"БЕШ ТАШАББУС ОЛИМПИАДАСИ" МУСОБАҚАЛАРИДА ҚАТНАШГАН АМУДАРЁЛИК СПОРТЧИЛАРГА СОВҒАЛАР ТОПШИРИЛДИ

"Беш ташаббус олимпиадаси"нинг Қорақалпоғистон Республикаси босқичида фаол иштирок этган амударёлик спортчиларни тақдирлаш маросими ўтказилди.

5 август куни туман ҳокимлигида бўлиб ўтган мазкур тадбирда Қорақалпоғистон Республикаси Спортни ривожлантириш вазирлиги бўлим бошлиғи Икром Қудияров, Амударё тумани ҳокими ўринбосари Маҳмуд Шерметов, Спортни ривожлантириш бўлими бошлиғи Ғуломжон Қурбонбоев ҳамда "Беш ташаббус олимпиадаси"нинг Қорақалпоғистон Республикаси босқичида фаол иштирок этган амударёлик спортчилар қатнашишди.

Тадбирда дастлаб, “Беш ташаббус олимпиадаси” мусобақаларида амударёлик ёш спортчиларнинг фаол иштирок этгани, юртимизнинг спорт шарафини ҳимоя қилишга астойдил ҳаракат қилишгани, ёшлар ўзларининг абжирлиги, чаққонлиги ва маҳоратини кўрсатишга интилишгани хусусида сўз юритилди.

Шундай спортсевар ёшлар эртага жаҳон ареналарида Ўзбекистон байроғини юқори кўтариши, Ватанимиз номини дунёга танитишига ишонч билдирилди ва ёш спортчилар бундан ҳам катта ютуқлар сари ҳаракат қилишга руҳлантирилди.

Таъкидланганидек, “Беш ташаббус олимпиадаси”нинг Қорақалпоғистон Республикаси босқичида ёш спортчиларимиздан 41 нафари мусобақа ва кўрик-танловнинг кейинги, яъни Республика босқичига йўлланмани қўлга киритишди. Ушбу ёшларимизнинг 16 нафари Республика босқичида ғолибликни қўлга киритиб, эсдалик совғалари ва маҳалласига спорт иншооти қуриш учун сертификатга эга бўлишди.

Туманимиздан футбол бўйича 16-30 ёш тоифасида Ўзбекистон Республикаси Давлат Хавфсизлик хизмати кубогига жами 1 176 нафар ёшлар жалб этилди. Ушбу мусобақанинг Қорақалпоғистон Республикаси босқичида туман ғолиби бўлган Холимбег овули жамоаси иштирок этди. Андижон вилоятида ўтказилган "Беш ташаббус олимпиадаси"да шашка мусобақаларида туманимизнинг Хитой овулида яшовчи Санобар Шарифбоева 27-30 ёш тоифасида аёл-қизлар ўртасида Республика босқичининг мутлоқ чемпионлигига эришди.

Шунингдек, мазкур мусобақанинг 16-21 ёш тоифасидаги аёл-қизлар ўртасида Бобур номли овулида истиқомат қилувчи Умида Ибрагимова фахрли 2-ўринни эгаллади ҳамда ўз маҳалласи ҳудудига спорт майдончаси қуриб берилиши учун махсус сертификатларга эга бўлишди.

Спортнинг стол тенниси туридан Нукус шаҳрида ўтказилган Республика босқичи, "Б" лигаси бўйича ўғил болалар ўртасида 27-30 ёш тоифасида туманимизнинг Бой овул маҳалласида истиқомат қилувчи Маъмур Шарипов фахрли 1-ўринни қўлга киритди ҳамда у ҳам ўз маҳалласи ҳудудига спорт майдончаси қуриб берилиши учун махсус сертификатни қўлга киритди.

Бундан ташқари, Сурхондарё вилоятида стритбол спорт турининг "Б" ва "C" лигаси бўйича Ўзбекистон Республикаси босқичида муносиб иштирок этган туманимизнинг Тўлқин овулининг ўғил болалар жамоаси 22-26 ёш тоифасида иштирок этиб, фахрли 2-ўринни қўлга киритдилар.

Тошкент вилоятида енгил атлетика бўйича "Б" ва "C" лигада Ўзбекистон Республикаси босқичида муносиб иштирок этган туманимизнинг Амир Темур номли овулининг ўғил болалар жамоаси эса 16-21 ёш тоифасида фахрли 2-ўринни, Навоий маҳалласининг аёл-қизлар жамоаси 22-26 ёш тоифасида қатнашиб, мутлоқ чемпионликни қўлга киритди. Бу жамоалар ҳам ўз маҳаллалари ҳудудига спорт майдончаси қуриб берилиши учун махсус сертификатга эга бўлишди.

Ушбу ютуқлар ҳақида фахру ифтихор билан сўз юритган республика спорт соҳаси масъуллари "Беш ташаббус олимпиадаси"нинг юқори босқичларида муваффақиятли иштирок этган 48 нафар амударёлик ёш спортчиларга эсдалик совғаларини топширишди. Совғаларга эга бўлган ёш спортчилар ўзларига кўрсатилган эътибордан мамнунлигини айтиб, миннатдорчилик билдиришди.

О.Худойберганова.