалла фуқаролар йиғинида ҳам сайлов жараёнлари ошкора ва шаффоф тарзда ўтказилди.

Маълумки, фуқаролар йиғини раиси лавозимига олий маълумотга эга, бевосита сайловга қадар камида беш йил тегишли ҳудудда доимий яшаётган, ташкилотчилик қобилиятига, давлат органларида ёки нодавлат нотижорат ташкилотларида ёхуд тадбиркорлик ва бошқа хўжалик фаолияти соҳасида иш тажрибасига, шунингдек ҳаётий тажрибага ва аҳоли ўртасида обрў-эътиборга эга бўлган шахслар номзод қилиб кўрсатилади.

Қизилчоли маҳалла фуқаролар йиғини раиси лавозимига номзод сифатида кўрсатилган Мансур Атажанов ҳамда Шавкат Ибраимовлар ҳам маҳалладошлари орасида алоҳида обрў ва эътиборга эга шахслар бўлиб, ўз маҳалласи учун кўплаб ҳайрли ишларни амалга оширганлар.

Сайлов куни номзодлар маҳаллани ҳар томонлама ривожлантириш ҳамда аҳолининг ёрдамга муҳтож қатламларини қўллаб-қувватлаш бўйича ўз дастурларини вакиллар эътиборига ҳавола қилишди.

Яширин овоз бериш натижаларига кўра Шавкат Ибраимов Қизилчоли маҳалла фуқаролар йиғии раиси лавозимига сайланди. Маълумот учун, Шавкат Ибраимов 1975 йилда туғилган. Маълумоти олий. У 2009 йилдан буён “Куюк кўпир Олтинкўзи” биолабораторияси мудири лавозимида ишлаб келаётган эди. Сайлов якунида Шавкат Ибраимов маҳалладошларига билдирган ишончи учун миннаддорлик билдириб, маҳалланинг ободлиги ва фаровонлиги учун фидокорона меҳнат қилишга сўз берди.

26 май куни Амударё туманининг Беруний номли маҳалла фуқаролар йиғинида ҳам фуқаролар йиғини раиси сайлови бўлиб ўтди.

Сайловга қадар ишчи гуруҳ ҳамда сайловни ташкил қилиш ва ўтказишга кўмаклашувчи туман комиссияси томонидан барча номзодлар ўрганиб чиқилиб, туман ҳокими томонидан Муратбай Хайбуллаев ҳамда Бобур Аллаберганов номзодларига келишим берилган эди.

Сайловда ҳар иккала номзод барчани ўз дастури билан таништирди.

Номзодлар ўз дастурларида маҳаллада фаолият олиб бораётган ҳоким ёрдамчиси, хотин-қизлар фаоли, ҳамда ёшлар етакчиси билан самарали тарзда ҳамкорлики йўлга қўйишларини, шунингдек, жамиятнинг асосий бўғини − оила институтини мустаҳкамлаш, аҳолининг яшаш шароитини яхшилаш бўйича ўз режаларини баён қилишди.

Шундан сўнг, Ўзбекистон Республикасининг “Фуқаролар йиғини раиси (оқсоқоли) сайлови тўғрисида”ги Қонунининг 20-моддасига кўра, фуқаролар йиғини раисини сайлаш жараёни яширин овоз бериш орқали амалга оширилди.

Саноқ комиссияси томонидан натижалар эълон қилинди ҳамда энг кўп овоз олган Муратбай Хайбуллаев Беруний маҳалла фуқаролар йиғини раиси лавозимига сайланди.

Шу ўринда айтиш керакки, фуқаролар йиғини раиси сайлови муҳим демократик жараён бўлиб, мазкур сайловда иштирок этиш ҳуқуқига эга бўлган фуқароларимиз унда фаол иштирок этиш орқали давлатимиз томонидан амалга оширилаётган ислоҳотларни бевосита маҳаллада давом эттирувчи шахсни танлаш ҳуқуқига эга бўладилар.

Туман ҳокимлигининг Ахборот хизмати.