Davlat fuqarolik xizmatchilarining odob-axloq qoidalariga rioya qilishlarini taʼminlash maqsadida yigʻilish boʻlib oʻtdi

28-oktyabr kuni Amudaryo tumani hokimligining majlislar zalida Oʻzbekiston Respublikasi Vazirlar mahkamasining “Davlat fuqarolik xizmatchilari tomonidan odob-axloq qoidalariga rioya etilishini taʼminlash boʻyicha qoʻshimcha chora-tadbirlar toʻgʻrisida”gi qarori ijrosini taʼminlash maqsadida yigʻilish boʻlib oʻtdi.

Unda tuman hokimining birinchi oʻrinbosari Rashid Salayev, hokim oʻrinbosarlari, tuman Adliya boʻlimi boshligʻi Mansur Sadikov, Adliya boʻlimining Davlat xizmatlari markazi bosh mutaxassisi Bobur Qadamov, hokimlik xodimlari va tegishli muassasa va tashkilotlar masʼullari ishtirok etdi.

Yigʻilishda davlat xizmatchilarining kasbiy madaniyati, xizmat faoliyati va xizmatdan tashqari vaqtda odob-axloqi, tashqi koʻrinishi va kiyinish uslubining namunaviy qoidalari haqida soʻz yurtildi.

Shuningdek, odob-axloq qoidalariga rioya qilish orqali davlat xizmatida yuksak kasbiy madaniyatni shakillantirishga, jamoatchilik ongida davlat xizmatiga boʻlgan hurmat va ishonchning oshirilishiga alohida urgʻu berib oʻtildi.

Yigʻilishda hokimlik hodimlari oʻz kasbiy faoliyatini qonuniylik, Vatanga sadoqat va xizmat vazifasiga fidoiylik, yuklangan funktsional vazifalarni toʻliq bajarish, ijro intizomiga qatʼiy rioya qilish, adolatlilik va xolislik printsiplari asosida olib borishlari lozimligi taʼkidlandi.

Undan tashqari, davlat xizmatchilari oʻzlarining xatti-harakati va axloqi tufayli jamoatchilikning tanqidiga uchramaslik choralarini koʻrishi, tanqid uchun taʼqibga yoʻl qoʻymasligi, asosli va konstruktiv tanqiddan oʻz faoliyatidagi kamchiliklar hamda nuqsonlarni bartaraf etish yoʻlida foydalanishi lozimligi aytib oʻtildi.

Shundan soʻng, tuman Adliya boʻlimi Davlat xizmatlari markazi bosh mutaxassisi Bobur Qadamov davlat xizmatchilari tomonidan odob-axloq qoidalariga rioya etmaganlik holati ularga nisbatan axloqiy va intizomiy taʼsir choralarini qoʻllash uchun asos boʻlishini, odob-axloq komissiyasi davlat xizmatchisiga nisbatan intizomiy taʼsir chorasini qoʻllash uchun davlat organlari va tashkilotlari rahbariga taqdimnoma kiritishi mumkinligini eslatib oʻtdi.

Shu bilan birga odob-axloq komissiyasining vazifalari, komissiya tarkibi, ularga yuklatilgan vazifalar hususida ham toʻxtalib oʻtildi.

Qayd etilganidek, davlat korxona va tashkilotlarida tuzilgan odob-axloq komissiyasi aʼzolari qarorlar tayyorlash muhokamasida, qabul qilinishida shuningdek, ularning amalga oshirilishini tashkil etishda va bajarilishini nazorat qilishda ishtirok etadi.

Yigʻilish yakunida tuman hokimining birinchi oʻrinbosari Rashid Salayev tuman hokimligining odob-axloq komissiyasining 7 nafar aʼzosidan iborat shaxsiy tarkibi bilan barchani tanishtirib oʻtdi.

Shu oʻrinda aytish kerakki, davlat fuqarolik xizmatchilarining odob-axloq qoidalariga qatʼiy rioya qilishlari ularning kasbiy madaniyati yuksakligidan va oʻz xizmat vazifasiga sadoqatidan dalolat beradi.

Tuman hokimligining Axborot xizmati.