Янги йил ярмаркаси: арзон ва сифатли маҳсулотлар харидидан халқ мамнун

Юртимизда турли байрамлар олдидан аҳолига арзон нархларда сифатли қишлоқ хўжалиги ва озиқ-овқат маҳсулотлари етказиб бериш анъанага айланган. Сабаби, байрамлар арафасида истеъмол бозорларида озиқ-овқат маҳсулотларига талаб ошиши туфайли “олибсотарлар” томонидан нархларни сунъий ошириб юбориши ҳолатлари учраб туради.

 Мана шундай ҳолатларнинг олдини олиш, аҳолини зарур бўлган биринчи даражали озиқ-овқат маҳсулотлари билан тўлиқ таъминлаш, нархлар барқарорлигини сақлаш мақсадида ҳар йили Республикамизнинг барча туман, шаҳар марказларида озиқ-овқат ярмаркалари ташкил этилади.

Амударё туманида ҳам шу йилнинг 1 декабрь кунидан бошлаб “Манғит Деҳқон бозори” маъсулияти чекланган жамиятида озиқ-овқат ярмаркалари ташкил этилди.

Ярмаркада аҳолига қулай хизмат кўрсатиш учун барча шароитлар яратилган.  Жумладан, сотувчиларнинг озиқ-овқат ва қишлоқ хўжалиги маҳсулоталарини сотишлари учун тегишли расталар, совутгичлар, тарозилар ва маҳсулотларни сақлаш учун омборхоналар ажратилиб, ташкил этилган ярмарка савдосига жалб этилган тадбиркорлик субъектлари тўлов терминаллари ва назорат касса машиналари билан тўлиқ таъминланган.

Аҳамиятлиси, озиқ-овқат ярмаркасида фермер ва деҳқонларга ўз маҳсулотларини пештахталарни ижарага олмаган ҳолда харидорларга тўғридан-тўғри сотиш имконияти берилган.

Ушбу ярмаркаларда 30 турдаги озиқ-овқат маҳсулотлари, жумладан, фермер хўжаликлари томонидан етказиб берилаётган қорамол, қўй, товуқ гўштлари, тухум ва сут маҳсулотлари, мева-чева, полиз ва сабзавот, шунингдек, қандолатчилик, корхоналарнинг бошқа турдаги маҳсулотлари истисно тариқасида, ишлаб чиқариш баҳоларида сотилмоқда.

Бозорга киритилаётган барча турдаги озиқ-овқат ва қишлоқ хўжалиги маҳсулотлари санитария лабораториялари ходимлари текширувдан ўтказилиб, сотишга рухсат берилмоқда.

Бозор расталари ва дўкон пештахталари сархил неъматлар билан тўлдирилганидан туманимиз аҳолиси мамнун бўлиб, байрамга ўзгача тайёргарлик кўришмоқда.

Тадбиркорларнинг фидойи меҳнатлари самараси бўлган қандоланчилик маҳсулотлари, янги йил дастурхонлари учун махсус тайёрланган турли хил тортлар, Янги йил арчаси безак-ўйинчоқлари нархининг ҳамёнбоплиги харидорларга манзур бўлмоқда.

Ушбу ярмаркалар халқимизга деҳқон ва соҳибкорларнинг, тадбиркорларнинг ҳақиқий байрам туҳфаси бўлди.

Янги йил байрамини барча ўзгача қувонч билан қарши олади, тўкин дастурхон атрофида кириб келаётган йилнинг хайрли бўлишини тилаб дуолар қилади. “Манғит деҳқон бозори” маъсулияти чекланган жамияти ва тегишли назорат органлари билан ҳамкорликда ташкил этилган озиқ-овқат маҳсулотлари ярмаркаси юртдошларимизнинг байрам шодлигига шодлик қўшиши шабҳасиз.

Ярмарка 2023 йилнинг 5 январига қадар давом этади.

Туман ҳокимлигининг Ахборот хизмати