МАКТАБГАЧА ТАЪЛИМ БЎЛИМИДА АНЪАНАВИЙ АВГУСТ КОНФЕРЕНЦИЯСИ БЎЛИБ ЎТДИ
Амударё тумани Мактабгача таълим бўлимида 2022-2023 ўқув йили бошланиши олдидан анъанавий август конференцияси ўтказилди.
22 август куни “Мактабгача таълим сифати: ҳозирги ҳолат ва келажакдаги вазифалар” мавзусида бўлиб ўтган конференцияда туман Мактабгача таълим бўлими масъуллари, ҳудуддаги давлат ва нодавлат мактабгача таълим ташкилотлари раҳбарлари, тарбиячи-педагоглар ва бошқалар иштирок этишди.
Ўзбекистон Республикаси Мактабгача таълим вазирлигининг шу йил 3 августдаги “Мактабгача таълим сифати: ҳозирги ҳолати ва келажакдаги вазифалари” номли дастурий август конференциясини ўтказиш ҳақида”ги бўйруғи ва Қорақалпоғистон Республикаси Мактабгача таълим вазирлигининг тегишли топшириғи ижросини таъминлаш мақсадида ўтказилган мазкур конференция кун тартибига дастлаб “Мактабгача таълим ташкилотларида давлат тилида иш юритиш ва маънавий-маърифий ишларни ташкиллаштириш” масаласи қўйилди.
Кун тартибидаги ушбу масала юзасидан 40-сонли давлат мактабгача таълим ташкилоти директори Шарифа Сейтова сўзга чиқиб, маъруза қилди. У мамлакатимизда давлат тили ҳисобланган ўзбек тили тарихи ҳақида кенг тўхталиб, мустақилликдан сўнг, қонунан мустаҳкамлангани, унга бўлган муносабат хусусида сўз юритди. Давлат тилининг сиёсий, ижтимоий ва маданий соҳаларда маълум бир давлатда интеграция вазифасини амалга оширишини, шунингдек ҳар бир давлатнинг рамзи саналишини эътироф этиб ўтди. Шунингдек, кичкинтойларни ўз тилимизга ҳурмат руҳида тарбиялаш, тўғри ёзиш ва ўқишни ўргатишга алоҳида эътибор қаратиш лозимлигини таъкидлади.
Шундан сўнг анжуман кун тартибига қўйилган педагог кадрлар таркибининг сифати ва уларни касбий ривожлантиришга доир масалалар юзасидан туман Мактабгача таълим бўлими, Таълим-тарбия сифатини таъминлаш ва методик хизматни ташкил этиш шўъбаси мудири Нафиса Ўразметованинг маърузаси тингланди.
Конференция давомида “Мактабгача таълим ташкилотларида ўқув-методик ва дидактик материаллардан самарали фойдаланиш” мавзусида 1-сонли давлат мактабгача таълим ташкилоти директори Шоира Ражабова, “Илк қадам” давлат ўқув дастури такомиллаштирилган вариантининг мазмуни” мавзусида 5-сонли давлат мактабгача таълим ташкилоти методисти Гулчеҳра Йўлдошева, “Мактабгача таълим ташкилотларида амалиётчи психологлар ишларинининг самарадорлигини ошириш” мавзусида 43-сонли давлат мактабгача таълим ташкилоти методисти Наргиза Тажимуродова ҳамда “Илм йўли” вариатив дастури ва унга киргизилган янгиликлар” мавзусида 2-сонли давлат мактабгача таълим ташкилоти методисти Саломат Тўраеваларнинг маърузалари тингланди.
Анъанавий август конференциясида иштирок этган Қорақалпоғистон Республикаси Мактабгача таълим вазирлигининг Мактабгача таълим ташкилотларида соғлом овқатланишни таъминлаш бўлими мудири Нуржамал Қурбонова ҳам сўзга чиқиб, Ўзбекистон Республикасининг 2019 йил 14 декабрдаги “Мактабгача таълим ва тарбия тўғрисида”ги қонуни мазмун-моҳиятини тушунтириб ўтди.
Шунингдек, соғлом ва тўғри овқатланиш тартиби, мазкур тартибни мактабгача таълим ташкилотларида мунтазам равишда амал қилинишини таъминлаш каби масалалар бўйича ҳам батафсил маълумотлар берилди.
Конференцияда жорий йил давомидаги таълим-тарбия борасидаги амалга оширилиш лозим бўлган вазифалар ҳам таҳлил қилинди ва муҳим топшириқлар белгилаб олинди.
О.Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
