СТОЛ ТЕННИСИ БЎЙИЧА “МАҲАЛЛА КУБОГИ” ТУРНИРИНИНГ ТУМАН БОСҚИЧИ ҒОЛИБЛАРИ АНИҚЛАНДИ

Мамлакатимизда ёшларни спортга жалб этиш, соғлом турмуш тарзини тарғиб қилиш борасида амалга оширилаётган чора-тадбирлар, ёшлар учун яратилаётган шароит ва имкониятлар уларнинг истеъдодларини юзага чиқаришлари, турли спорт мусобақаларида қатнашиб, фахрли ўринларни эгаллашларида муҳим ўрин тутмоқда. Айниқса, Давлатимиз раҳбарининг “Соғлом турмуш тарзини кенг татбиқ этиш ва оммавий спортни янада ривожлантириш чора-тадбирлари тўғрисида”ги Фармони чекка қишлоқларда ҳам ёшларни оммавий спорт турларига жалб этишда алоҳида аҳамият касб этмоқда.

Шу йил 5 ноябрь куни мазкур Фармон ижроси доирасида Амударё туманида ҳам Спорт мактабининг Чордара маҳалласидаги филиали биносида “Маҳалла” хайрия жамоат фонди туман бўлинмаси ташаббуси билан 13-16 ёшдаги маҳалла ўсмир жамоалари ўртасида стол тенниси бўйича “Маҳалла кубоги” турнирининг туман босқичи мусобақалари ташкил этилди. Унда 49 та овул ва маҳаллалардан келган 100 нафарга яқин ўсмир ёшлардан ташкил қилинган жамоалар қатнашишди. Таъкидлаш жоизки, турнирнинг 1-босқичи, яъни маҳалла босқичида 150 дан ортиқ жамоалардаги 300 нафарга яқин ўсмир ўғил-қизлар ўз омадларини синаб кўрган эдилар.

Маълумки, маҳаллаларда оммавий спортни янада ривожлантириш, ёшларни жисмонан соғлом ва маънан баркамол қилиб тарбиялаш мақсадида стол тенниси бўйича “Маҳалла кубоги” Амударё туман турнири мусобақаcини ўтказиш бўйича Ўзбекистон “Маҳалла” хайрия жамоат фонди Амударё туман бўлинмаси, Спортни ривожлантириш бўлими, Маданият бўлими, Халқ таълими бўлими, Ички ишлар бўлими, Миллий гвардия ҳузуридаги қўриқлаш бўлими, Тиббиёт бирлашмаси ва Ёшлар ишлари агентлиги туман бўлими ҳамкорлигида жорий йил 5 октябр куни қўшма қарор қабул қилинган эди. Шунга кўра стол тенниси бўйича “Маҳалла кубоги” турнири мусобақалари тўрт босқичда ўтказиш режалаштирилди. Биринчи босқич мусобақалари 10 октябрдан 20 октябрга қадар маҳаллаларда бўлиб ўтди. Иккинчи босқич мусобақалари 20 октябрдан 15 ноябрга қадар туманда ўтказилиши белгиланган бўлиб, ҳозирги кунда давом этмоқда. Режага кўра туман, яъни учинчи босқич ғолиблари 15 ноябрдан 30 ноябрга қадар Қорақалпоғистон Республикаси бўйича финал ўйинларида қатнашишига йўлланма берилиши белгиланган.

Стол тенниси бўйича “Маҳалла кубоги” туман босқичида иштирок этган жамоалар ўзларининг абжирликлари ва чаққонликларини, мураббийларидан ўрганган спорт маҳоратларини намойиш этишди ва ғолиб бўлишга ҳаракат қилишди. Қизғин ўтган мусобақалар давомида фахрли 3-ўринни Ўрта қалъа овулдан Зафар Султанов, Шаҳзода Раҳматуллаевалар ҳамда Арна бўйи маҳалласидан Баҳовуддин Файзуллаев, Гулирайҳон Хидирбоевалар жамоалари эгаллади. Қиличбой овул жамоасидаги ўсмир-ёшлар Шаҳзод Аминов ва Лобар Жумабоевалар 2-ўринни эгалладилар. Шунингдек, Бой овул маҳалласи жамоаси аъзолари Дилшодбек Бозорбоев ва Ирода Қурбонбоевалар фахрли 1-ўринни эгалладилар ҳамда турнирнинг Қорақалпоғистон Республикаси босқичига йўлланма олдилар.

Тақдирлаш маросимида мусобақа ғолиблари ва совриндорларига “Маҳалла” хайрия жамоат фонди туман бўлинмасининг диплом ва эсдалик совғалари топширилди.

Б.Болтабоев, “Маҳалла” хайрия жамоат фонди Амударё туман бўлинмаси раиси.