ЮРТ ФАРОВОНЛИГИ ЙЎЛИДА МЕҲНАТ ҚИЛАЁТГАН ҚУРУВЧИЛАР

Юртимизнинг барча ҳудудларида бўлгани каби Амударё туманида ҳам турли замонавий бинолар қад ростлаб, кундан-кунга чирой очмоқда. Тобора кўркам қиёфа касб этаётган диёримизда янгича кўринишдаги ижтимоий соҳа объектлари, мактаб ва боғчалар, аҳоли турар жойлари, кўп қаватли бинолар сони кўпаймоқда. Меҳнаткаш ва қўли гул қурувчилар томонидан бунёд этилаётган ушбу иншоотлар шаҳар ва қишлоқларимизга файз киритибгина қолмасдан, аҳолининг яшаш шароитлари яхшиланишига ҳам хизмат қилмоқда.

Қурилиш ва бунёдкорлик ишларида ўзларининг ана шундай муносиб ҳиссасини қўшиб келаётган соҳа ходимларининг меҳнатини қадрлаш, уларга ҳурмат кўрсатиш мақсадида Президентимизнинг 2017 йил 7 августдаги Фармонига асосан ҳар йили август ойининг иккинчи якшанбаси Ўзбекистон Республикаси қурилиш соҳаси ходимлари куни сифатида нишонланиб келинаётир. Сана муносабати билан тадбирлар ташкил этилиб, соҳа фидойиларига турли совғалар, мукофотлар топширилиб рағбатлантирилмоқда. Бу эса ўз навбатида уларнинг ўз касбига бўлган меҳр ва масъулият ҳиссини янада оширмоқда.

Амударё туманининг обод ва фаровон бўлишига ҳисса қўшиб келаётган соҳа фидойилари томонидан мазкур йилда ҳам режага кўра кенг кўламли бунёдкорлик ишлари олиб борилаётир.

Шу ўринда айтиш жоизки, туман ҳудудидаги чекка овуллардаги аҳоли фарзандларига замонавий шароитларда таълим олишларига имконият яратиш мақсадида барча талабларга жавоб бера оладиган кўркам бинолар қурилиб, фойдаланишга топширилмоқда. Йилдан-йилга бундай шароитларга эга мактаблар ва мактабгача таълим ташкилотлари сони ортаётгани жуда қувонарли.

Жорий йилда ҳам Қипчоқ овули ҳудудидаги 18-сонли мактаб биносида Республика бюджетидан ажратилган 1 миллиард 965 млн. сўм маблағ эвазига реконструкция қилиш ва 180 ўринли қўшимча бино қуриш ишлари амалга оширилмоқда.

Худди шундай қурилиш ишлари республика бюджетидан ажратилган 2 миллиард 360 млн. сўм миқдоридаги маблағга Куюк кўпир овули ҳудудидаги 14-сонли мактаб биносида ҳам олиб борилмоқда.

Ундан ташқари, Ойбек номли маҳалла ҳудудидаги 55-сонли мактаб биносида 4 миллиард 327 млн. сўмлик реконструкция ва 330 ўринли қўшимча бино қуриш,  Чордара маҳалласи ҳудудидаги 36-сонли мактаб биносида 2 миллиард 292 млн. сўмлик реконструкция қилиш ва 180 ўринли қўшимча бино қуриш,  Бойовул маҳалласи ҳудудидаги 56-сонли мактаб биносида 2 миллиард 326 млн. сўмлик реконструкция қилиш ва қўшимча бино қуриш ишлари бажарилмоқда.

Шу кунларда қурувчиларнинг ғайрат-шижоати билан Юқори қишлоқ маҳалласи ҳудудидаги 28-сонли мактабгача таълим ташкилоти филиали биноси 3 миллиард 724 млн. сўм маблағ эвазига реконструкция қилиниб, кичкинтойларга қулай шарт-шароитлар яратилмоқда. Қурилиш ишларини шу йилнинг октябрь ойига якунлаш мўлжалланмоқда.

Худди шундай қурилиш-таъмирлаш ишлари Тўлқин овули ҳудудидаги 39-сонли мактабгача таълим ташкилоти биносида ҳам амалга оширилмоқда. Ушбу бинода бажарилаётган республика бюджетидан ажратилган 3 миллиард 609 млн. сўмлик реконструкция ва 180 ўринли қўшимча бино қуриш ишлари шу йил октябрь ойида тугалланади.

Ундан ташқари, туман аҳолисига тиббий хизмат кўрсатиш сифатини янада яхшилаш мақсадида Навоий номли маҳалла ҳудудида республика бюджетидан ажратилган 14 миллиард 325 млн. сўмга янгидан 90 ўринли туғруқхона қуриш ишлари бошлаб юборилган.

Шунингдек, туманнинг 11 та ҳудудида 1 миллиард 400 млн. сўм маблағ эвазига тиббий контейнер пунктлари ташкил қилиниб, аҳолига тиббий хизмат кўрсатиш ишлари амалга оширилмоқда.

Қурувчи-бунёдкорларнинг меҳнати туфайли атроф янада обод бўлиб, Ватанимиз файзли гўшага айланмоқда. Юртимиз равнақи, аҳоли фаровонлиги йўлида меҳнат қилаётган соҳа фидойиларининг ишларида омад ёр бўлишини тилаб қоламиз.

Озода ХУДОЙБЕРГАНОВА.