Амударё туманида Вазирлар Кенгаши Раиси ўринбосарининг сайёр қабули бўлиб ўтди

Бугунги кунда мамлакатимизда фуқаролар билан ишлаш бўйича яхлит тизим яратилди. Муҳтарам Президентимиз бошчилигида инсонларнинг муаммоларини тинглаш, уларни жойида бартараф қилиш, аҳолига фаровон турмуш шароитларини яратиш борасида салмоқли ишлар амалга оширилмоқда.

Ҳудудларда аҳоли билан учрашиш, инсонлар билан яқиндан мулоқотда бўлиб, уларнинг муаммо ҳамда камчиликларини ўрганиш, ҳал қилиш мақсадида сайёр қабуллар ўтказилмоқда.

Давлатимиз раҳбарининг ташаббуси билан эълон қилинган “оммавий сайёр қабуллар уч ойлиги” доирасида  10 июнь куни Амударё туманида ҳам сайёр қабул бўлиб ўтди.

Унда Вазирлар Кенгаши Раиси ўринбосари Марям Аҳмедова, туман Халқ қабулхонаси бўлими мудири Эркин Ражабов, Амударё тумани ҳокими ўринбосари Гўзал Сабурова, туманда фаолият юритаётган идора ва ташкилот масъуллари ҳамда туманнинг турли ҳудудларида истиқомат қилувчи 30 дан ортиқ фаол фуқаролар иштирок этишди.

Қабул давомида фуқаролардан турли мазмундаги мурожаатлар келиб тушди.

Жумладан, Тош ёп овулида истиқомат қилувчи Азим Душанов овулда мобил алоқа сифати пастлиги бўйича, Кенгаш Қалиев ташқи ва ички йўлларни таъмирлаш масаласида, Асалой Тўлибоева субсидия асосида тикув машинаси олиш бўйича амалий ёрдам сўраб мурожаат қилдилар.

Мурожаатлар юзасидан масъуллар бириктирилиб, тез кунларда ҳал қилинишига келишиб олинди.

Яна бир фуқаро – Тош ёп овулида истиқомат қилувчи Насиба Норбоеванинг 2 нафар ўғли Олий таълим даргоҳида тўлов шартномаси асосида таҳсил олади. Оила бекасининг боқувчиси йўқлиги ҳамда оилавий шароити ҳисобга олиниб, янги ўқув йилида 1 нафар фарзандининг контракт пуллари тўлаб бериладиган бўлди.

Шунингдек, Тазабой Бегимов маҳалладошлари номидан мурожаат қилиб, Тош ёп овулига янгидан кўчиб келган ёш оилалар учун янги симёғочлар ўрнатиш зарурлигини айтиб амалий ёрдам сўради. Мурожаат эгасига ушбу муаммо тез кунда ҳал этилиши маълум қилинди.

Бундан ташқари, Илҳом Холимбетовнинг 2 нафар фарзандига боғдорчиликни ривожлантириш учун ер ажратиб берилиши борасида қилган мурожаатига жавобан ҳуқуқий тушунтиришлар берилди.

Сайёр қабулда ҳеч бир мурожаат эътиборсиз қолмади. Фуқароларни қийнаб келаётган масалалар баённомага киритилиб, бажарилиш муддатлари белгиланди.

Бугунги кунда юртимизнинг барча ҳудудларида “Халқ давлат идораларига эмас, балки давлат идоралари, халққа хизмат қилиши керак” тамойили асосида ўтказилаётган бу каби сайёр қабуллар аҳоли муаммоларини ҳал қилишда асосий омил бўлиб хизмат қилмоқда.

Мухтасар айтганда, бугун ҳеч бир мурожаат шунчаки қоғозларда қолиб кетмаяпти. Ўтказилаётган сайёр қабуллар муаммоларни аниқлаш, жойида ҳал қилиш, уларни бартараф этиш мақсадларига қаратилганлиги билан ҳам аҳамиятлидир.

 Туман ҳокимлигининг Ахборот хизмати.