“Ташаббусли бюджет” лойиҳасида ғолиб бўлган таклифлар ижроси таъминланмоқда

“Ташаббусли бюджет” лойиҳаси жойлардаги ижтимоий муаммоларни ечишда аҳолини бирлашишга, жамоавий қарорлар қабул қилишга ўргатмоқда. Қолаверса, бу жамоатчилик назоратининг кучайишига, маҳаллий депутатларнинг фаоллашувига ҳамда давлат бюджетидан ажратилаётган маблағларнинг мақсадли сарфланишига ҳам хизмат қилмоқда.

Амударё туманида ҳам фуқаролар “Ташаббусли бюджет” жараёнида фаол иштирок этишди. 1-босқичда фуқаролар томонидан киритилган жами 11 та таклиф ғолиб деб топилди. Бугунги кунда лойиҳа доирасида ғолиб бўлган таклифлар ижроси таъминланиб, қурилиш, таъмирлаш ишлари жадал суръатларда олиб борилмоқда.

Тўлқин овули аҳолиси овул ҳудуддаги 33-сонли мактабга фарзандларининг хавфсиз бориб-келишлари учун пиёдалар йўлакчасини қуриш таклифини билдиришиб, бир ёқадан бош чиқарган ҳолда “Ташаббусли бюджет” жараёнида фаол иштирок этишди ва ушбу лойиҳа ғолиб деб топилди.

Бугунги кунда пиёдалар йўлакчасини қуриш ишлари “Жайхун мастер строй” масъулияти чекланган жамияти томонидан 63 фоизга бажарилди. Қурилиш ишларига жами 300 млн. сўм миқдорида маблағ ажратилган бўлиб, қурувчилар пиёдалар йўлакчасини мустақиллигимизнинг 31 йиллиги арафасида қуриб битказишни режалаштирганлар.

Шунингдек, туманнинг Тор ёп маҳалласида истиқомат қилувчи аҳоли ҳам жараёнда фаол иштирок этишиб, маҳалла ҳудудидан ўтувчи 2,2 км узунликдаги Тор ёп – Қиличбой автомобиль йўлига асфальт қоплама ётқизиш таклифини билдиришди ва овоз бериш жараёнида фаол иштирок этишди. Мазкур лойиҳа ҳам ғолиб деб топилиб, бугунги кунга қадар Беруний туман йўллардан фойдаланиш унитар корхонаси томонидан таъмирлаш ишлари 60 фоизга бажарилди.

Ундан ташқари, маҳалла ҳудудидаги Деҳқонбирлик кўчасининг 1 км қисмини аввал тупроқ билан кўтариш ва кейин тош ётқизиш таклифи ҳам кўп овоз тўплагани сабабли туман маҳаллий бюджетидан молиялаштирилди. 200 млн. сўм маблағ эвазига “Тўлибой-Йўлдош-Шерман” масъулияти чекланган жамияти томонидан бу ишлар сифатли тарзда якунига етказилди.

Шу ўринда айтиш керакки, “Ташаббусли бюджет” лойиҳаси аҳолининг ижтимоий муаммоларини ечишнинг ягона йўли бўлмаса ҳам, одамларни узоқ йиллардан бери қийнаб келаётган ижтимоий муаммоларни ҳал этишда муҳим восита бўлмоқда.

Бюджет очиқлигини таъминлаш борасидаги ислоҳотларнинг амалиётга жорий этилиши биринчидан, давлат бюджетининг самарали ишлатилишини таъминласа, иккинчидан жамоат назоратининг кучайишига хизмат қилади. Учинчидан эса фуқаролар ёрдамида узоқ йиллардан бери ҳал бўлмаётган ижтимоий муаммоларни аниқлаш ва ечилишини таъминлаш имконият яратилади.

Бюджет очиқлигини таъминлашнинг яна бир муҳим жиҳати шундаки, жамоатчилик ўзи билдирган ва овоз берган таклифнинг молиялаштирилиши ва ишларнинг сифатли бажарилишини назорат қилади. Бу эса пудратчи ташкилотлар томонидан бюджет маблағларининг талон-тарож қилинишига жиддий тўсиқ бўлади.

Шунинг учун аҳолининг турмуш фаровонлигини таъминлаш, ижтимоий муаммоларини ҳал этиш, уларга муносиб яшаш шароитларини яратиш мақсадида бюджетдан ажратиладиган маблағларни тақсимлаш жараёнида фуқароларимиз иштирокини кенгроқ таъминланиш муҳим аҳамият касб этмоқда.

Туман ҳокимлигининг Ахборот хизмати.