"BESh TAShABBUS OLIMPIADASI" MUSOBAQALARIDA QATNAShGAN AMUDARYoLIK SPORTChILARGA SOVGʻALAR TOPShIRILDI

"Besh tashabbus olimpiadasi"ning Qoraqalpogʻiston Respublikasi bosqichida faol ishtirok etgan amudaryolik sportchilarni taqdirlash marosimi oʻtkazildi.

5-avgust kuni tuman hokimligida boʻlib oʻtgan mazkur tadbirda Qoraqalpogʻiston Respublikasi Sportni rivojlantirish vazirligi boʻlim boshligʻi Ikrom Qudiyarov, Amudaryo tumani hokimi oʻrinbosari Mahmud Shermetov, Sportni rivojlantirish boʻlimi boshligʻi Gʻulomjon Qurbonboyev hamda "Besh tashabbus olimpiadasi"ning Qoraqalpogʻiston Respublikasi bosqichida faol ishtirok etgan amudaryolik sportchilar qatnashishdi.

Tadbirda dastlab, “Besh tashabbus olimpiadasi” musobaqalarida amudaryolik yosh sportchilarning faol ishtirok etgani, yurtimizning sport sharafini himoya qilishga astoydil harakat qilishgani, yoshlar oʻzlarining abjirligi, chaqqonligi va mahoratini koʻrsatishga intilishgani xususida soʻz yuritildi.

Shunday sportsevar yoshlar ertaga jahon arenalarida Oʻzbekiston bayrogʻini yuqori koʻtarishi, Vatanimiz nomini dunyoga tanitishiga ishonch bildirildi va yosh sportchilar bundan ham katta yutuqlar sari harakat qilishga ruhlantirildi.

Taʼkidlanganidek, “Besh tashabbus olimpiadasi”ning Qoraqalpogʻiston Respublikasi bosqichida yosh sportchilarimizdan 41 nafari musobaqa va koʻrik-tanlovning keyingi, yaʼni Respublika bosqichiga yoʻllanmani qoʻlga kiritishdi. Ushbu yoshlarimizning 16 nafari Respublika bosqichida gʻoliblikni qoʻlga kiritib, esdalik sovgʻalari va mahallasiga sport inshooti qurish uchun sertifikatga ega boʻlishdi.

Tumanimizdan futbol boʻyicha 16-30 yosh toifasida Oʻzbekiston Respublikasi Davlat Xavfsizlik xizmati kubogiga jami 1 176 nafar yoshlar jalb etildi. Ushbu musobaqaning Qoraqalpogʻiston Respublikasi bosqichida tuman gʻolibi boʻlgan Xolimbeg ovuli jamoasi ishtirok etdi. Andijon viloyatida oʻtkazilgan "Besh tashabbus olimpiadasi"da shashka musobaqalarida tumanimizning Xitoy ovulida yashovchi Sanobar Sharifboyeva 27-30 yosh toifasida ayol-qizlar oʻrtasida Respublika bosqichining mutloq chempionligiga erishdi.

Shuningdek, mazkur musobaqaning 16-21 yosh toifasidagi ayol-qizlar oʻrtasida Bobur nomli ovulida istiqomat qiluvchi Umida Ibragimova faxrli 2-oʻrinni egalladi hamda oʻz mahallasi hududiga sport maydonchasi qurib berilishi uchun maxsus sertifikatlarga ega boʻlishdi.

Sportning stol tennisi turidan Nukus shahrida oʻtkazilgan Respublika bosqichi, "B" ligasi boʻyicha oʻgʻil bolalar oʻrtasida 27-30 yosh toifasida tumanimizning Boy ovul mahallasida istiqomat qiluvchi Maʼmur Sharipov faxrli 1-oʻrinni qoʻlga kiritdi hamda u ham oʻz mahallasi hududiga sport maydonchasi qurib berilishi uchun maxsus sertifikatni qoʻlga kiritdi.

Bundan tashqari, Surxondaryo viloyatida stritbol sport turining "B" va "C" ligasi boʻyicha Oʻzbekiston Respublikasi bosqichida munosib ishtirok etgan tumanimizning Toʻlqin ovulining oʻgʻil bolalar jamoasi 22-26 yosh toifasida ishtirok etib, faxrli 2-oʻrinni qoʻlga kiritdilar.

Toshkent viloyatida yengil atletika boʻyicha "B" va "C" ligada Oʻzbekiston Respublikasi bosqichida munosib ishtirok etgan tumanimizning Amir Temur nomli ovulining oʻgʻil bolalar jamoasi esa 16-21 yosh toifasida faxrli 2-oʻrinni, Navoiy mahallasining ayol-qizlar jamoasi 22-26 yosh toifasida qatnashib, mutloq chempionlikni qoʻlga kiritdi. Bu jamoalar ham oʻz mahallalari hududiga sport maydonchasi qurib berilishi uchun maxsus sertifikatga ega boʻlishdi.

Ushbu yutuqlar haqida faxru iftixor bilan soʻz yuritgan respublika sport sohasi masʼullari "Besh tashabbus olimpiadasi"ning yuqori bosqichlarida muvaffaqiyatli ishtirok etgan 48 nafar amudaryolik yosh sportchilarga esdalik sovgʻalarini topshirishdi. Sovgʻalarga ega boʻlgan yosh sportchilar oʻzlariga koʻrsatilgan eʼtibordan mamnunligini aytib, minnatdorchilik bildirishdi.

O.Xudoyberganova.