Ватан ҳимоячилари куни муносабати билан Болалар спорт мактаби очиқ биринчилиги ўтказилди

Мамлакатимизда ҳар йили 14 январда Ватан ҳимоячилари куни улкан тантана қилинади. Тобора жанговор қобилияти кучайиб, қудрати ошаётган миллий армиямизга халқимизнинг ҳурмат-эҳтироми юқори. Шу боисдан ҳам ушбу байрам муносабати билан юртимизнинг барча ҳудудларида сана муносабати билан турли тадбирлар ўтказиш анъанага айланган.

10 январь куни Амударё туманидаги Болалар спорт мактабида ҳам “Миллий армиямиз – Янги Ўзбекистоннинг мустаҳкам қалқони” шиори остида спортнинг дзюдо тури бўйича 2009-2011 ва 2012 йилларда туғилган ўсмирлар ўртасида спорт мактаби очиқ биринчилиги ўтказилди.

Республика ҳудудида амалдаги Халқаро Дзюдо федерацияси қоидалари асосида болалар ва ўсмирларни жисмоний тарбия ва спортга жалб қилиш натижасида соғлом турмуш тарзини шакллантириш, ёшлар, ўсмирлар ўртасида дзюдо спортини оммалаштириш, дзюдо билан шуғулланаётган курашчиларнинг жисмоний тайёргарлик даражасини аниқлаш ва спорт мактаб терма жамоасини шакллантириш, тренер ва ҳакамларнинг малакасини ошириш мақсадида туман Болалар спорт мактаби, Мудофаа ишлари бўлими, Ёшлар ишлари агентлиги туман бўлими томонидан ташкиллаштирилган очиқ биринчилик мусобақаси байрам тусини олди.

Мусобақа иштирокчиларини спорт мактаби директори Чоршам Тажимуродов, туман Мудофаа ишлари бўлими бошлиғи, подполковник Шерзод Муродовлар Ватан ҳимоячилари куни билан қизғин қутлаб, юқори натижаларга эришишини тиладилар.

Беллашувлар олдидан спорт мактабининг гимнастика гуруҳи тарбияланувчи қизлари ва ўзбек жанг санъати гуруҳи тарбияланувчи қизлари кўргазмали мусиқий чиқишлар қилиб, ёш полвонларга кўтаринки кайфият улашдилар. Жанговор мусиқалар ёш дзюдочиларга ўзгача шиддат, куч бағишлади, ўзларига бўлган ишончини юксалтирди.

Сўнгра мусобақаларга старт берилди. 2009-2011 ва 2012 йилларда туғилган 100 нафарга яқин ёш полвонлар бирин-кетин саккизта вазн тоифасида ғолиблик учун беллашдилар. Полвонлар баҳсини спорт мактаби тренери, мусобақа бош ҳаками Пўлат Кўмеков ва Ҳакимжон Нуримбетовлар одилона баҳолаб бордилар.

Муросасиз кечган баҳсларда бор куч ва салоҳиятини, маҳоратини ғалаба қозонишга сарфлаган Суҳроб Фарҳодов, Хурсанд Ўмирбоев, Дониёр Зарифбоев, Беҳруз Султонов, Самандар Озодов, Асадбек Хошимов, Ботир Худойберганов, Каромаддин Йўлдошевлар ўз вазн тоифасида ғолибликка эришдилар. Суҳроб Аразбоев, Суҳроб Рустамов, Адҳам Юсупов, Ҳидоят Қурбонбоев, Абдужалол Қурбонбоев, Миржалол Бозорбоев, Бунёд Баҳодиров, Ғулом Янгибоевлар эса ўз вазн тоифаларида иккинчи ўринларни эгалладилар.

Мусобақа ғолиблари ва иккинчи, учинчи ўринларни енгиб олган ёш полвонлар туман Мудофаа ишлари бўлими, Ёшлар агентлиги туман бўлими ва спорт мактаби маъмуриятининг қимматбаҳо совғалари билан тақдирланди.

“Миллий армиямиз – Янги Ўзбекистоннинг мустаҳкам қалқони” шиори остида ўтказилган дзюдо бўйича очиқ биринчилик мусобақалари ушбу спорт тури билаш шуғулланаётган ёш полвонларга кўтаринки кайфият бахш этди, уларнинг миллий армиямизга ҳурмат-эҳтиромини юксалтирди.

Ойгул РАЖАБОВА.