1-СОНЛИ МАКТАБДА “ОНА ТИЛИМ – САРЧАШМАНГДАН САРХУШ ДИЛИМ” ДЕБ НОМЛАНГАН АДАБИЙ КЕЧА ЎТКАЗИЛДИ
Октябрь ойи умумтаълим мактабларида она тили ва адабиёт фани ойлиги деб белгилангани муносабати билан Амударё туманидаги ўқув масканларида ўқувчиларни фанга янада қизиқтириш, билим ва кўникмаларини оширишга қаратилган тадбирлар, учрашув ва адабий кечалар, очиқ ўқув машғулотлари ташкил этилмоқда. Ойлик доирасида барча таълим даргоҳларидаги каби 1-сонли мактабда ўтказилаётган тадбирлар ҳам ўқувчиларнинг фанни янада мукаммалроқ ўзлаштиришларида, фаолликларини оширишда муҳим аҳамиятга эга бўлмоқда.
Мактабда бўлиб ўтаётган фан ойлиги доирасида “Она тилим – сарчашмангдан сархуш дилим” деб номланган адабий-бадиий кеча ташкил этилди. Мактаб ўқитувчи ва ўқувчилари томонидан ташкил этилган ушбу кечага тумандаги давлат хавфсизлик хизмати чегара қўшинларига қарашли ҳарбий қисм хизматчилари ҳам ташриф буюришди.
Кечани мактабнинг она тили ва адабиёт фани ўқитувчиси Санобар Муродова очиб берди. У ўтган йилдан бери тил байрами сифатида нишонланаётган ушбу кун билан барчани муборакбод этиб, мамлакатимизда давлат тилини ривожлантириш бўйича амалга оширилаётган ишлар ҳақида сўзлади.
Ойлик доирасида мактабда ўтказилган “Китобни севаман” мавзусидаги давра суҳбати, диктантлар танлови, “Сўз мулкининг султони” мавзусидаги ижодий баён мусобақаси, “Она тилим – ифтихорим” мавзусидаги иншолар танлови, “Жадид адабиёти намояндалари” мавзусидаги китобхонлик кечаси, очиқ ўқув машғулотларини ўтказишда фан ўқитувчиларининг иштироки, ўқувчиларнинг фаолликлари хусусида ҳам гапириб ўтди.
Кеча давомида сўзга чиққанлар тил ҳар бир миллатнинг ўзига хос тимсоли, халқнинг руҳини ва маънавиятини белгиловчи восита эканлигини таъкидлашди. Шунинг учун уни асраб-авайлаш, софлигини сақлаш ва ривожлантиришни ҳар бир фуқаро ўзига бурч деб билиши лозимлигини, Навоий ва Машраб, Бобур ва Муқимий каби даҳолар унинг воситасида ўзларининг улуғвор асарларини яратганлиги, маърифатни кенг тарғиб қилганини эътироф этишди.
Ундан ташқари, ўзбек тилининг тараққий этишида шоирлар билан бир қаторда шоираларнинг ҳам ўрни беқиёслиги тилга олиниб, Жаҳон отин Увайсий, Нодирабегим, Моҳларойим, Дилшоди Барно, Анвар отин Маҳзуна, Зебунисобегим каби ўткир қалам соҳибаларининг номлари эсга олинди ва ижодларига тўхталиб ўтилди.
Шундан сўнг, Нодирабегим саройида миллатимизнинг атоқли шоиралари иштирокида бўлиб ўтган мушоира мактабнинг 9-синф ўқувчилари ижросида саҳна кўринишда намойиш этилди. Улар дастлаб ўзбек тилининг ривожланиш босқичлари, бу эзгу ишга ҳисса қўшган атоқли шоираларнинг ҳаёти ва ижоди ҳақида маълумотлар беришди. Адабиёт ихлосмандлари шоираларнинг ғазаллар, шеърларини ёддан айтишди ва ўз ижролари билан томошабинлар кўз ўнгида юрт тарихини гавдалантириб, томошабинларда катта таассуротлар қолдиришди.
Тадбир давомида мактабнинг 7-синф ўқувчилари она тилимизни мадҳ этувчи шеърларини ифодали ёд айтиб, олқишларга сазовор бўлишди. Шунингдек, 5-синф ўқувчилари эса тилга доир ҳикматли сўзларни талқин этиб, кечага файз киритишди. Ундан ташқари, Ўзбекистон Републикасининг Давлат тили ҳақидаги Қонуни ва бошқа тегишли ҳужжатлар тўғрисида 8-синф ўқувчилари томонидан берилган маълумотлар билимларни янада бойитиб, мустаҳкамлади.
Мароқли ўтган тадбир ўқувчилар ва бошқа иштирокчиларнинг она тилига бўлган қизиқишларини, қалбидаги меҳри, фахру-ифтихор туйғуларини янада оширди.
О.Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
