Ражапбай Йўлдашев ҳаёти ва фаолиятига бағишланган “Эл фарзанди” номли ҳужжатли фильм тақдимоти бўлиб ўтди

2022 йил 16 август куни Амударё тумани Маданият бўлими биносида Ўзбекистон кинематография агентлиги буюртмаси асосида “Dilshoh media” киностудияси томонидан суратга олинган Амударё туманининг собиқ ҳокими, давлат ва жамоат арбоби, халқимизнинг суюкли фарзанди марҳум Ражапбай Йўлдашев ҳақидаги “Эл фарзанди” номли ҳужжатли фильм тақдимоти бўлиб ўтди.

“Янги Ўзбекистон – маърифатли жамият” шиори остида ўтказилаётган “Маънавият фестивали” доирасида ташкил қилинган ушбу тадбир аввалида Ражапбай Йўлдашевнинг ҳаёти ва меҳнат фаолиятига доир фотосуратлар кўргазмаси намойиш этилди.

Тақдимотда Ўзбекистон кинематография агентлиги, “Dilshoh media” киностудияси ходимлари, Тошкент шаҳридан ташриф буюрган кино ҳамда театр актёр ва актрисалари, санъат усталари, фильм қаҳрамонининг оила аъзолари, дўстлари, туман зиёлилари, кенг жамоатчилик вакиллари ҳамда оммавий ахборот воситалари вакиллари иштирок этди.

Фильмда Ражапбой Йўлдашевнинг дўстлари ва яқинлари, ҳамкасблари, Қорақалпоғистон Республикаси миқёсида биргаликда меҳнат фаолиятини олиб борган давлат ва жамоат арбоблари фильм қаҳрамонининг шахсий ҳаёти, иш фаолияти, инсонийлик жиҳатлари ҳақида фикрларини баён қилишган.

Шунингдек, фильмда Ражаббой Йўлдошев меҳнат фаолиятидаги энг машаққатли ва масъулиятли паллалар киноижодкорлар томонидан моҳирона саҳналаштирилган.

Тақдимот маросимида дастлаб фильм ижодкорлари, амударёлик зиёлилар, фильм қаҳрамонининг оила аъзолари сўзга чиқиб, Ражапбай Йўлдашевнинг эл-юрт ободлиги ва халқ фаровонлиги йўлида қилган хизматларини ёдга олишди.

Фильм қаҳрамони Ражапбой Йўлдашев 1998 йилда Амударё тумани ҳокими лавозимига тайинлангандан сўнг туман ҳаётида катта ижобий ўзгаришлар қилди. У раҳбарлик қилган йилларда аҳолининг бандлик даражаси ошди. 1998-2016 йилларда 58 мингдан ортиқ янги иш ўринлари яратилди. Унинг ташаббуси билан 2005 йилда Амударё дарёси остидан 700 метр узунликдаги табиий газ тармоғи тортилиб, туман кафолатли равишда табиий газ билан таъминланди.

Ражапбой Йўлдашев қишлоқ хўжалигида иқтисодий ислоҳотларни чуқурлаштириш, ширкат хўжаликларини фермер хўжаликларига айлантириш, ҳақиқий мулк эгалигини қарор топтириш борасида кенг қамровли тадбирларни амалга оширди.

1998 йилгача туманда бирорта ҳам маҳсулот хорижга экспорт қилинмаган бўлса, 2016 йилга келиб 10 дан ортиқ экспортёр корхоналар томонидан 15 турдаги маҳсулотлар экспорти йўлга қўйилди.

Шундан кейин кино ва театр актёрлари ҳамда актрисалар сўзга чиқиб, “Янги Ўзбекистон – маърифатли жамият” шиори остида “Маънавият фестивали”ни ўтказишдан кўзланган мақсад, янги Ўзбекистонда инсон қадрини улуғлаш йўлида амалга оширилаётган ишлар хусусида тўхталиб ўтдилар. Санъаткорлар таъкидлаганларидек, Ватан ва халқ манфаати йўлида хизмат қилган инсонларнинг хотираси абадийдир.

Элимизнинг ана шундай фидойи фарзандларидан бири Ражапбой Йўлдашевнинг буюк хизматлари ҳам эътироф этилиб, 1999 йилда “Шуҳрат” медали, 2003 йилда Қорақалпоғистон Республикасида хизмат кўрсатган иқтисодчи фахрий унвони, 2014 йилда “Меҳнат шуҳрати” ордени билан мукофотланган.

Ражапбой Йўлдашевнинг хотирасига ҳурмат бажо келтириш мақсадида унинг ҳаёт йўли ва фаолияти ҳақида ҳужжатли фильм ишлаш лойиҳаси ўтган йилларда Ўзбекистон кинематография агентлигининг иш режасига киритилди ва молиялаштирилди.

Мазкур фильм тақдимотида Ражапбой Йўлдашевнинг фарзанди, туманимиз ҳокими Султонбой Йўлдошев ҳам сўзга чиқиб, давлатимиз раҳбари ва ҳукуматимизга, фильм ижодкорларига миннатдорчилик билдирди.

Чиндан ҳам, Ражапбой Йўлдашев ишнинг кўзини биладиган ташкилотчи раҳбар, халқ ташвишини ўз дарди деб биладиган ҳақиқий элпарвар йўлбошчи эди.

У Амударё тумани ҳокими лавозимида фаолият юритган йилларда туман фермер хўжаликлари ва қишлоқ хўжалиги корхоналари балансига лизинг ва кредит асосида мингдан ортиқ турли русумдаги техникалар харид қилиниб, ердан юқори ҳосил олишга замин яратилди. Натижада туман 2008 йилдан бери деярли ҳар йили давлатга пахта, ғалла сотиш бўйича шартномавий режаларини Ўзбекистон Республикасида биринчилар қатори бажариб келмоқда.

Ражапбай Йўлдашев ўзининг ташкилотчилиги, раҳбарлик маҳорати, қатъияти ва талабчанлиги, одамлар билан муомаласи, теран ақл-идроки билан туманда барча соҳаларда юксак натижалар қўлга киритилишида бош-қош бўлди. Натижада туман ижтимоий-иқтисодий, маънавий-маърифий ва бошқа соҳаларда нафақат Қорақалпоғистон Республикаси, балки мамлакатимизнинг бошқа туманлари орасида ҳам ўз ўрнига эга бўлди.

Ражапбай Йўлдашев халққа, эл-юртга хизмат қилишни ўзининг фарзандлик бурчи, ўзи учун энг олий саодат деб билди ва умрининг охирига қадар Ватан, эл-юрт манфаати йўлида фидойи меҳнат қилди.

Режиссёр Дилмурод Масаидов, продюсер Маҳмуд Эркабоев, оператор Жаҳонгир Ибрагимов, монтаж устаси Тимур Пиёзов, рассом Хусайнбой Эшниёзов, директор Азизбек Озодбоевлар иштирокидаги ижодий ва техник жамоа фильмда Ражаббой Йўлдошевнинг ҳаёт йўли ва меҳнат фаолиятини, Ватан, эл-юрт олдидаги самарали хизматларини ёрқин эпизодлар орқали очиб беришга ҳаракат қилишган.

Фильм тақдимотида қатнашган ҳар бир иштирокчи Ражаббой Йўлдошевнинг порлоқ хотирасини яна бир бора кўз олдида жонлантириб, улуғвор ишларини ёдга олдилар.

Туман ҳокимлигининг ахборот хизмати.

"Тараққиёт кўзгуси" газетаси таҳририяти.