ФАХРИЙ ЎҚИТУВЧИНИНГ 80 ЙИЛЛИГИ МУНОСАБАТИ БИЛАН ВОЛЕЙБОЛ МУСОБАҚАСИ ЎТКАЗИЛДИ

Ўқитувчилик дунёдаги энг эъзозли, шарафли ва машаққатли касбдир. Инсонни мурғаклигидан илм дунёси сари етаклаб, комиллик сари йўналтирувчи касб эгалари ҳар қанча ҳурмат-у эҳтиромларга лойиқдир.

Амударё туманидаги 11-сонли мактабда 40 йил жисмоний тарбия фани ўқитувчиси бўлиб ишлаб, кўплаб шогирдлар етиштирган, туманимизда спортнинг волейбол тури ривожига муносиб ҳисса қўшган Гулмирза Собиров ана шундай, эл эъзозидаги инсонларнинг бири.

Яқинда Қипчоқдаги 1-сонли касб-ҳунар мактабида фахрий ўқитувчи Гулмирза Собировнинг 80 йиллигига бағишлаб волейбол бўйича мусобақа ташкил этилди.

Дарёбўйи маҳалласи ёшлар етакчиси Шаҳло Ўрозбоева ташаббуси билан ташкил этилган мусобақада Дарёбўйи, Уйшин маҳаллалари, Қипчоқ, Чойкўл, Қангли овуллари ёшларининг 5 та волейбол жамоалари ўзаро куч синашиш учун йиғилдилар.

Тадбирда Гулмирза Собировнинг 80 йиллиги муносабати билан Дарёбўйи маҳалласи ёшлар етакчиси Шаҳло Ўрозбоева, 22-сонли мактабнинг жисмоний тарбия фани ўқитувчиси Шавкат Нурекеев, 65-сонли мактаб ўқитувчиси Санжар Ўрозбоев, Бештом маҳалла фуқаролар йиғини раиси Озод Сийтимов, Қипчоқ шаҳарча фуқаролар йиғини раиси Нураддин Холбоевлар устоз ўқитувчи ҳақида йиғилганларга илиқ хотираларини гапириб бердилар. Ҳудуд аҳолиси орасида ўз меҳнатлари билан улкан эътибор қозонган фахрий муаллимнинг таълим беришдаги фидойиликлари, ўзига хос услублари тилга олинди.

Мусобақалар бошланишига старт берилиши барча йиғилганларнинг диққат-эътиборини ўйин майдонига жамлади. Бешта жамоа аъзолари ҳам ғолиблик учун астойдил интилиб, ҳамжиҳатликда муросасиз курашдилар. Маҳоратли ва тажрибали жисмоний тарбия ўқитувчилари мусобақани одиллик билан бошқариб бордилар.

Мусобақа якунлангач, ташкилочилар – Гулмирза Собировнинг бир гуруҳ шогирдлари уни табаррук ёши билан қутлаш учун хонадонига ташриф буюришди. Нуроний устозга халқимизнинг миллий кийими – чопон кийдириб, совға-саломлар ҳадя этишди.

Фарзандлари, невара-чеваралари ардоғида кексалик гаштини суриб яшаётган Гулмирза Собиров ўзининг 80 йиллиги муносабати билан мусобақа уюштиришга бош бўлган маҳалла ёшлари етакчиси Шаҳло Ўрозбоевага, йўқлаб келган барча шогирдларига миннатдорчилик билдирди.

Шуни алоҳида эътироф этиш керакки, фахрий муаллим 40 йил мобайнида мактабда ўқувчиларнинг соғлом, жисмонан бақувват бўлиб вояга етишлари учун фидойилик қилиш билан бирга, намунали оила соҳиби сифатида турмуш ўртоғи билан фарзандларини ҳам одобли, эл хизматига камарбаста қилиб вояга етказдилар. Унинг барча фарзандлари ота касбини эъзозлаб, турли мактабларда ёш авлодга таълим-тарбия беришаяпти.

Устоз атрофида жам бўлган собиқ шогирдлар булар ҳақда, ўзларининг ҳаётида Гулмирза Собировдан олган сабоқларининг нечоғлик аҳамиятли бўлганлиги ҳақида суҳбат қурдилар. Хотиралар тилга кирган лаҳзаларда “Устоз отангдай улуғ” деган халқимизнинг нақли яна бир бор ўз ифодасини топгандай бўлди.

Ойгул РАЖАБОВА.