“MILLIY KURASh” SPORT TURI BOʻYIChA “BESh TAShABBUS OLIMPIADASI”NING MAHALLA BOSQIChI MUSOBAQALARI OʻTKAZILDI

Soʻnggi yillarda jismoniy tarbiya va sportni ommalashtirish, sport bilan shugʻullanadiganlarning sonini oshirish uchun zarur shart-sharoitlar yaratish maqsadida qator chora-tadbirlar amalga oshirilmoqda. Ayniqsa, “Besh tashabbus olimpiadasi” doirasida oʻtkazilgan turli musobaqalar yoshlarni birlashtirishda muhim omil boʻlib xizmat qilish bilan birga ularning sportga boʻlgan qiziqishlarini yanada oshirmoqda.

Shu kunlarda mamlakatimizda “Besh tashabbus olimpiadasi”ning ikkinchi mavsumi boʻlib oʻtmoqda. Ushbu mavsumda “Yoshlar raqs festivali”, “Milliy va zamonaviy cholgʻu ijrochiligi” respublika tanlovlari, voleybol, yengil atletika, stritbol, shaxmat, shashka, badminton, stol tennisi, strit vorkaut, milliy kurash boʻyicha musobaqalari, “Kibersport” musobaqasi, “Zakovat” intellektual oʻyini, anʼanaviy “Yosh kitobxon”, “Quvnoqlar va zukkolar” kabi tanlovlar mahalladan boshlab tashkil etilishi rejalashtirilgan. Amudaryo tumanida ham rejaga koʻra oʻtkazilayotgan mavsum davomidagi sport musobaqalarida yoshlar faol ishtirok etishmoqda.

13-sentyabr kuni Olmazor mahallasidagi Markaziy oʻyingohda milliy kurash boʻyicha “Besh tashabbus olimpiadasi”ning mahalla bosqichi musobaqalari boʻlib oʻtdi. Yoshlar agentligi tuman boʻlimi, tuman Sportni rivojlantirish boʻlimi va Sport maktabi masʼullari hamkorligida oʻtkazilgan ushbu musobaqalarda Gulzor, Olmazor, Oybek nomli mahallalar yoshlari qatnashishdi.

Maʼlumki, Davlat rahbari tomonidan 30-iyun - “Yoshlar kuni” munosabati bilan tashkil etilgan uchrashuvda “Besh tashabbus olimpiadasi”ni har yili 2 mavsumda tashkil etish tashabbusi ilgari surilgan edi. Shundan kelib chiqib, “Besh tashabbus olimpiadasi”ning ikkinchi mavsumiga qabul jarayonlari joriy yilning 10-avgustidan boshlandi. Iyul oyidan boshlab olib borilgan targʻibot tadbirlari natijasida olimpiadaning ikkinchi mavsumida ishtirok etish istagini bildirgan yoshlar maxsus bot orqali roʻyxatdan oʻtdi.

Aytish joizki, ushbu mavsumda musobaqalarga bir qator oʻzgartirish va qoʻshimchalar kiritilgan. Jumladan, milliy kurash musobaqasi, “Yoshlar raqs festivali”, “Milliy va zamonaviy cholgʻu ijrochiligi” tanlovlari qoʻshimcha ravishda kiritildi. Sportning voleybol turi boʻyicha musobaqada 27-30 yoshlilar ishtiroki olib tashlandi. Stol tennisi, stretvorkout musobaqalari jamoaviy emas, yakka tartibda oʻtkaziladigan boʻldi.

Shunga koʻra “Besh tashabbus olimpiadasi”ning 2-mavsumida sportning milliy kurash turi boʻyicha oʻtkazilgan mahalla bosqichi musobaqalarda 12-21 yoshdagi va 22-26 yoshdagi sportchilar ishtirok etib, oʻzaro kuch sinashishdi.

Qizgʻin kechgan musobaqalar davomida oʻzlarining sport mahoratlarini, epchilliklarini va chaqqonliklarini namoyish etgan yosh kurashchilardan gʻoliblar aniqlanib, sektor bosqichiga yoʻllanmalar berildi.

Mazkur tanlov va musobaqalarning mahalla bosqichi 10-30-sentyabr kunlari, sektor bosqichi 2-21-oktyabr kunlari, tuman bosqichi 20-oktyabr-4-noyabr kunlari hamda hududiy bosqichi 7-25-noyabr kunlari tashkil etilishi rejalashtirilgan. Rejaga koʻra ayni paytda hududlardagi kabi tumanimizda ham ushbu tanlov va musobaqalarning mahalla bosqichi davom etmoqda.

Ozoda Xudoyberganova