“ВАТАНПАРВАР” ТАШКИЛОТИ ЎҚУВ-СПОРТ ТЕХНИКА КЛУБИДА ТУМАН БИРИНЧИЛИГИ МУСОБАҚАЛАРИ ЎТКАЗИЛДИ

Президентимизнинг “Ёшларни ватанпарварлик руҳида ва жисмоний тарбиялаш ҳамда чақирилувчиларни ҳарбий-техник мутахассисликлар бўйича тайёрлаш тартибини такомиллаштириш бўйича қўшимча чора-тадбирлар тўғрисида”ги 2018 йил 12 декабрдаги Қарори ижросини таъминлаш мақсадида тумандаги Мудофаага кўмаклашувчи “Ватанпарвар” ташкилоти ўқув-спорт техника клубида  анъанавий тарздаги ёзги биатлон  ҳамда енгил  атлетика спорт мусобақалари бўлиб ўтди.

14 сентябрь куни туман кубоги биринчилигига бағишлаб ўтказилган мазкур мусобақаларда умумтаълим мактабларидан 5 та жамоа иштирок этди. Мусобақанинг очилиш маросимида туман ЎСТК бошлиғи Ш.Камолов, ХТБ методисти Н.Абдуллаев, ЎСТК мураббийи Н.Исмаиловлар қатнашдилар.  

Мусобақа шартига  кўра жамоаларнинг ҳар бир аъзоси 4000 метрга югуриш ва оралиқда бир марта тик турган ҳолатда, кейинги айланани югуриб  ўтиб, ётган ҳолатда ҳаво милтиғидан  нишонларга ўқ отиш каби шартларни бажаришди. Берилган 5та ўқдан нишонларга кам теккизганлар, шунча марта белгиланган жарима айланасини қўшимча равишда югуриб ўтдилар.

Қизғин баҳслар ва курашларга бой тарзда бўлиб ўтган мусобақада барча жамоалар ғолиб чиқиш учун ҳаракат қилдилар. Мусобақа якунида яхши натижалар кўрсатган жамоалар ғолиб ва совриндорлар қаторидан ўрин олдилар.

Мусобақада  ёзги биатлон бўйича жамоалардан 1-ўринни 19-сонли мактаб жамоаси, 2-ўринни 38-сонли мактаб жамоаси, 3-ўринни 1-сонли мактаб жамоаси эгалладилар.

Шунингдек, енгил атлетика бўйича Амударё туман кубоги биринчилигида ўғил болалар ўртасида 1-сонли мактаб ўқувчиси Отабек Худанов 1-ўрин, 30-сонли мактаб ўқувчиси Ёдгор Шарипов 2-ўрин, 1-сонли мактаб ўқувчиси Суҳроб Эримбетов 3-ўрин ғолиб бўлишди.  Қизлар ўртасида эса 19-сонли мактаб ўқувчиси Мухлиса Тўлибоевага 1-ўрин,  30-сонли мактаб ўқувчиси Матмуроддова Севинчга 2-ўрин, 30-сонли мактаб ўқувчиси Муниса Аминовага 3-ўрин ғолиблиги берилди.

Мусобақа якунида ғолиб жамоа ва шахсий биринчиликка эришган спортчиларга ҳамкор ташкилотлар томонидан дипломлар ва эсдалик совғалари топширилди. Ғолиб жамоалар шарафига концерт дастури намойиш этилди.

Озода Худойберганова