Қонунчилик Палатаси депутатлари ва сектор раҳбарлари илғор теримчилар билан учрашди

Амударёлик деҳқонлар йил-ўн икки ой даладаги машаққатли меҳнатлари самарасида етиштирган ҳосилини қисқа кунларда йиғиб-териб олиш йўлида астойдил меҳнат қилмоқдалар. Дала бошида теримчиларга барча шароитлар яратилгани, иссиқ овқат, чой ташкил этилгани, терим пулларининг вақтида бериб борилаётгани уларни янада ғайрат ва шижоат билан меҳнат қилишга ундамоқда.

Оппоқ бўлиб очилган пахталарни теришнинг ҳам ўзига яраша завқи бор. Айниқса, меҳнат муносиб рағбатлантириб борилса бу иштиёқ янада ошади.

29 сентябр куни Амударё туманида жойлашган, тажрибали фермер Шавкат Яхшимуратов раҳбарлик қилаётган “Юсуфхўжа” фермер хўжалигида мана шундай фидойи ва илғор теримчиларни рағбатлантиришга бағишланган тадбир бўлиб ўтди.

Тадбирда туман ҳокими Султонбой Йўлдашев, Олий Мажлис Қонунчилик палатаси депутатлари Зумрад Бекатова ҳамда Руслан Джумамуратов, тумандаги секторлар раҳбарлари, масъулияти чекланган жамият шаклидаги “Amudaryotex” хорижий корхонаси масъуллари, қишлоқ хўжалиги соҳаси мутасаддилари ва мазкур фермер хўжалигида пахта теримида қатнашаётган ишчилар иштирок этишди.

Дастлаб, туман ҳокими Султонбой Йўлдашев фермер хўжалигининг пахта тайёрлаш режасини ортиғи билан бажарганини эътироф этиб, уларни ушбу муваффақиятлари билан самимий табриклади.

Маълумот учун, “Юсуфхўжа” фермер хўжалигининг 80 гектар майдонига чигит экилган бўлиб, агротехник тадбирлар вақтида бажарилгани боис далаларда мўл ҳосил тўпланди. Натижада фермер кластер корхонасига режадаги 140 тонна пахта ўрнига 262 тонна пахта ҳом-ашёсини топширди. Фермернинг маълум қилишича, ҳали хўжалик пахта далаларидан яна 100 тонна пахта ҳом-ашёсини териб олиш мумкин.

Учрашувда сектор раҳбарлари ҳам сўзга чиқиб, теримчиларга юртимиз иқтисодиётига, аҳоли фаровонлигига қўшаётган хиссалари учун миннатдорлик билдиришди. Фермер хўжалиги далаларида ўзининг бор куч-ғайратини аямасдан меҳнат қилаётган 150 нафар теримчиларга мустаҳкам соғлик-саломатлик тилашди.

Шундан сўнг, Олий Мажлис Қонунчилик палатаси депутати Зумрад Бекатова мамлакатимизда сўнгги йилларда амалга оширилган муҳим ижобий янгиликлар, жумладан, аҳоли фаровонлигини, юрт равнақини юксалитириш, энг асосийси инсон қадрини улуғлаш мақсадида қабул қилинаётган қарор ва фармонларга тўхталиб ўтди.

Шу билан бирга Олий Мажлис Қонунчилик палатаси депутатлари Зумрад Бекатова ҳамда Руслан Джумамуратовлар пахта йиғим-терими мавсуми даврида мажбурий меҳнатга ва болалар меҳнатидан фойдаланишга йўл қўймаслик лозимлигини, бундай ҳоллар аниқланса тегишли мутасаддилар қонун олдида жавобгарликка тортилишини айтиб ўтишди.

Учрашув давомида мутасаддилар кузнинг гоҳ салқин, гоҳ иссиқ кунларига қарамасдан, ғайрат билан меҳанат қилаётган илғор теримчиларни қимматбаҳо совғалар билан рағбатлантирди. Теримчи аёллар ўзларига кўрсатилаётган бу каби эътибордан мамнун бўлиб, янада фаол меҳнат қилишларини таъкидлашди.

Пахта – оқлик, беғуборлик тимсоли. Боиси, у ҳалол ва фидойи меҳнатдан яралади. Шундай экан, далалардаги “оқ олтин”нинг бир мисқолини ҳам қолдирмай йиғиб-териб олиш ҳар бир фермер хўжалиги раҳбарининг, ишчиларининг ва пудратчилар ҳамда ҳашарчиларнинг бугунги кундаги долзарб вазифасидир.

Пахта йиғим-терим ишларида нафақат “Юсуфхўжа” фермер хўжалиги, балки тумандаги барча хўжаликлар ишчилари ва ҳашарчилари ҳам фаол қатнашиб, мавсумни уюшқоқлик билан ўтказишга муносиб ҳисса қўшмоқдалар.

Фотима Эшимбетова, туман ҳокимлигининг Ахборот хизмати раҳбари.