"MURODBEK" ВА "SARVINOZ" НМТТДА ЯНГИ ЙИЛ БАЙРАМИ НИШОНЛАНДИ

Мамлакатимизда тадбиркорлик соҳасига қаратилаётган эътибор ва рағбат туфайли Амударё туманида ҳам ҳар йили кўплаб тадбиркорлик субъектлари ташкил этилиб, янги иш ўринлари яратилмоқда.

“Murodbek” оилавий нодавлат мактабгача таълим ташкилоти ўз фаолиятини бошлаганига ҳали кўп вақт бўлгани йўқ. 2019 йилнинг январь ойида 25 нафар 3 ёшдан 6 ёшгача бўлган болажонларни ўз бағрига олган мазкур нодавлат мактабгача таълим ташкилотида таълим-тарбия ишларини намунали тарзда олиб бориш мақсадида 1 нафар малакали тарбиячи ва ёрдамчи тарбиячи, ошпаз, ошпаз ёрдамчиси ҳамда ҳамшира фаолият олиб боради.

Муассасада болажонларнинг замонавий талаблар асосида таълим-тарбия олишлари, фикрни, нутқни ривожлантирувчи машғулотлар ўтказилиши учун барча шароитлар мавжуд. Болажонлар кун бўйи турли эртак қаҳрамонлари қиёфасидаги ўйинчоқларни ўйнаб, мириқиб ухлайдилар, бадантарбия машқларини бажарадилар, қўшиқ ва шеърлар айтиб, рақсга тушадилар.

Нодавлат мактабгача таълим ташкилоти жойлашган ҳудудда истиқомат қилаётган ота-оналарнинг талаб ва эҳтиёжларини ҳисобга олган муассаса мудираси Наргиза Отамуродова 2021 йилнинг июнь ойида мазкур соҳадаги тадбиркорлик фаолиятини кенгайтириб, 25 ўринли “Sarvinoz” нодавлат мактабгача таълим ташкилоти фаолиятини ҳам йўлга қўйди. 3 ёшдан 6 ёшгача бўлган болажонлар учун мўлжалланган ушбу нодавлат мактабгача таълим ташкилоти очилиш билан яна 2 нафар аёл-қизнинг доимий иш билан бандлиги таъминланди.

Биз ижодий гуруҳимиз билан Янги йил байрами арафасида “Murodbek” ва “Sarvinoz” нодавлат мактабгача таълим ташкилотлари тарбияланувчилари ҳузурида бўлдик. Безатилган ям-яшил арча атрофида Янги йил байрамини нишонлаётган бири-биридан ширин болажонлар қувончининг чеки йўқ. Болажонлар боғча опалари билан биргаликда ўзлари ўрганган шеър ва қўшиқларини ижро этишиб, қувноқ рақслари билан тарбиячи опаларини хурсанд қилдилар. Байрам тадбири давомида ўзларининг эпчил ва чаққонликларини намойиш этиб, қувноқ ўйинлари билан даврага файз киритдилар.

Бири-биридан қувноқ рақслар, куй ва қўшиқлар асосида болажонларга завқ бағишлаган байрам тадбирига Қорбобо ва Қорқиз ташриф буюриб, кичкинтойларга янги йил совғаларини улашди.

Мазкур мактабгача таълим ташкилоти болажонларнинг таълим олишга бўлган ҳуқуқини амалга оширишни таъминлаш, боланинг жисмоний, ақлий ва маънавий камолотини сақлаш ва мустаҳкамлаш, умумтаълим муассасаларида боланинг жамиятга мослашишини ва таълим олишни давом эттиришга тайёрлигини таъминлаш борасида тизимли ишларни амалга оширмоқда.

Шунингдек, ташклот болаларда Ватанга муҳаббат туйғусини, оилага, ўз халқининг миллий, тарихий, маданий қадриятларига ҳурмат билан муносабатда бўлишни, атроф-муҳитга эҳтиёткор муносабатни шакллантириш, боланинг шахсини шакллантириш, унинг ижодий қобилиятларини ривожлантириш, ижтимоий тажриба орттиришини таъминлаш, жамиятга мослашишини ва бошланғич таълимга тайёрлигини таъминлаш учун таълим-тарбия жараёнига замонавий таълим дастурлари ва технологияларни жорий этишга ҳаракат қилиб келмоқда.

Тадбир якунида “Murodbek” ва “Sarvinoz” нодавлат мактабгача таълим ташкилотлари мудираси Наргиза Атамуродова болажонларни кириб келаётган Янги йил байрами билан самимий табриклаб, байрам совғаларини топширди.