83-сонли мактабда Ўзбек тили байрами куни муносабати билан тадбирлар ўтказилди
Тил – миллат кўзгуси. Ҳар қандай миллатнинг ҳаёти унинг она тилида ҳам яққол намоён бўлади. Собиқ иттифоқ даврида халқимизнинг ҳуқуқ ва шаъни, эрки топталгани она тилимизга қилинган камситишларда ҳам акс этгани ҳали кўпчикнинг ёдида: ўз она тилимиз нақадар бой, жозибадор ва азиз бўлса-да, Ўзбекистонда барча ҳужжатлар рус тилида ёзилар эди.
Ўзлигимиз, ғуруримиз, шаънимиз ҳисобланган она тилимизга давлат тили мақоми берилгани халқимизнинг мустақиллик сари қўйган илк қадами бўлди.
1989 йил 21 октябрда Ўзбекистон Республикасининг “Давлат тили ҳақида”ги Қонуни қабул қилиниши халқимизнинг кўп йиллик орзулари рўёби бўлди. Чунки Қонун она тилимизнинг бор гўзаллиги ва жозибасини тўла намоён этиши билан бирга, уни илмий асосда ривожлантиришга ҳам кенг имкониятлар яратди.
Ўтган давр мобайнида она тилимиз нуфузи ошди, глобаллашув жараёнига мос янги атамалар билан бойиди. 2020 йил 10 апрелда Ўзбекистон Республикасининг “Ўзбек тили байрами кунини белгилаш тўғрисида”ги Қонуни қабул қилиниши муносабати билан эса ҳар йили 21 октябрь “Ўзбек тили байрами куни” сифатида улкан тантана қилинмоқда.
Сана бутун мамлакатимизда бўлгани каби Амударё туманида ҳам кенг нишонланмоқда. 83-сонли мактабда ҳам Ўзбек тили байрами куни муносабати билан октябрь ойи – она тили ва адабиёт фан ойлиги доирасида кўпгина тадбирлар ўтказилмоқда. Хусусан, “Она тилим - ифтихорим” мавзусида синфлар кесимида иншолар танлови, шеърхонлик кечалари, “Она тилида ким хатосиз ёзади” номли диктантлар танлови ўтказилди.
Мактабнинг тажрибали она тили ва адабиёт ўқитувчиларининг очиқ дарслари ташкил этилиб, уларда мактабнинг ёш педагогларидан ташқари ўқувчиларнинг ота-оналари ҳам иштирок этишиб, фарзандларининг ўз она тилини қай даражада ўрганаётганликларига гувоҳ бўлдилар.
19 октябрь куни бўлиб ўтган “Тил – миллат ифтихори” деб номланган адабий кечада мактабнинг 6- ва 8-синфлари ўқувчилари иштирок этишди. Тадбирни она тили ва адабиёт фани ўқитувчилари Гуландом Шомуродова, Муқаддас Аллаберганова, Нилуфар Ортиқова, Фарида Эшчановалар ташкиллаштирдилар.
Дастлаб мавзу юзасидан қизиқарли маъруза ўқилгач, ўқувчилар она тилимизни мадҳ этувчи шеърлар, қўшиқлар ижро этишди. Ўзбек тилида ижод қилиб, унинг бой имкониятлари ва жозибасини ўз ижоди билан кўрсатиб бера олган Алишер Навоийнинг ва бошқа аллома боболаримизнинг ўзбек тили ҳақидаги ибратли гапларини, шеърларини айтдилар. Ўзбек тилида сўзлашиш маданияти ҳақида ўқувчилар намойиш этган саҳна кўриниши жуда таъсирли бўлди.
Шу куни мактаб педагогика жамоаси билан ўқувчиларни ватанпарварлик руҳида тарбиялашда яқин ҳамкорлик қилиб келаётган Давлат хавфсизлик хизматининг Чегара қўшинларига қарашли 9202-ҳарбий қисмида тажрибали ўқитувчи Гуландом Шомуродова ҳарбий хизматчилар ва муддатли ҳарбий хизмат бурчини ўтаётган аскарларга 21 октябрь – ўзбек тили байрами куни муносабати билан шу мавзуда маъруза ўқиди.
Фан ойлиги доирасида ўзбек тили байрами кунига атаб ўтказилган тадбирлар иштирокчиларда улкан таассуротлар қолдирди.
О.РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
