YuRT FAROVONLIGI YOʻLIDA MEHNAT QILAYoTGAN QURUVChILAR

Yurtimizning barcha hududlarida boʻlgani kabi Amudaryo tumanida ham turli zamonaviy binolar qad rostlab, kundan-kunga chiroy ochmoqda. Tobora koʻrkam qiyofa kasb etayotgan diyorimizda yangicha koʻrinishdagi ijtimoiy soha obʼektlari, maktab va bogʻchalar, aholi turar joylari, koʻp qavatli binolar soni koʻpaymoqda. Mehnatkash va qoʻli gul quruvchilar tomonidan bunyod etilayotgan ushbu inshootlar shahar va qishloqlarimizga fayz kiritibgina qolmasdan, aholining yashash sharoitlari yaxshilanishiga ham xizmat qilmoqda.

Qurilish va bunyodkorlik ishlarida oʻzlarining ana shunday munosib hissasini qoʻshib kelayotgan soha xodimlarining mehnatini qadrlash, ularga hurmat koʻrsatish maqsadida Prezidentimizning 2017-yil 7-avgustdagi Farmoniga asosan har yili avgust oyining ikkinchi yakshanbasi Oʻzbekiston Respublikasi qurilish sohasi xodimlari kuni sifatida nishonlanib kelinayotir. Sana munosabati bilan tadbirlar tashkil etilib, soha fidoyilariga turli sovgʻalar, mukofotlar topshirilib ragʻbatlantirilmoqda. Bu esa oʻz navbatida ularning oʻz kasbiga boʻlgan mehr va masʼuliyat hissini yanada oshirmoqda.

Amudaryo tumanining obod va farovon boʻlishiga hissa qoʻshib kelayotgan soha fidoyilari tomonidan mazkur yilda ham rejaga koʻra keng koʻlamli bunyodkorlik ishlari olib borilayotir.

Shu oʻrinda aytish joizki, tuman hududidagi chekka ovullardagi aholi farzandlariga zamonaviy sharoitlarda taʼlim olishlariga imkoniyat yaratish maqsadida barcha talablarga javob bera oladigan koʻrkam binolar qurilib, foydalanishga topshirilmoqda. Yildan-yilga bunday sharoitlarga ega maktablar va maktabgacha taʼlim tashkilotlari soni ortayotgani juda quvonarli.

Joriy yilda ham Qipchoq ovuli hududidagi 18-sonli maktab binosida Respublika byudjetidan ajratilgan 1 milliard 965 mln. soʻm mablagʻ evaziga rekonstruktsiya qilish va 180-oʻrinli qoʻshimcha bino qurish ishlari amalga oshirilmoqda.

Xuddi shunday qurilish ishlari respublika byudjetidan ajratilgan 2 milliard 360 mln. soʻm miqdoridagi mablagʻga Kuyuk koʻpir ovuli hududidagi 14-sonli maktab binosida ham olib borilmoqda.

Undan tashqari, Oybek nomli mahalla hududidagi 55-sonli maktab binosida 4 milliard 327 mln. soʻmlik rekonstruktsiya va 330-oʻrinli qoʻshimcha bino qurish,  Chordara mahallasi hududidagi 36-sonli maktab binosida 2 milliard 292 mln. soʻmlik rekonstruktsiya qilish va 180-oʻrinli qoʻshimcha bino qurish,  Boyovul mahallasi hududidagi 56-sonli maktab binosida 2 milliard 326 mln. soʻmlik rekonstruktsiya qilish va qoʻshimcha bino qurish ishlari bajarilmoqda.

Shu kunlarda quruvchilarning gʻayrat-shijoati bilan Yuqori qishloq mahallasi hududidagi 28-sonli maktabgacha taʼlim tashkiloti filiali binosi 3 milliard 724 mln. soʻm mablagʻ evaziga rekonstruktsiya qilinib, kichkintoylarga qulay shart-sharoitlar yaratilmoqda. Qurilish ishlarini shu yilning oktyabr oyiga yakunlash moʻljallanmoqda.

Xuddi shunday qurilish-taʼmirlash ishlari Toʻlqin ovuli hududidagi 39-sonli maktabgacha taʼlim tashkiloti binosida ham amalga oshirilmoqda. Ushbu binoda bajarilayotgan respublika byudjetidan ajratilgan 3 milliard 609 mln. soʻmlik rekonstruktsiya va 180-oʻrinli qoʻshimcha bino qurish ishlari shu yil oktyabr oyida tugallanadi.

Undan tashqari, tuman aholisiga tibbiy xizmat koʻrsatish sifatini yanada yaxshilash maqsadida Navoiy nomli mahalla hududida respublika byudjetidan ajratilgan 14 milliard 325 mln. soʻmga yangidan 90-oʻrinli tugʻruqxona qurish ishlari boshlab yuborilgan.

Shuningdek, tumanning 11 ta hududida 1 milliard 400 mln. soʻm mablagʻ evaziga tibbiy konteyner punktlari tashkil qilinib, aholiga tibbiy xizmat koʻrsatish ishlari amalga oshirilmoqda.

Quruvchi-bunyodkorlarning mehnati tufayli atrof yanada obod boʻlib, Vatanimiz fayzli goʻshaga aylanmoqda. Yurtimiz ravnaqi, aholi farovonligi yoʻlida mehnat qilayotgan soha fidoyilarining ishlarida omad yor boʻlishini tilab qolamiz.

Ozoda XUDOYBERGANOVA.