“МЕҲР ҲАРАКАТИ” ДОИРАСИДА КАМ ТАЪМИНЛАНГАН ОИЛАЛАР ФАРЗАНДЛАРИГА ҚИШКИ КИЙИМ-КЕЧАКЛАР ТАРҚАТИЛДИ
Шу кунларда юртимизда “Меҳр ҳаракати” доирасида кам таъминланган, эҳтиёжманд оилалар ҳолидан хабар олиниб, уларга зарур бўлган уй-рўзғор буюмлари, кийим-кечаклар, озиқ-овқат маҳсулотлари берилмоқда. Ҳаракат доирасида Амударё тумани Маҳалла ва нуронийларни қўллаб-қувватлаш бўлими биносида “Маҳалла” хайрия жамоат фонди маблағлари ҳисобидан умумтаълим мактабларида таълим олувчи кам таъминланган оилалар фарзандларига қишки кийим-кечаклар берилди.
13 декабрь куни ўтказилган тадбирда туман ҳокими Султонбой Йўлдашев ҳамда секторлар раҳбарлари, Халқ таълими бўлими масъуллари ва умумтаълим мактаблари директорлари иштирок этдилар. Тадбирда туманимиз мактабларида таълим-тарбия олаётган кам таъминланган ва боқувчисини йўқотган, эҳтиёжманд оилаларнинг 95 нафар фарзандларига қишки кийим-кечаклар тарқатилди.
Маълумки, Вазирлар Маҳкамасининг 1997 йил 20 августдаги “Ўқитувчилар ва ўқувчилар моддий шароитини яхшилашга оид қўшимча чора-тадбирлар тўғрисида” ҳамда 2002 йил 25 январдаги “Аҳолининг ижтимоий ҳимояга муҳтож қатламларини аниқ йўналтирилган тарзда қўллаб-қувватлашнинг 2002-2003 йилларга мўлжалланган дастурини амалга ошириш чора-тадбирлари тўғрисида” тегишли қарорларида кам таъминланган оилаларга мансуб ўқувчиларни бепул қишки кийим-бош тўплами билан таъминлаш белгиланган. Шунга кўра бундай ўқувчилар рўйхати мактаб раҳбари ва ота-оналар қўмитаси томонидан аниқланиб, шакллантирилган рўйхат бўйича қишки кийим-кечаклар тарқатилиб келинмоқда.
Ундан ташқари, мазкур қарорга мувофиқ кўмакка муҳтож оилаларнинг болаларини қишки кийим-бош, мактаб формаси ва ўқув қуроллари билан таъминлаш мақсадида “Темир дафтар”га киритилган, боқувчисини йўқотган ва ногиронлиги бўлган 16 ёшга тўлмаган болаларга бир марталик ёрдам пули берилди. Ушбу моддий ёрдам билан тумандаги муҳтож оилалардаги болалар қамраб олинади. Шунингдек, боқувчисини йўқотган оилалардаги ва ногиронлиги бўлган 16 ёшга тўлмаган болалар рўйхати шакллантирилиб, пенсия ва нафақаларига қўшиб берилди.
Таъкидлаш жоизки, юртимизда “Янги Ўзбекистон Тараққиёт стратегияси”да ижтимоий адолат тамойили асосида аҳолининг ёрдамга муҳтож қатламларини қўллаб-қувватлаш ва камбағалликни бартараф этиш давлат сиёсатининг устувор йўналиши этиб белгиланган. Аслида бу халқимизга хос инсонпарварлик тамойилининг амалдаги ифодасидир. Охирги йилларда эътиборга муҳтож аҳоли қатламига ғамхўрлик кўрсатиш бўйича янги тизим яратилди.
Тадбирда ушбу эзгу ишларни давом эттириш, юртимиздаги меҳр-оқибат муҳитини мустаҳкамлашга қаратилган янада кенг имкониятлар хусусида сўз юритилди. Шунингдек, болалар ўзларига топширилган қишки кийим-кечаклар тўпламидан иборат бўлган совғаларни мамнуният билан қабул қилдилар. Тадбирда иштирок этган ота-оналар ҳам давлатимизнинг мурувват ёрдами ғамхўрликлари, эътиборидан мамнун эканлигини билдирдилар.
О.Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
