Vatan himoyachilari kuni munosabati bilan Bolalar sport maktabi ochiq birinchiligi oʻtkazildi

Mamlakatimizda har yili 14-yanvarda Vatan himoyachilari kuni ulkan tantana qilinadi. Tobora jangovor qobiliyati kuchayib, qudrati oshayotgan milliy armiyamizga xalqimizning hurmat-ehtiromi yuqori. Shu boisdan ham ushbu bayram munosabati bilan yurtimizning barcha hududlarida sana munosabati bilan turli tadbirlar oʻtkazish anʼanaga aylangan.

10-yanvar kuni Amudaryo tumanidagi Bolalar sport maktabida ham “Milliy armiyamiz – Yangi Oʻzbekistonning mustahkam qalqoni” shiori ostida sportning dzyudo turi boʻyicha 2009-2011 va 2012-yillarda tugʻilgan oʻsmirlar oʻrtasida sport maktabi ochiq birinchiligi oʻtkazildi.

Respublika hududida amaldagi Xalqaro Dzyudo federatsiyasi qoidalari asosida bolalar va oʻsmirlarni jismoniy tarbiya va sportga jalb qilish natijasida sogʻlom turmush tarzini shakllantirish, yoshlar, oʻsmirlar oʻrtasida dzyudo sportini ommalashtirish, dzyudo bilan shugʻullanayotgan kurashchilarning jismoniy tayyorgarlik darajasini aniqlash va sport maktab terma jamoasini shakllantirish, trener va hakamlarning malakasini oshirish maqsadida tuman Bolalar sport maktabi, Mudofaa ishlari boʻlimi, Yoshlar ishlari agentligi tuman boʻlimi tomonidan tashkillashtirilgan ochiq birinchilik musobaqasi bayram tusini oldi.

Musobaqa ishtirokchilarini sport maktabi direktori Chorsham Tajimurodov, tuman Mudofaa ishlari boʻlimi boshligʻi, podpolkovnik Sherzod Murodovlar Vatan himoyachilari kuni bilan qizgʻin qutlab, yuqori natijalarga erishishini tiladilar.

Bellashuvlar oldidan sport maktabining gimnastika guruhi tarbiyalanuvchi qizlari va oʻzbek jang sanʼati guruhi tarbiyalanuvchi qizlari koʻrgazmali musiqiy chiqishlar qilib, yosh polvonlarga koʻtarinki kayfiyat ulashdilar. Jangovor musiqalar yosh dzyudochilarga oʻzgacha shiddat, kuch bagʻishladi, oʻzlariga boʻlgan ishonchini yuksaltirdi.

Soʻngra musobaqalarga start berildi. 2009-2011 va 2012-yillarda tugʻilgan 100 nafarga yaqin yosh polvonlar birin-ketin sakkizta vazn toifasida gʻoliblik uchun bellashdilar. Polvonlar bahsini sport maktabi treneri, musobaqa bosh hakami Poʻlat Koʻmekov va Hakimjon Nurimbetovlar odilona baholab bordilar.

Murosasiz kechgan bahslarda bor kuch va salohiyatini, mahoratini gʻalaba qozonishga sarflagan Suhrob Farhodov, Xursand Oʻmirboyev, Doniyor Zarifboyev, Behruz Sultonov, Samandar Ozodov, Asadbek Xoshimov, Botir Xudoyberganov, Karomaddin Yoʻldoshevlar oʻz vazn toifasida gʻoliblikka erishdilar. Suhrob Arazboyev, Suhrob Rustamov, Adham Yusupov, Hidoyat Qurbonboyev, Abdujalol Qurbonboyev, Mirjalol Bozorboyev, Bunyod Bahodirov, Gʻulom Yangiboyevlar esa oʻz vazn toifalarida ikkinchi oʻrinlarni egalladilar.

Musobaqa gʻoliblari va ikkinchi, uchinchi oʻrinlarni yengib olgan yosh polvonlar tuman Mudofaa ishlari boʻlimi, Yoshlar agentligi tuman boʻlimi va sport maktabi maʼmuriyatining qimmatbaho sovgʻalari bilan taqdirlandi.

“Milliy armiyamiz – Yangi Oʻzbekistonning mustahkam qalqoni” shiori ostida oʻtkazilgan dzyudo boʻyicha ochiq birinchilik musobaqalari ushbu sport turi bilash shugʻullanayotgan yosh polvonlarga koʻtarinki kayfiyat baxsh etdi, ularning milliy armiyamizga hurmat-ehtiromini yuksaltirdi.

Oygul RAJABOVA.