ЎзЛиДеп туман Кенгашига янги аппарат раҳбари тайинланди

20 сентябрь куни Амударё тумани ҳокимлигининг мажлислар залида Тадбиркорлар ва ишбилармонлар ҳаракати – Ўзбекистон Либерал-демократик партияси туман Кенгашининг йиғилиши бўлиб ўтди.

Йиғилишда туман ҳокимининг биринчи ўринбосари Рашид Салаев, партия Қорақалпоғистон Республикаси Кенгаши раисининг биринчи ўринбосари, аппарат раҳбари Казбек Артиков, тумандан сайланган Қорақалпоғистон Республикаси Жўқорғи Кенгеси депутатлари, Халқ депутатлари туман Кенгаши депутатлари, ҳокимлик масъул ходимлари ва оммавий ахборот воситалари вакиллари иштирок этишди.

Йиғилишда аппарат раҳбари Казбек Артиков партиянинг туман Кенгаши фаолияти ҳақида сўз юритиб, аппарат раҳбари лавозимига Яхшимурод Аҳмедов тайинланганини маълум қилди ва йиғилиш қатнашчиларига янги раҳбарнинг таржимаи ҳолини ҳамда меҳнат фаолиятини ўқиб эшиттирди.

Қорақалпоғистон Республикаси Жўқорғи Кенгеси депутати Қувончбой Баймуратов париянинг туман Кенгаши раҳбарига янгидан бошлаётган иш фаолиятида зафарлар тилади. Шу билан бирга Яхшимурод Аҳмедовнинг депутатлик фаолиятини, инсоний фазилатларини эътироф этиб ўтди.

Йиғилиш давомида Жўқорғи Кенгес депутати Санобар Хўжамуратова партия халқимизнинг оғирини енгил қилиш, уларни рози қилишга қаратилган сиёсатни амалга оширишда ва аҳолининг камбағал қатламини камбағалликдан чиқариш, хусусан, уларни оилавий тадбиркорликка ўргатиш, иш билан таъминлаш каби мақсадларга катта эътибор қаратаётганини айтиб ўтди. Бу борада партиядан сайланган депутатларнинг аҳоли билан мунтазам равишда мулоқот қилиб, тадбиркорлик фаолиятини қўллаб-қувватлаётганлиги, оилавий тадбиркорлик орқали аҳолининг барча қатламларини бирлаштиришга эришаётганини қайд қилиб, янги раҳбарнинг иш фаолиятига омад тилади.

Йиғилиш давомида сўзга чиққанлар партиянинг туман Кенгаши фаолияти ҳақида кўплаб ижобий фикрлар билдириб ўтишди. Таъкидланганидек, партиядан Жўқорғи Кенгес депутатлигига 3 нафар, туман Кенгаши депутатлигига 8 нафар депутатлар сайланган.

Бугунги кунда партиянинг тумандаги аъзолари сони 2 минг 595 нафарни ташкил этади. Жорий йилнинг шу даврига қадар 66 та бошланғич партия ташкилотлари томонидан ҳисобот сайлов йиғилишлари ўтказилиб, партиянинг иш фаолияти давомида эришилган муваффақият ва камчиликлар сарҳисоб қилинди.

Ўзбекистон Либерал-демократик партияси Амударё туман Кенгашидаги партиянинг депутатлик гуруҳи томонидан 2022 йилнинг 6 ойи давомида 26 та депутатлик сўровлари чиқарилган бўлиб, депутатлик сўровлари ижроси тўлиқ назоратга олинган.

Туманда 3 нафар ёш тадбиркорларнинг фаолиятини янада ривожлантириш бўйича Ўзбекистон Либерал-демократик партияси депутатлари томонидан амалий ёрдамлар кўрсатилган.

Йиғилиш якунида партиянинг туман Кенгаши раҳбари Яхшимурод Аҳмедов партиянинг дастурига мувофиқ ишларни ташкил этишга, депутатлар билан биргаликда фаол иш олиб бориб, ёшларнинг тадбиркорлик ғояларини қўллаб-қувватлаш ва бу орқали ишбилармонлар сафини, партия аъзоларини кўпайтиришга ваъда берди.

Туман ҳокимлигининг Ахборот хизмати.