“МИЛЛИЙ КУРАШ” СПОРТ ТУРИ БЎЙИЧА “БЕШ ТАШАББУС ОЛИМПИАДАСИ”НИНГ МАҲАЛЛА БОСҚИЧИ МУСОБАҚАЛАРИ ЎТКАЗИЛДИ

Сўнгги йилларда жисмоний тарбия ва спортни оммалаштириш, спорт билан шуғулланадиганларнинг сонини ошириш учун зарур шарт-шароитлар яратиш мақсадида қатор чора-тадбирлар амалга оширилмоқда. Айниқса, “Беш ташаббус олимпиадаси” доирасида ўтказилган турли мусобақалар ёшларни бирлаштиришда муҳим омил бўлиб хизмат қилиш билан бирга уларнинг спортга бўлган қизиқишларини янада оширмоқда.

Шу кунларда мамлакатимизда “Беш ташаббус олимпиадаси”нинг иккинчи мавсуми бўлиб ўтмоқда. Ушбу мавсумда “Ёшлар рақс фестивали”, “Миллий ва замонавий чолғу ижрочилиги” республика танловлари, волейбол, енгил атлетика, стритбол, шахмат, шашка, бадминтон, стол тенниси, стрит воркаут, миллий кураш бўйича мусобақалари, “Киберспорт” мусобақаси, “Заковат” интеллектуал ўйини, анъанавий “Ёш китобхон”, “Қувноқлар ва зукколар” каби танловлар маҳалладан бошлаб ташкил этилиши режалаштирилган. Амударё туманида ҳам режага кўра ўтказилаётган мавсум давомидаги спорт мусобақаларида ёшлар фаол иштирок этишмоқда.

13 сентябрь куни Олмазор маҳалласидаги Марказий ўйингоҳда миллий кураш бўйича “Беш ташаббус олимпиадаси”нинг маҳалла босқичи мусобақалари бўлиб ўтди. Ёшлар агентлиги туман бўлими, туман Спортни ривожлантириш бўлими ва Спорт мактаби масъуллари ҳамкорлигида ўтказилган ушбу мусобақаларда Гулзор, Олмазор, Ойбек номли маҳаллалар ёшлари қатнашишди.

Маълумки, Давлат раҳбари томонидан 30 июнь - “Ёшлар куни” муносабати билан ташкил этилган учрашувда “Беш ташаббус олимпиадаси”ни ҳар йили 2 мавсумда ташкил этиш ташаббуси илгари сурилган эди. Шундан келиб чиқиб, “Беш ташаббус олимпиадаси”нинг иккинчи мавсумига қабул жараёнлари жорий йилнинг 10 августидан бошланди. Июль ойидан бошлаб олиб борилган тарғибот тадбирлари натижасида олимпиаданинг иккинчи мавсумида иштирок этиш истагини билдирган ёшлар махсус бот орқали рўйхатдан ўтди.

Айтиш жоизки, ушбу мавсумда мусобақаларга бир қатор ўзгартириш ва қўшимчалар киритилган. Жумладан, миллий кураш мусобақаси, “Ёшлар рақс фестивали”, “Миллий ва замонавий чолғу ижрочилиги” танловлари қўшимча равишда киритилди. Спортнинг волейбол тури бўйича мусобақада 27-30 ёшлилар иштироки олиб ташланди. Стол тенниси, стретворкоут мусобақалари жамоавий эмас, якка тартибда ўтказиладиган бўлди.

Шунга кўра “Беш ташаббус олимпиадаси”нинг 2-мавсумида спортнинг миллий кураш тури бўйича ўтказилган маҳалла босқичи мусобақаларда 12-21 ёшдаги ва 22-26 ёшдаги спортчилар иштирок этиб, ўзаро куч синашишди.

Қизғин кечган мусобақалар давомида ўзларининг спорт маҳоратларини, эпчилликларини ва чаққонликларини намойиш этган ёш курашчилардан ғолиблар аниқланиб, сектор босқичига йўлланмалар берилди.

Мазкур танлов ва мусобақаларнинг маҳалла босқичи 10-30 сентябрь кунлари, сектор босқичи 2-21 октябрь кунлари, туман босқичи 20 октябрь-4 ноябрь кунлари ҳамда ҳудудий босқичи 7-25 ноябрь кунлари ташкил этилиши режалаштирилган. Режага кўра айни пайтда ҳудудлардаги каби туманимизда ҳам ушбу танлов ва мусобақаларнинг маҳалла босқичи давом этмоқда.

Озода Худойберганова