83-sonli maktabda Oʻzbek tili bayrami kuni munosabati bilan tadbirlar oʻtkazildi

Til – millat koʻzgusi. Har qanday millatning hayoti uning ona tilida ham yaqqol namoyon boʻladi. Sobiq ittifoq davrida xalqimizning huquq va  shaʼni, erki toptalgani ona tilimizga qilingan kamsitishlarda ham aks etgani hali koʻpchikning yodida: oʻz ona tilimiz naqadar boy, jozibador va aziz boʻlsa-da, Oʻzbekistonda barcha hujjatlar rus tilida yozilar edi.

Oʻzligimiz, gʻururimiz, shaʼnimiz hisoblangan  ona tilimizga davlat tili maqomi berilgani xalqimizning mustaqillik sari qoʻygan ilk qadami boʻldi.

1989-yil 21-oktyabrda Oʻzbekiston Respublikasining “Davlat tili haqida”gi Qonuni qabul qilinishi xalqimizning koʻp yillik orzulari roʻyobi boʻldi. Chunki Qonun ona tilimizning bor goʻzalligi va jozibasini toʻla namoyon etishi bilan birga, uni ilmiy asosda rivojlantirishga ham keng imkoniyatlar yaratdi.

Oʻtgan davr mobaynida ona tilimiz nufuzi oshdi, globallashuv jarayoniga mos yangi atamalar bilan boyidi. 2020-yil 10-aprelda Oʻzbekiston Respublikasining “Oʻzbek tili bayrami kunini belgilash toʻgʻrisida”gi Qonuni qabul qilinishi munosabati bilan esa har yili  21-oktyabr “Oʻzbek tili bayrami kuni” sifatida ulkan tantana qilinmoqda.

Sana butun mamlakatimizda boʻlgani kabi Amudaryo tumanida ham keng nishonlanmoqda. 83-sonli maktabda ham Oʻzbek tili bayrami kuni munosabati bilan oktyabr oyi – ona tili va adabiyot fan oyligi doirasida koʻpgina tadbirlar oʻtkazilmoqda. Xususan, “Ona tilim - iftixorim” mavzusida sinflar kesimida insholar tanlovi, sheʼrxonlik kechalari, “Ona tilida kim xatosiz yozadi” nomli diktantlar tanlovi oʻtkazildi.

Maktabning tajribali ona tili va adabiyot oʻqituvchilarining ochiq darslari tashkil etilib, ularda maktabning yosh pedagoglaridan tashqari oʻquvchilarning ota-onalari ham ishtirok etishib, farzandlarining oʻz ona tilini qay darajada oʻrganayotganliklariga guvoh boʻldilar.

19-oktyabr kuni boʻlib oʻtgan “Til – millat iftixori” deb nomlangan adabiy kechada maktabning 6- va 8-sinflari oʻquvchilari ishtirok etishdi. Tadbirni ona tili va adabiyot fani oʻqituvchilari Gulandom Shomurodova, Muqaddas Allaberganova, Nilufar Ortiqova, Farida Eshchanovalar tashkillashtirdilar.

Dastlab mavzu yuzasidan qiziqarli maʼruza oʻqilgach, oʻquvchilar ona tilimizni madh etuvchi sheʼrlar, qoʻshiqlar ijro etishdi. Oʻzbek tilida ijod qilib, uning boy imkoniyatlari va jozibasini oʻz ijodi bilan koʻrsatib bera olgan Alisher Navoiyning va boshqa alloma bobolarimizning oʻzbek tili haqidagi ibratli gaplarini, sheʼrlarini aytdilar. Oʻzbek tilida soʻzlashish madaniyati haqida oʻquvchilar namoyish etgan sahna koʻrinishi juda taʼsirli boʻldi.

Shu kuni maktab pedagogika jamoasi bilan oʻquvchilarni vatanparvarlik ruhida tarbiyalashda yaqin hamkorlik qilib kelayotgan Davlat xavfsizlik xizmatining Chegara qoʻshinlariga qarashli 9202-harbiy qismida tajribali oʻqituvchi Gulandom Shomurodova harbiy xizmatchilar va muddatli harbiy xizmat burchini oʻtayotgan askarlarga 21-oktyabr – oʻzbek tili bayrami kuni munosabati bilan shu mavzuda maʼruza oʻqidi.

Fan oyligi doirasida oʻzbek tili bayrami kuniga atab oʻtkazilgan tadbirlar ishtirokchilarda ulkan taassurotlar qoldirdi.

O.RAJABOVA.