“VATANPARVAR” TAShKILOTI OʻQUV-SPORT TEXNIKA KLUBIDA TUMAN BIRINChILIGI MUSOBAQALARI OʻTKAZILDI

Prezidentimizning “Yoshlarni vatanparvarlik ruhida va jismoniy tarbiyalash hamda chaqiriluvchilarni harbiy-texnik mutaxassisliklar boʻyicha tayyorlash tartibini takomillashtirish boʻyicha qoʻshimcha chora-tadbirlar toʻgʻrisida”gi 2018-yil 12-dekabrdagi Qarori ijrosini taʼminlash maqsadida tumandagi Mudofaaga koʻmaklashuvchi “Vatanparvar” tashkiloti oʻquv-sport texnika klubida  anʼanaviy tarzdagi yozgi biatlon  hamda yengil  atletika sport musobaqalari boʻlib oʻtdi.

14-sentyabr kuni tuman kubogi birinchiligiga bagʻishlab oʻtkazilgan mazkur musobaqalarda umumtaʼlim maktablaridan 5 ta jamoa ishtirok etdi. Musobaqaning ochilish marosimida tuman OʻSTK boshligʻi Sh.Kamolov, XTB metodisti N.Abdullayev, OʻSTK murabbiyi N.Ismailovlar qatnashdilar.  

Musobaqa shartiga  koʻra jamoalarning har bir aʼzosi 4000 metrga yugurish va oraliqda bir marta tik turgan holatda, keyingi aylanani yugurib  oʻtib, yotgan holatda havo miltigʻidan  nishonlarga oʻq otish kabi shartlarni bajarishdi. Berilgan 5ta oʻqdan nishonlarga kam tekkizganlar, shuncha marta belgilangan jarima aylanasini qoʻshimcha ravishda yugurib oʻtdilar.

Qizgʻin bahslar va kurashlarga boy tarzda boʻlib oʻtgan musobaqada barcha jamoalar gʻolib chiqish uchun harakat qildilar. Musobaqa yakunida yaxshi natijalar koʻrsatgan jamoalar gʻolib va sovrindorlar qatoridan oʻrin oldilar.

Musobaqada  yozgi biatlon boʻyicha jamoalardan 1-oʻrinni 19-sonli maktab jamoasi, 2-oʻrinni 38-sonli maktab jamoasi, 3-oʻrinni 1-sonli maktab jamoasi egalladilar.

Shuningdek, yengil atletika boʻyicha Amudaryo tuman kubogi birinchiligida oʻgʻil bolalar oʻrtasida 1-sonli maktab oʻquvchisi Otabek Xudanov 1-oʻrin, 30-sonli maktab oʻquvchisi Yodgor Sharipov 2-oʻrin, 1-sonli maktab oʻquvchisi Suhrob Erimbetov 3-oʻrin gʻolib boʻlishdi.  Qizlar oʻrtasida esa 19-sonli maktab oʻquvchisi Muxlisa Toʻliboyevaga 1-oʻrin,  30-sonli maktab oʻquvchisi Matmuroddova Sevinchga 2-oʻrin, 30-sonli maktab oʻquvchisi Munisa Aminovaga 3-oʻrin gʻolibligi berildi.

Musobaqa yakunida gʻolib jamoa va shaxsiy birinchilikka erishgan sportchilarga hamkor tashkilotlar tomonidan diplomlar va esdalik sovgʻalari topshirildi. Gʻolib jamoalar sharafiga kontsert dasturi namoyish etildi.

Ozoda Xudoyberganova