ЎҚУВЧИ-ЁШЛАР ЎРТАСИДА “КОНСТИТУЦИЯ БИЛИМДОНИ” КЎРИК-ТАНЛОВИ БЎЛИБ ЎТДИ

Бош қомусимиз бўлмиш Конституциямизнинг мазмун-моҳиятини билиш, ундаги моддаларни ўрганиш ҳар бир юртдошимизнинг фуқаролик бурчи ҳисобланади. Амалдаги қонунларимизнинг жамиятимизда, айниқса, ёшлар орасида кенг тарғиб қилиниши уларнинг ҳуқуқий саводхонлигини оширишда, жамоатчилик назорати шаклланишида ҳамда мамлакатимизда қонун устуворлиги таминланишида муҳим ўрин тутади.

12 ноябрь куни Президент таълим муассасалари агентлиги тизимидаги Амударё туман ихтисослаштирилган мактабида “Адолат” социал демократик партиясининг Амударё туман Кенгаши томонидан “Ватан келажаги ёшлар қўлида” лойиҳаси доирасида ташкил этилган “Конституция билимдони” кўрик-танловининг туман босқичи бўлиб ўтди.

Тадбирда Ўзбекистон “Адолат” социал демократик партияси туман Кенгаши раиси Ўктам Йўлдошев сўзга чиқди ва бу каби танловлар ёшларнинг ҳуқуқий ва сиёсий билимларини юксалтириш, уларни Ўзбекистон Республикаси Конституцияси ва амалдаги бошқа қонун ҳужжатларига ҳурмат руҳида тарбиялаш, ёшларнинг фаол фуқаролик позициясини янада мустаҳкамлашда алоҳида аҳамият касб этишини таъкидлаб ўтди.

Шунингдек, Ўзбекистон “Адолат” социал-демократик партияси давлат сиёсатини қўллаб-қувватлаган ҳолда ижтимоий адолат, қонун устуворлиги ва барча фуқароларнинг қонун олдида тенглиги, конституциявий ҳуқуқ ҳамда эркинликларини таъминлаш, жамиятда, айниқса, ёшлар орасида ҳуқуқий маданиятни шакллантиришни ўз устувор вазифаларидан деб белгилаганлигини алоҳида эътироф этди.

Шундан сўнг, иштирокчиларни адолатли баҳолаш ва жараённи назорат қилиб борилишини таъминлаш мақсадида танлов низомига кўра ҳакамлар ҳайъати сайлаб олинди. Ҳайъат аъзолигига партия фракциясидан Халқ депутатлари туман Кенгаши депутати Мансур Ўрозбоев, “Адолат” социал-демократик партияси туман Кенгаши раиси Ўктам Йўлдошев, партиянинг хотин-қизлар қаноти раиси Насиба Ҳайитмуродова, Янгиобод маҳалла фуқаролар йиғини ёшлар етакчиси Фаррух Қодирбергановлар бир овоздан маъқулланди.

Танловда Президент таълим муассасалари агентлиги тизимидаги Амударё туман ихтисослаштирилган мактабининг 11-синф ўқувчиси Асалой Бахтиёрова, Амударё муҳандислик технукумининг 2-курс талабаси Шаҳло Ибодуллаева, 40-сонли мактабнинг 11-синф ўқувчиси Ширин Шариповалар ғолиблик учун тенгдошлари билан ўзаро баҳсга киришишди.

Танлов низомига асосан иштирокчиларнинг билимлари “Танишув”, “Савол-жавоб” ҳамда “Эркин мавзу” шартлари асосида баҳолаб борилди.

Жараён давомида ёшлар махсус тайёрланган саволларга батафсил жавоб беришди ва Ўзбекистон Республикаси Конституцияси ҳамда амалдаги Қонун ҳужжатларидан хабардорлигини, сиёсий-ҳуқуқий билимларини намоён этишди.

Кўрик-танлов иштирокчилари ўз чиқишларида Конституция ва қонунларни билган киши ўз хатти-ҳаракатини қонун доирасида амалга оширишини, бошқаларнинг ҳамда жамият ва давлатнинг ҳуқуқ ва эркини ҳурмат қилишини қайд этишди.

Ҳакамлар ҳайъатининг якуний хулосаларига кўра 40-сонли мактабнинг 11-синф ўқувчиси Ширин Шарипова 1-ўрин, Амударё муҳандислик техникумининг 2-курс талабаси Шаҳло Ибодуллаева 2-ўрин, Президент таълим муассасалари агентлиги тизимидаги Амударё туман ихтисослаштирилган мактабининг 11-синф ўқувчиси Асалой Бахтиёрова 3-ўринни эгаллади. Иштирокчилар фахрий ёрлиқ ҳамда эсдалик совғалари билан тақдирланди. Танловда 1-ўринни қўлга киритган Ширин Шариповага Қорақалпоғистон Республикаси босқичига йўлланма берилди.

Партия томонидан анъанавий тарзда ўтказиб келинаётган “Конституция билимдони” кўрик-танлови ўқувчи-ёшларнинг ҳуқуқий саводхонлигини ошириш билан бирга уларни Конституциянинг ҳар бир моддасини уқиб олишга, мазмунан англашга ундаши билан аҳамиятлидир.

Шоҳзод Қурбонбоев, ҚДУ талабаси.