Давлат фуқаролик хизматчиларининг одоб-ахлоқ қоидаларига риоя қилишларини таъминлаш мақсадида йиғилиш бўлиб ўтди

28 октябрь куни Амударё тумани ҳокимлигининг мажлислар залида Ўзбекистон Республикаси Вазирлар маҳкамасининг “Давлат фуқаролик хизматчилари томонидан одоб-ахлоқ қоидаларига риоя этилишини таъминлаш бўйича қўшимча чора-тадбирлар тўғрисида”ги қарори ижросини таъминлаш мақсадида йиғилиш бўлиб ўтди.

Унда туман ҳокимининг биринчи ўринбосари Рашид Салаев, ҳоким ўринбосарлари, туман Адлия бўлими бошлиғи Мансур Садиков, Адлия бўлимининг Давлат хизматлари маркази бош мутахассиси Бобур Қадамов, ҳокимлик ходимлари ва тегишли муассаса ва ташкилотлар масъуллари иштирок этди.

Йиғилишда давлат хизматчиларининг касбий маданияти, хизмат фаолияти ва хизматдан ташқари вақтда одоб-ахлоқи, ташқи кўриниши ва кийиниш услубининг намунавий қоидалари ҳақида сўз юртилди.

Шунингдек, одоб-ахлоқ қоидаларига риоя қилиш орқали давлат хизматида юксак касбий маданиятни шакиллантиришга, жамоатчилик онгида давлат хизматига бўлган ҳурмат ва ишончнинг оширилишига алоҳида урғу бериб ўтилди.

Йиғилишда ҳокимлик ҳодимлари ўз касбий фаолиятини қонунийлик, Ватанга садоқат ва хизмат вазифасига фидоийлик, юкланган функционал вазифаларни тўлиқ бажариш, ижро интизомига қатъий риоя қилиш, адолатлилик ва холислик принциплари асосида олиб боришлари лозимлиги таъкидланди.

Ундан ташқари, давлат хизматчилари ўзларининг хатти-ҳаракати ва ахлоқи туфайли жамоатчиликнинг танқидига учрамаслик чораларини кўриши, танқид учун таъқибга йўл қўймаслиги, асосли ва конструктив танқиддан ўз фаолиятидаги камчиликлар ҳамда нуқсонларни бартараф этиш йўлида фойдаланиши лозимлиги айтиб ўтилди.

Шундан сўнг, туман Адлия бўлими Давлат хизматлари маркази бош мутахассиси Бобур Қадамов давлат хизматчилари томонидан одоб-ахлоқ қоидаларига риоя этмаганлик ҳолати уларга нисбатан ахлоқий ва интизомий таъсир чораларини қўллаш учун асос бўлишини, одоб-ахлоқ комиссияси давлат хизматчисига нисбатан интизомий таъсир чорасини қўллаш учун давлат органлари ва ташкилотлари раҳбарига тақдимнома киритиши мумкинлигини эслатиб ўтди.

Шу билан бирга одоб-ахлоқ комиссиясининг вазифалари, комиссия таркиби, уларга юклатилган вазифалар ҳусусида ҳам тўхталиб ўтилди.

Қайд этилганидек, давлат корхона ва ташкилотларида тузилган одоб-ахлоқ комиссияси аъзолари қарорлар тайёрлаш муҳокамасида, қабул қилинишида шунингдек, уларнинг амалга оширилишини ташкил этишда ва бажарилишини назорат қилишда иштирок этади.

Йиғилиш якунида туман ҳокимининг биринчи ўринбосари Рашид Салаев туман ҳокимлигининг одоб-ахлоқ комиссиясининг 7 нафар аъзосидан иборат шахсий таркиби билан барчани таништириб ўтди.

Шу ўринда айтиш керакки, давлат фуқаролик хизматчиларининг одоб-ахлоқ қоидаларига қатъий риоя қилишлари уларнинг касбий маданияти юксаклигидан ва ўз хизмат вазифасига садоқатидан далолат беради.

Туман ҳокимлигининг Ахборот хизмати.