“BESh TAShABBUS OLIMPIADASI” DOIRASIDA STOL TENNISI MUSOBAQALARI OʻTKAZILDI

Yoshlarning boʻsh vaqtlarini mazmunli oʻtkazishlari uchun zarur shart-sharoitlar yaratish, uyushmagan yoshlarni turli koʻngilochar tadbirlarga qamrab olish maqsadida vatanparvarlik, oʻzaro ahillik va bagʻrikenglik tamoyillariga asoslangan sport musobaqalarini tashkil etish orqali ularda oʻziga va kelajakka yuksak ishonch tuygʻularini uygʻotish maqsadida madaniyat, sanʼat, sport, kitobxonlik, axborot texnologiyalari kabi yoʻnalishlarni oʻzida mujassam etgan “Besh tashabbus olimpiadasi” doirasidagi tadbirlar mamlakatimiz boʻylab keng miqyosda oʻtkazilmoqda.

Joriy yilning 13-oktyabr sanasida Amudaryo tumanining 1-sektor hududidagi 1-sonli kasb-hunar maktabi sport zalida boʻlib oʻtgan sportning stol tennisi yoʻnalishidagi musobaqalar ham turli yosh toifasidagi oʻsmirlar va yoshlarni birlashtirgani bilan muhim ahamiyat kasb etdi.

“Besh tashabbus olimpiadasi” doirasida oʻzaro ahillik, bagʻrikenglik va doʻstona vaziyatda oʻtkazilgan mazkur musobaqaning sektor bosqichida 1-sektor hududidagi barcha ovul va mahalla fuqarolar yigʻinlaridan jami 96 nafar, 11 yoshdan 30 yoshgacha boʻlgan stol tennisi boʻyicha sportchilar ishtirok etishdi. Musobaqa ishtirokchilarining 48 nafari ayol-qizlar boʻlib, ularning faol qatnashishlarini taʼminlash maqsadida tashkilotchilar tomonidan zarur shart-sharoitlar yaratildi.

Doʻstona, samimiy ruhda, qizgʻin bellashuvlar asosida boʻlib oʻtgan musobaqalar yakuniga koʻra, 11-15 yosh toifasidagi oʻsmir oʻgʻil bolalar va qizlar oʻrtasida Ogʻabek Qoʻchqorov va Nigora Boltaboyevalar 1-oʻrinni, Rinat Nazarimbetov, Mashhura Sobirova 2-oʻrinni, Azizbek Xolimbetov, Shahlo Yoʻldoshevalar 3-oʻrinni egallashdi.

Shuningdek, 16-21 yosh toifasidagi sportchilar oʻrtasidagi gʻoliblik uchun kurash ham qizgʻin oʻtdi. Unga koʻra, Nodirbek Maxsudov, Sevinch Oʻrozimbetovalar faxrli 1-oʻrin, Sardor Yoʻldoshev, Sevinch Rajabova 2-oʻrin, Javohir Aminov va Dinora Hayitboyevalar 3-oʻrin sohiblari boʻlishdi.

Musobaqada 22-26 va 27-30 yoshli raketka ustalari oʻrtasidagi bahslar yanada hayajonli daqiqalarga boy boʻldi. Unga koʻra, Javlonbek Gulmirzayev, Iroda Nurullayeva, Temur Ismoilov hamda Gulnoza Qurbonboyevalar oʻz yosh toifalarida faxrli 1-oʻrinni egallashib, musobaqaning yuqori pogʻonasidan joy oldilar.

Choykoʻl ovulidan Sanjar Davlatboyev, Uyshin mahallasidan Adolat Tursunboyeva, Daryoboʻyi mahallasidan Sherzod Ismoilov, Qipchoq ovulidan Muxlisa Jumamurodovalar oʻz yosh toifalari boʻyicha ikkinchi, Beshtom mahallasidan Gavhar Durdiboyeva, Oybek nomli mahalladan Doniyor Ibragimov, Beshtom mahallasidan Gulshirin Jumamurodova, Toʻlqin ovulidan Shahzod Soatboyevlar esa uchinchi oʻrinni egallashdi.

Musobaqa yakunida oʻz yosh toifalarida faxrli 1-oʻrinni egallagan 8 nafar sportchi-yoshlarga Besh tashabbus olimpiadasi doirasidagi musobaqaning tuman bosqichida ishtirok etishlari uchun yoʻllanmalar berildi.

Mazkur musobaqaning Amudaryo tumani gʻolibligi uchun musobaqalarda toʻrtta sektor bosqichining faol ishtirokchilari boʻlgan gʻolib sportchilar tuman birinchiligini qoʻlga kiritish uchun oʻzaro kuch sinashadilar. Tuman bosqichi yanada qizgʻin bahslarga boy boʻlishi tabiiy. Chunki unda toʻrtta sektorlar boʻyicha gʻoliblikka erishgan eng kuchli, qolaversa, zarur tayyorgarlik bosqichidan oʻtgan sportchilar oʻzaro bellashadilar.

Tumanimizning raketka ustalariga galdagi musobaqalarda omad yor boʻlishini tilaymiz.

Robiya YOʻLDOShEVA.