Ўзбекистон Республикаси давлат мустақиллигининг 31 йиллиги муносабати билан Амударё тумани ҳокими С.Йўлдашевнинг туман аҳлига байрам табриги

Азиз юртдошлар!

Бугун юртимиз бўйлаб энг улуғ ва энг азиз байрамимиз – Ватанимиз мустақиллигининг 31 йиллиги кенг нишонланмоқда. Барчангизни, Сизларнинг тимсолингизда туманимиз аҳлини, бутун халқимизни мустақиллик байрами билан самимий табриклайман!

Миллий давлатчилигимиз тарихига назар ташлайдиган бўлсак, ота-боболаримиз азалдан мустақиллик учун курашиб, ўз юртига, ўз ерига ўзи эгалик қилишни асрлар давомида орзу қилиб келганлар. Халқимизнинг неча-неча мард ўғлонлари ўз юртини ҳимоя қилиб, босқинчиларга қарши мардона курашганлар.

Бундан 31 йил олдин – 1991 йил 1 сентябрь куни ота-боболаримизнинг асрлар давомида қилган орзулари ушалиб, дунё харитасида Ўзбекистон деган мустақил давлат пайдо бўлди. Бугун озод ва обод Ватанда бахтиёр ва фаровон яшаётган ҳар бир юртдошимиз мустақиллик учун жонини берган, Ватан озодлиги йўлида шаҳид кетган ота-боболаримизнинг хотирасини ҳеч қачон унутмаслиги керак.

Бугун дунёнинг турли бурчакларида, атрофимизда содир бўлаётган турли уруш ва низолар, қарама-қаршиликлар ва келишмовчиликлар барчамизни янада огоҳ ва хушёр бўлиб, мустақиллигимизни, давлатимизнинг ҳудудий яхлитлигини кўз қорачиғидай асрашга ундамоқда.

Сабаби, айнан мустақиллигимиз шарофати билан Ватанимиз жаҳон ҳамжамиятидан муносиб ўрин эгаллаб, юртимизда ҳуқуқий демократик давлат ва эркин фуқаролик жамиятини қуриш имконига эга бўлдик.

Муҳтарам Президентимиз бошчилигида амалга оширилаётган оқилона ички ва ташқи сиёсат натижасида мамлакатимиз дунё давлатлари орасида ўз нуфузига эга бўлиб, халқимиз тинч ва фаровон яшамоқда. Барча соҳаларда амалга оширилаётган туб ислоҳотлар натижасида шаҳар ва қишлоқларимиз кундан кунга обод бўлиб, халқимизнинг ҳаёт сифати янги босқичга кўтарилмоқда.

2022-2026 йилларга мўлжалланган Янги Ўзбекистоннинг тараққиёт стратегияси доирасида “Инсон қадри учун” деган тамойил асосида халқимизнинг турмуш фаровонлигини янада ошириш, иқтисодиётни ва тадбиркорликни жадал ривожлантиришга қаратилган улкан ислоҳотлар амалга оширилмоқда.

Қорақалпоғистон Республикаси миқёсида оладиган бўлсак, сўнгги 6 йил давомида тадбиркорлик субъектлари сони 2 баробарга ортди, 4,5 мингта инвестиция лойиҳалари ишга туширилди. Ичимлик суви таъминоти 40 фоиздан 68 фоизга, мактабгача таълим билан қамров даражаси 32 фоиздан 76 фоизга, аҳоли даромадлари жон бошига 2 баробарга ошди.

Президентимизнинг яқиндагина Қорақалпоғистонга қилган ташрифи давомида аҳоли ва тадбиркорлар учун кўплаб имтиёзлар жорий қилинди. Фақат Қорақалпоғистон учун фойда солиғи, айланма солиқ, мол-мулк ва ер солиғи ставкалари 2 баробар камайтирилиб, пахта ва ғалла майдонларини қисқартириш эвазига ҳар бир оилага 2 гектардан ер ажратиш, йўлларни таъмирлаш, электр, газ ва сув таъминотини яхшилаш бўйича топшириқлар берилди.

Туманимизда ҳам кейинги йилларда барча соҳаларда улкан натижаларга эришилмоқда. Биргина жорий йилнинг ўтган 6 ойи давомида салкам 300 млрд. сўмлик саноат маҳсулотлари, 86 млрд. сўмлик халқ истеъмол товарлари, 620 млрд. сўмлик қишлоқ хўжалиги маҳсулотлари ишлаб чиқарилиб, инвестициялар ҳажми салкам 250 млрд. сўмга етди.

“Обод қишлоқ” дастури доирасида Аёқчи маҳалласи ва Тўлқин овулида 27,3 млрд сўмлик маблағ эвазига йирик қурилиш ва ободонлаштириш ишлари амалга оширилмоқда.

Айниқса, Инсон қадрини улуғлаш ва фаол маҳалла йили деб белгиланган жорий йилда халқимиз турмуш сифатини янги босқичга олиб чиқиш, маҳаллани ислоҳотлар марказига айлантириш, бир сўз билан айтганда, халқимизни ҳаётдан рози қилиш йўлида жуда кенг кўламли ишлар амалга оширилмоқда.

Азиз юртдошлар!

Мамлакатимизда амалга оширилаётган бу каби ўзгариш ва янгиланишларнинг асоси – мустақиллик дея аталмиш буюк неъматдир.

Мамлакатимиз бундан 31 йил аввал ўз эркини қўлга киритиб, ўз тақдири ўзи белгилаш, тараққиёт йўлини ўзи танлаш имконига эга бўлди.

Бугун юртимизнинг ҳар бир қишлоқ ва маҳалласида “Янги Ўзбекистонда эл азиз, инсон азиз” деган ғоя асосида мустақиллигимизнинг 31 йиллик байрами кенг нишонланмоқда.

Фурсатдан фойдаланиб, барча юртдошларимизни мустақиллик байрами билан чин қалбимдан табриклайман!

Озод ва обод Ватанимиз ҳамиша тинч, бағрикенг ва меҳнаткаш халқимиз доимо соғ-омон бўлсин!

Мустақиллигимиз абадий бўлсин!