ОҚ ОЛТИНЛИКЛАР САРБАЛАНД ХИРМОН БУНЁД ЭТИШМОҚДА

Айни кунларда барча жойларда бўлгани каби Амударё туманидаги фермер хўжаликлари далаларида ҳам пахта йиғим-терими авжида. Моҳир теримчилар эрта баҳордан то ёз охиригача астойдил парвариш қилинган ғўзадан етиштирилган мўл ҳосилни йиғиб-териб, сарбаланд хирмон бунёд этиш, оилаларига даромад келтириш мақсадида астойдил ҳаракат қилишмоқда.

Оқ олтин овулидаги Рашид Қутлимуродов раислик қилаётган “Сапарбой Қодир” фермер хўжалиги ҳам туманда биринчилардан бўлиб пахта йиғим-теримига киришган эди. Хўжаликда 48 гектар ерда “Манғит-1” навли пахта етиштирилди. Бугунга келиб ушбу хўжалик далаларидан 40 тоннадан зиёд биринчи навли пахта териб олинди. Ҳосилдорлик гектаридан 30 центнерни ташкил қилмоқда. Хўжалик теримчилари бир кунда 6-8 тонна ҳосил топшириб, туманимиз “оқ олтин” хирмони юксалишига муносиб ҳисса қўшишмоқда.

Теримчиларга бепул тушлик қилиб берилмоқда. Терим илғорлари фермер хўжалиги томонидан алоҳида рағбатлантириб борилмоқда. Бу рағбат ҳашарчи-ю теримчиларга янада кўпроқ куч-ғайрат, шижоат бағишламоқда.

Жорий йилда туманимизда пахта хом ашёси етиштирувчи фермер хўжаликлари учун барча шароитлар яратилди. Уруғлик чигит, минерал ўғит, ёнилғи-мойлаш маҳсулотлари ўз вақтида дала бошига етказилиб берилди. Фермер хўжаликлари техника таъминоти яхшиланди. Чигит замонавий сеялкалар ёрдамида ерга қадалди. Ана шу омиллар ва сувдан оқилона фойдаланиш, фермер хўжалиги далаларида меҳнат қилган деҳқонларимизнинг фидокорона меҳнати эвазига далаларда мўл ҳосил тўплашга эришилди.

Ҳозирда туманимиз далаларида ҳалол меҳнат ҳамда катта харажат эвазига етиштирилган пахта ҳосилини қисқа муддатларда ва сифатли йиғиб-териб олиш ишлари қизғин давом этмоқда.

Кластер корхонаси – масъулияти чекланган жамият шаклидаги “Amudaryotex” хорижий корхонаси томонидан 352 та фермер хўжалиги билан шартнома тузилган бўлиб, чигит экилган майдон 13900 гектарни ташкил қилади. Ушбу пахта далаларида ҳосилдорликни 32,2 центнерга, ялпи ҳосилни 44 минг 755 тоннага етказиш мўлжалланган.

Туманда 2022 йил пахта йиғим-терими мавсумига пухта тайёргарлик кўриш ва уни оптимал муддатларда амалга ошириш мақсадида чора-тадбирлар дастури ишлаб чиқилди. Шунга кўра 290 та терим отрядлари ташкил қилинди. Терим отрядларига тажрибали хўжалик фаолларидан иборат отряд раҳбарлари тайинланди. Теримчиларга ўз вақтида терим пулларини бериб боришни ташкил қилиш мақсадида банк ходимлари бириктирилди.

Отрядларга жами 23 минг 266 нафар теримчилар жалб қилинган бўлиб, улар айни мавсум давомида теримга кўмаклашишмоқда. Шундан 9283 нафарини пахта тўқимачилик ва фермер хўжалиги ишчилари, 13983 нафарини уюшмаган аҳоли ташкил қилади.

Пахта йиғим-терим ишларида 260 та пахта ташиш техникалари, 535 та тиркамалар, 580 та тарози, 580 та қозон-ўчоқ, 580 та самовар, 870 та сув сақлаш баклари, 52108 та этаклардан фойдаланилмоқда. Теримчилар мавсум бошидан 19 сентябргача туманимиз пахта хирмонига 6206 тоннадан ортиқ пахта топширишга муваффақ бўлишди.

Барча ҳудудларда бўлгани каби “Сапарбой Қодир” фермер хўжалиги пахтазорларида терим ишлари айни авжида. Илғор теримчилардан Гавҳар Болтабоева, Холида Пасиева, Наргиза Ўрозбоева, Сайёра Ҳайдарова, Шаҳло Шомуродова, Шоҳида Эриева, Муҳаббат Қувватбоева ва бошқалар терим суръатини кун сайин ошириб, хўжалик хирмонини юксалтиришга муносиб ҳисса қўшишмоқда ва барчага ўрнак бўлишмоқда.

Дастлабки довондан ошиб, янада юксак хирмон барпо этиш истагида пахта теримини жадал давом эттираётган “Сапарбой Қодир” фермер хўжалиги каби хўжаликлар сони туманимизда кундан-кунга ортиб бормоқда.

О.Худойберганова.