КОНСТИТУЦИЯМИЗНИНГ 30 ЙИЛЛИК БАЙРАМИ КЕНГ НИШОНЛАНДИ

Юртимизда ҳар йили 8 декабрь – Ўзбекистон Республикаси Конституцияси қабул қилинган кун умумхалқ байрами сифатида кенг нишонланади. Бу йил Конституциямиз қабул қилинганига 30 йил тўлди.

Ўтган давр мобайнида давлатимизнинг халқаро майдонда ўз ўрнини топиши, барча соҳаларда кенг кўламли ислоҳотларни амалга ошириш ва юксак марраларга эришиш, халқимиз учун ҳеч кимдан кам бўлмаган фаровон ҳаёт барпо этишда асосий қонунимиз – Ўзбекистон Республикаси Конституцияси мустаҳкам ҳуқуқий асос бўлиб хизмат қилди.

Амударё туманида ҳам Бош Қомусимизнинг 30 йиллиги кенг нишонланиб, сана муносабати билан “Конституция – қомусимиз” деб номланган катта тадбир ўтказилди.

7 декабрь куни туман Маданият марказининг концертлар залида бўлиб ўтган тадбирда туман ҳокими Султонбой Йўлдошев, секторлар раҳбарлари, ҳоким ўринбосарлари ва тегишли давлат органлари масъуллари, депутатлар, кенг жамоатчилик вакиллари қатнашди.

Тадбирда туман ҳокими Султонбой Йўлдашев нутқ сўзлаб, барчани байрам билан табриклади. Туман ҳокими Конституцияга таянган ҳолда Президентимиз раҳбарлигида Янги Ўзбекистонни барпо этиш бўйича кенг кўламли ислоҳотлар амалга оширилаётгани, ўтган йиллар давомида давлатимиз ва жамиятимиз ҳаётида жуда катта янгиланишлар рўй бераётгани, Асосий Қонунимизда белгиланганидек, халқ манфаатининг ҳамма нарсадан устунлиги, эркинлик ва очиқлик, қонун устуворлиги тамойиллари нафақат Конституциямизда, балки амалда ҳам давлатимиз сиёсатининг асосий йўналишига айлангани хусусида сўзлади.

Тадбир давомида турли соҳаларда меҳнат қилиб, туманнинг ижтимоий-иқтисодий ривожига муносиб ҳисса қўшиб келаётган бир қатор фидойиларга “Конституциянинг 30 йиллиги” кўкрак нишони тантанали равишда топширилди.

Дарҳақиқат, Конституциямиздаги “Халқ давлат ҳокимиятининг бирдан-бир манбаидир” деган тамойилдан келиб чиқиб аҳоли билан доимий мулоқот қилиш давлат идораларининг бош вазифаси этиб белгиланди. Давлат органлари раҳбарлари фуқаролар олдида ҳисобот берадиган, уларнинг муаммоларини тинглаб, ҳал қиладиган самарали тизим йўлга қўйилди. Давлат органлари фаолиятида очиқлик ва ошкоралик амалда таъминланиб, муҳим қарор ва қонунлар лойиҳалари муҳокамаларида фуқароларимиз ҳам фаол иштирок этмоқда. Бюджет маблағларидан фойдаланиш, давлат харидлари ва бошқа кўплаб масалалар бўйича муҳим кўрсаткичлар жамоатчиликка очиқ тақдим қилинмоқда.

Юртимизда аҳолининг эҳтиёжманд қатламларини ҳимоя қилиш, камбағалликни қисқартириш, ҳудудларни изчил ривожлантириш борасида тизимли ишлар қилинмоқда. Шу мақсадда жорий этилган “Темир дафтар”, “Аёллар дафтари”, “Ёшлар дафтари”, шунингдек “маҳаллабай” ва “хонадонбай” ишлаш тизимлари бугунги кунга келиб дастлабки ижобий натижаларини бермоқда.

Туманимизда ҳам ижтимоий ҳимоя дафтарларига киритилган жами 602 нафар ишсиз фуқарога жорий йил бошидан бери 2,4 млрд. сўмлик субсидиялар ажратилиб, бандлиги таъминланди. “Оилавий тадбиркорликни ривожлантириш” дастури доирасида 3 090 нафар фуқарога салкам 51 млрд. сўмлик кредитлар ажратилди.

Биргина “Инсон қадрини улуғлаш ва фаол маҳалла йили” деб эълон қилинган жорий йилда жами 77 та объектларда 112,3 млрд. сўмлик қурилиш-таъмирлаш ишлари амалга оширилмоқда. Буларнинг барчаси Конституциямизда белгилаб қўйилган инсонпарвар тамойилларнинг ҳаётий ифодасидир.

Тадбирнинг тантанали қисми якунланганидан сўнг, туман Маданият бўлими томонидан тайёрланган концерт дастури намойиш этилди. Дастур давомида ижро этилган Ватан, тинчлик ва инсон қадри ҳақидаги шеър ҳамда қўшиқлар, ёш ҳаваскорлар ижросидаги дилрабо рақслар тадбирга янада файз киритди ва барчага кўтаринки кайфият бахш этди.

Туман ҳокимлигининг Ахборот хизмати.