15-сонли мактабда “Меҳрижон сайли” ўтказилди

Ёшликда олинган билим ­– тошга ўйилган нақш каби, дейди донолар. Шунинг учун жажжи ўғил-қизларни бошланғич синфларданоқ илм олиш, ўқиш-ўрганишга қизиқтира олиш, уларнинг кўнглида келажакда улкан салоҳиятга эга, зиёли инсон бўлиб вояга етишга ҳавас уйғотиш жуда муҳим.

Шу маънода олиб қарайдиган бўлсак, мактабларнинг бошланғич таълим ўқитувчилари зиммасидаги масъулият жуда салмоқли ва шарафли эканини англаймиз. Ҳар йили мамлакатимизда умумий ўрта таълим мактабларида сентябрь ойида бошланғич таълим фан ойлигини ўтказиш белгиланганлиги ҳам ўқувчиларнинг саводхонлигини оширишга қаратилган.

Аввало уларга “Билимлар куни”, “Мустақиллик сабоқлари” мавзуларида мустақиллик дарслари ташкил этилади ва бу дарслар орқали қалбида она Ватанга муҳаббат, юртга садоқат туйғулари тарбияланади.

Ойлик доирасида ўтказиладиган турли танловлар, мустақил фикрлашга йўналтирадиган мусобақалар, давра суҳбатлари орқали уларнинг дунёқараши кенгайтирилиб, ўзаро ҳурмат туйғулари шакллантирилади.

Шу йилнинг 29 сентябрида Амударё туманидаги 15-сонли мактабда бошланғич таълим фан ойлигига бағишланган тадбирда ҳам барча ўқувчиларнинг мустақил диёримизда куз фаслининг ўзгача тароватини, саховати ҳақида, она заминимизда етиштириладиган мевалар, полиз маҳсулотлари ҳақида уларнинг ёш авлод вакиллари ўсиб улғайишидаги фойдалари ҳақида кенг билимларга эга бўлишига ҳисса қўшилди.

“Меҳрижон сайли” тадбирида бошланғич синф ўқувчилари иштирок этишди. Унда мактаб директорининг ўқув ишлари бўйича ўринбосари Комилжон Машарипов, маънавий-маърифий ишлар бўйича ўринбосари Искандар Искандаровлар қатнашиб, ўқувчиларга фан ойлиги доирасида ўтказилган тадбирларда фаол қатнашганлиги учун миннатдорлик билдирди ва мактаб ўқитувчилар жамоасини 1 октябрь – касб байрами куни билан қизғин қутлади.

Мактабнинг бошланғич синф ўқитувчилари Муқаддам Примматова, Муҳаббат Раҳимбоева, Ширин Сафарбоева, Нилуфар Тўраева, Умида Ражабова, Нодира Болтабоева, Юлдуз Авазметова, Севара Собировалар ҳамкорликда тайёрлаган “Меҳрижон сайли”да ўқувчилар куз пишиқчилик манзаралари акс этган саҳна кўринишлари намойиш этишди.

Ўқувчилар кузнинг бошқа фасллардан ўзига хос фарқлари, кузда она заминимиз бағрида етиладиган мевалар, сабзавотлар ҳақида шеърлар, топишмоқлар айтдилар.

Мактабнинг мусиқа фани ўқитувчиси Ўринбой Шомуродовнинг иқтидорли ўқувчилари Жавоҳир Қадамбоев, Отабек Бобожоновлар ижро этган қўшиқлари ҳам барчага хушнудлик бахш этди.

Бошланғич таълим фан ойлиги доирасида қуйи синфлар ўқувчилари иштирокида тайёрланган “Меҳрижон сайли” тадбирида ўқувчиларга халқимизнинг қадимдан куз фаслида нишонланиб келаётган “Меҳрижон” миллий байрами ҳақида кўпгина маълумотларга эга бўлдилар.

Байрам тадбири ўқувчиларни жаннатмакон юртимизни севишга, ардоқлашга ва унга муносиб фарзандлар бўлишга руҳлантирди.

Ойгул Ражабова