“Tashabbusli byudjet” loyihasida gʻolib boʻlgan takliflar ijrosi taʼminlanmoqda

“Tashabbusli byudjet” loyihasi joylardagi ijtimoiy muammolarni yechishda aholini birlashishga, jamoaviy qarorlar qabul qilishga oʻrgatmoqda. Qolaversa, bu jamoatchilik nazoratining kuchayishiga, mahalliy deputatlarning faollashuviga hamda davlat byudjetidan ajratilayotgan mablagʻlarning maqsadli sarflanishiga ham xizmat qilmoqda.

Amudaryo tumanida ham fuqarolar “Tashabbusli byudjet” jarayonida faol ishtirok etishdi. 1-bosqichda fuqarolar tomonidan kiritilgan jami 11 ta taklif gʻolib deb topildi. Bugungi kunda loyiha doirasida gʻolib boʻlgan takliflar ijrosi taʼminlanib, qurilish, taʼmirlash ishlari jadal surʼatlarda olib borilmoqda.

Toʻlqin ovuli aholisi ovul hududdagi 33-sonli maktabga farzandlarining xavfsiz borib-kelishlari uchun piyodalar yoʻlakchasini qurish taklifini bildirishib, bir yoqadan bosh chiqargan holda “Tashabbusli byudjet” jarayonida faol ishtirok etishdi va ushbu loyiha gʻolib deb topildi.

Bugungi kunda piyodalar yoʻlakchasini qurish ishlari “Jayxun master stroy” masʼuliyati cheklangan jamiyati tomonidan 63 foizga bajarildi. Qurilish ishlariga jami 300 mln. soʻm miqdorida mablagʻ ajratilgan boʻlib, quruvchilar piyodalar yoʻlakchasini mustaqilligimizning 31-yilligi arafasida qurib bitkazishni rejalashtirganlar.

Shuningdek, tumanning Tor yop mahallasida istiqomat qiluvchi aholi ham jarayonda faol ishtirok etishib, mahalla hududidan oʻtuvchi 2,2 km uzunlikdagi Tor yop – Qilichboy avtomobil yoʻliga asfalt qoplama yotqizish taklifini bildirishdi va ovoz berish jarayonida faol ishtirok etishdi. Mazkur loyiha ham gʻolib deb topilib, bugungi kunga qadar Beruniy tuman yoʻllardan foydalanish unitar korxonasi tomonidan taʼmirlash ishlari 60 foizga bajarildi.

Undan tashqari, mahalla hududidagi Dehqonbirlik koʻchasining 1 km qismini avval tuproq bilan koʻtarish va keyin tosh yotqizish taklifi ham koʻp ovoz toʻplagani sababli tuman mahalliy byudjetidan moliyalashtirildi. 200 mln. soʻm mablagʻ evaziga “Toʻliboy-Yoʻldosh-Sherman” masʼuliyati cheklangan jamiyati tomonidan bu ishlar sifatli tarzda yakuniga yetkazildi.

Shu oʻrinda aytish kerakki, “Tashabbusli byudjet” loyihasi aholining ijtimoiy muammolarini yechishning yagona yoʻli boʻlmasa ham, odamlarni uzoq yillardan beri qiynab kelayotgan ijtimoiy muammolarni hal etishda muhim vosita boʻlmoqda.

Byudjet ochiqligini taʼminlash borasidagi islohotlarning amaliyotga joriy etilishi birinchidan, davlat byudjetining samarali ishlatilishini taʼminlasa, ikkinchidan jamoat nazoratining kuchayishiga xizmat qiladi. Uchinchidan esa fuqarolar yordamida uzoq yillardan beri hal boʻlmayotgan ijtimoiy muammolarni aniqlash va yechilishini taʼminlash imkoniyat yaratiladi.

Byudjet ochiqligini taʼminlashning yana bir muhim jihati shundaki, jamoatchilik oʻzi bildirgan va ovoz bergan taklifning moliyalashtirilishi va ishlarning sifatli bajarilishini nazorat qiladi. Bu esa pudratchi tashkilotlar tomonidan byudjet mablagʻlarining talon-taroj qilinishiga jiddiy toʻsiq boʻladi.

Shuning uchun aholining turmush farovonligini taʼminlash, ijtimoiy muammolarini hal etish, ularga munosib yashash sharoitlarini yaratish maqsadida byudjetdan ajratiladigan mablagʻlarni taqsimlash jarayonida fuqarolarimiz ishtirokini kengroq taʼminlanish muhim ahamiyat kasb etmoqda.

Tuman hokimligining Axborot xizmati.