“БЕШ ТАШАББУС ОЛИМПИАДАСИ” ДОИРАСИДА СТОЛ ТЕННИСИ МУСОБАҚАЛАРИ ЎТКАЗИЛДИ

Ёшларнинг бўш вақтларини мазмунли ўтказишлари учун зарур шарт-шароитлар яратиш, уюшмаган ёшларни турли кўнгилочар тадбирларга қамраб олиш мақсадида ватанпарварлик, ўзаро аҳиллик ва бағрикенглик тамойилларига асосланган спорт мусобақаларини ташкил этиш орқали уларда ўзига ва келажакка юксак ишонч туйғуларини уйғотиш мақсадида маданият, санъат, спорт, китобхонлик, ахборот технологиялари каби йўналишларни ўзида мужассам этган “Беш ташаббус олимпиадаси” доирасидаги тадбирлар мамлакатимиз бўйлаб кенг миқёсда ўтказилмоқда.

Жорий йилнинг 13 октябрь санасида Амударё туманининг 1-сектор ҳудудидаги 1-сонли касб-ҳунар мактаби спорт залида бўлиб ўтган спортнинг стол тенниси йўналишидаги мусобақалар ҳам турли ёш тоифасидаги ўсмирлар ва ёшларни бирлаштиргани билан муҳим аҳамият касб этди.

“Беш ташаббус олимпиадаси” доирасида ўзаро аҳиллик, бағрикенглик ва дўстона вазиятда ўтказилган мазкур мусобақанинг сектор босқичида 1-сектор ҳудудидаги барча овул ва маҳалла фуқаролар йиғинларидан жами 96 нафар, 11 ёшдан 30 ёшгача бўлган стол тенниси бўйича спортчилар иштирок этишди. Мусобақа иштирокчиларининг 48 нафари аёл-қизлар бўлиб, уларнинг фаол қатнашишларини таъминлаш мақсадида ташкилотчилар томонидан зарур шарт-шароитлар яратилди.

Дўстона, самимий руҳда, қизғин беллашувлар асосида бўлиб ўтган мусобақалар якунига кўра, 11-15 ёш тоифасидаги ўсмир ўғил болалар ва қизлар ўртасида Оғабек Қўчқоров ва Нигора Болтабоевалар 1-ўринни, Ринат Назаримбетов, Машҳура Собирова 2-ўринни, Азизбек Холимбетов, Шаҳло Йўлдошевалар 3-ўринни эгаллашди.

Шунингдек, 16-21 ёш тоифасидаги спортчилар ўртасидаги ғолиблик учун кураш ҳам қизғин ўтди. Унга кўра, Нодирбек Махсудов, Севинч Ўрозимбетовалар фахрли 1-ўрин, Сардор Йўлдошев, Севинч Ражабова 2-ўрин, Жавоҳир Аминов ва Динора Ҳайитбоевалар 3-ўрин соҳиблари бўлишди.

Мусобақада 22-26 ва 27-30 ёшли ракетка усталари ўртасидаги баҳслар янада ҳаяжонли дақиқаларга бой бўлди. Унга кўра, Жавлонбек Гулмирзаев, Ирода Нуруллаева, Темур Исмоилов ҳамда Гулноза Қурбонбоевалар ўз ёш тоифаларида фахрли 1-ўринни эгаллашиб, мусобақанинг юқори поғонасидан жой олдилар.

Чойкўл овулидан Санжар Давлатбоев, Уйшин маҳалласидан Адолат Турсунбоева, Дарёбўйи маҳалласидан Шерзод Исмоилов, Қипчоқ овулидан Мухлиса Жумамуродовалар ўз ёш тоифалари бўйича иккинчи, Бештом маҳалласидан Гавҳар Дурдибоева, Ойбек номли маҳалладан Дониёр Ибрагимов, Бештом маҳалласидан Гулширин Жумамуродова, Тўлқин овулидан Шаҳзод Соатбоевлар эса учинчи ўринни эгаллашди.

Мусобақа якунида ўз ёш тоифаларида фахрли 1-ўринни эгаллаган 8 нафар спортчи-ёшларга Беш ташаббус олимпиадаси доирасидаги мусобақанинг туман босқичида иштирок этишлари учун йўлланмалар берилди.

Мазкур мусобақанинг Амударё тумани ғолиблиги учун мусобақаларда тўртта сектор босқичининг фаол иштирокчилари бўлган ғолиб спортчилар туман биринчилигини қўлга киритиш учун ўзаро куч синашадилар. Туман босқичи янада қизғин баҳсларга бой бўлиши табиий. Чунки унда тўртта секторлар бўйича ғолибликка эришган энг кучли, қолаверса, зарур тайёргарлик босқичидан ўтган спортчилар ўзаро беллашадилар.

Туманимизнинг ракетка усталарига галдаги мусобақаларда омад ёр бўлишини тилаймиз.

Робия ЙЎЛДОШЕВА.