Oʻzbekiston Respublikasi davlat mustaqilligining 31-yilligi munosabati bilan Amudaryo tumani hokimi S.Yoʻldashevning tuman ahliga bayram tabrigi

Aziz yurtdoshlar!

Bugun yurtimiz boʻylab eng ulugʻ va eng aziz bayramimiz – Vatanimiz mustaqilligining 31-yilligi keng nishonlanmoqda. Barchangizni, Sizlarning timsolingizda tumanimiz ahlini, butun xalqimizni mustaqillik bayrami bilan samimiy tabriklayman!

Milliy davlatchiligimiz tarixiga nazar tashlaydigan boʻlsak, ota-bobolarimiz azaldan mustaqillik uchun kurashib, oʻz yurtiga, oʻz yeriga oʻzi egalik qilishni asrlar davomida orzu qilib kelganlar. Xalqimizning necha-necha mard oʻgʻlonlari oʻz yurtini himoya qilib, bosqinchilarga qarshi mardona kurashganlar.

Bundan 31-yil oldin – 1991-yil 1-sentyabr kuni ota-bobolarimizning asrlar davomida qilgan orzulari ushalib, dunyo xaritasida Oʻzbekiston degan mustaqil davlat paydo boʻldi. Bugun ozod va obod Vatanda baxtiyor va farovon yashayotgan har bir yurtdoshimiz mustaqillik uchun jonini bergan, Vatan ozodligi yoʻlida shahid ketgan ota-bobolarimizning xotirasini hech qachon unutmasligi kerak.

Bugun dunyoning turli burchaklarida, atrofimizda sodir boʻlayotgan turli urush va nizolar, qarama-qarshiliklar va kelishmovchiliklar barchamizni yanada ogoh va xushyor boʻlib, mustaqilligimizni, davlatimizning hududiy yaxlitligini koʻz qorachigʻiday asrashga undamoqda.

Sababi, aynan mustaqilligimiz sharofati bilan Vatanimiz jahon hamjamiyatidan munosib oʻrin egallab, yurtimizda huquqiy demokratik davlat va erkin fuqarolik jamiyatini qurish imkoniga ega boʻldik.

Muhtaram Prezidentimiz boshchiligida amalga oshirilayotgan oqilona ichki va tashqi siyosat natijasida mamlakatimiz dunyo davlatlari orasida oʻz nufuziga ega boʻlib, xalqimiz tinch va farovon yashamoqda. Barcha sohalarda amalga oshirilayotgan tub islohotlar natijasida shahar va qishloqlarimiz kundan kunga obod boʻlib, xalqimizning hayot sifati yangi bosqichga koʻtarilmoqda.

2022-2026-yillarga moʻljallangan Yangi Oʻzbekistonning taraqqiyot strategiyasi doirasida “Inson qadri uchun” degan tamoyil asosida xalqimizning turmush farovonligini yanada oshirish, iqtisodiyotni va tadbirkorlikni jadal rivojlantirishga qaratilgan ulkan islohotlar amalga oshirilmoqda.

Qoraqalpogʻiston Respublikasi miqyosida oladigan boʻlsak, soʻnggi 6-yil davomida tadbirkorlik subʼektlari soni 2 barobarga ortdi, 4,5 mingta investitsiya loyihalari ishga tushirildi. Ichimlik suvi taʼminoti 40 foizdan 68 foizga, maktabgacha taʼlim bilan qamrov darajasi 32 foizdan 76 foizga, aholi daromadlari jon boshiga 2 barobarga oshdi.

Prezidentimizning yaqindagina Qoraqalpogʻistonga qilgan tashrifi davomida aholi va tadbirkorlar uchun koʻplab imtiyozlar joriy qilindi. Faqat Qoraqalpogʻiston uchun foyda soligʻi, aylanma soliq, mol-mulk va yer soligʻi stavkalari 2 barobar kamaytirilib, paxta va gʻalla maydonlarini qisqartirish evaziga har bir oilaga 2 gektardan yer ajratish, yoʻllarni taʼmirlash, elektr, gaz va suv taʼminotini yaxshilash boʻyicha topshiriqlar berildi.

Tumanimizda ham keyingi yillarda barcha sohalarda ulkan natijalarga erishilmoqda. Birgina joriy yilning oʻtgan 6 oyi davomida salkam 300 mlrd. soʻmlik sanoat mahsulotlari, 86 mlrd. soʻmlik xalq isteʼmol tovarlari, 620 mlrd. soʻmlik qishloq xoʻjaligi mahsulotlari ishlab chiqarilib, investitsiyalar hajmi salkam 250 mlrd. soʻmga yetdi.

“Obod qishloq” dasturi doirasida Ayoqchi mahallasi va Toʻlqin ovulida 27,3 mlrd soʻmlik mablagʻ evaziga yirik qurilish va obodonlashtirish ishlari amalga oshirilmoqda.

Ayniqsa, Inson qadrini ulugʻlash va faol mahalla yili deb belgilangan joriy yilda xalqimiz turmush sifatini yangi bosqichga olib chiqish, mahallani islohotlar markaziga aylantirish, bir soʻz bilan aytganda, xalqimizni hayotdan rozi qilish yoʻlida juda keng koʻlamli ishlar amalga oshirilmoqda.

Aziz yurtdoshlar!

Mamlakatimizda amalga oshirilayotgan bu kabi oʻzgarish va yangilanishlarning asosi – mustaqillik deya atalmish buyuk neʼmatdir.

Mamlakatimiz bundan 31-yil avval oʻz erkini qoʻlga kiritib, oʻz taqdiri oʻzi belgilash, taraqqiyot yoʻlini oʻzi tanlash imkoniga ega boʻldi.

Bugun yurtimizning har bir qishloq va mahallasida “Yangi Oʻzbekistonda el aziz, inson aziz” degan gʻoya asosida mustaqilligimizning 31-yillik bayrami keng nishonlanmoqda.

Fursatdan foydalanib, barcha yurtdoshlarimizni mustaqillik bayrami bilan chin qalbimdan tabriklayman!

Ozod va obod Vatanimiz hamisha tinch, bagʻrikeng va mehnatkash xalqimiz doimo sogʻ-omon boʻlsin!

Mustaqilligimiz abadiy boʻlsin!