STOL TENNISI BOʻYIChA “MAHALLA KUBOGI” TURNIRINING TUMAN BOSQIChI GʻOLIBLARI ANIQLANDI

Mamlakatimizda yoshlarni sportga jalb etish, sogʻlom turmush tarzini targʻib qilish borasida amalga oshirilayotgan chora-tadbirlar, yoshlar uchun yaratilayotgan sharoit va imkoniyatlar ularning isteʼdodlarini yuzaga chiqarishlari, turli sport musobaqalarida qatnashib, faxrli oʻrinlarni egallashlarida muhim oʻrin tutmoqda. Ayniqsa, Davlatimiz rahbarining “Sogʻlom turmush tarzini keng tatbiq etish va ommaviy sportni yanada rivojlantirish chora-tadbirlari toʻgʻrisida”gi Farmoni chekka qishloqlarda ham yoshlarni ommaviy sport turlariga jalb etishda alohida ahamiyat kasb etmoqda.

Shu yil 5-noyabr kuni mazkur Farmon ijrosi doirasida Amudaryo tumanida ham Sport maktabining Chordara mahallasidagi filiali binosida “Mahalla” xayriya jamoat fondi tuman boʻlinmasi tashabbusi bilan 13-16 yoshdagi mahalla oʻsmir jamoalari oʻrtasida stol tennisi boʻyicha “Mahalla kubogi” turnirining tuman bosqichi musobaqalari tashkil etildi. Unda 49 ta ovul va mahallalardan kelgan 100 nafarga yaqin oʻsmir yoshlardan tashkil qilingan jamoalar qatnashishdi. Taʼkidlash joizki, turnirning 1-bosqichi, yaʼni mahalla bosqichida 150 dan ortiq jamoalardagi 300 nafarga yaqin oʻsmir oʻgʻil-qizlar oʻz omadlarini sinab koʻrgan edilar.

Maʼlumki, mahallalarda ommaviy sportni yanada rivojlantirish, yoshlarni jismonan sogʻlom va maʼnan barkamol qilib tarbiyalash maqsadida stol tennisi boʻyicha “Mahalla kubogi” Amudaryo tuman turniri musobaqacini oʻtkazish boʻyicha Oʻzbekiston “Mahalla” xayriya jamoat fondi Amudaryo tuman boʻlinmasi, Sportni rivojlantirish boʻlimi, Madaniyat boʻlimi, Xalq taʼlimi boʻlimi, Ichki ishlar boʻlimi, Milliy gvardiya huzuridagi qoʻriqlash boʻlimi, Tibbiyot birlashmasi va Yoshlar ishlari agentligi tuman boʻlimi hamkorligida joriy yil 5-oktyabr kuni qoʻshma qaror qabul qilingan edi. Shunga koʻra stol tennisi boʻyicha “Mahalla kubogi” turniri musobaqalari toʻrt bosqichda oʻtkazish rejalashtirildi. Birinchi bosqich musobaqalari 10-oktyabrdan 20-oktyabrga qadar mahallalarda boʻlib oʻtdi. Ikkinchi bosqich musobaqalari 20-oktyabrdan 15-noyabrga qadar tumanda oʻtkazilishi belgilangan boʻlib, hozirgi kunda davom etmoqda. Rejaga koʻra tuman, yaʼni uchinchi bosqich gʻoliblari 15-noyabrdan 30-noyabrga qadar Qoraqalpogʻiston Respublikasi boʻyicha final oʻyinlarida qatnashishiga yoʻllanma berilishi belgilangan.

Stol tennisi boʻyicha “Mahalla kubogi” tuman bosqichida ishtirok etgan jamoalar oʻzlarining abjirliklari va chaqqonliklarini, murabbiylaridan oʻrgangan sport mahoratlarini namoyish etishdi va gʻolib boʻlishga harakat qilishdi. Qizgʻin oʻtgan musobaqalar davomida faxrli 3-oʻrinni Oʻrta qalʼa ovuldan Zafar Sultanov, Shahzoda Rahmatullayevalar hamda Arna boʻyi mahallasidan Bahovuddin Fayzullayev, Gulirayhon Xidirboyevalar jamoalari egalladi. Qilichboy ovul jamoasidagi oʻsmir-yoshlar Shahzod Aminov va Lobar Jumaboyevalar 2-oʻrinni egalladilar. Shuningdek, Boy ovul mahallasi jamoasi aʼzolari Dilshodbek Bozorboyev va Iroda Qurbonboyevalar faxrli 1-oʻrinni egalladilar hamda turnirning Qoraqalpogʻiston Respublikasi bosqichiga yoʻllanma oldilar.

Taqdirlash marosimida musobaqa gʻoliblari va sovrindorlariga “Mahalla” xayriya jamoat fondi tuman boʻlinmasining diplom va esdalik sovgʻalari topshirildi.

B.Boltaboyev, “Mahalla” xayriya jamoat fondi Amudaryo tuman boʻlinmasi raisi.