Тадбиркорларга солиқ қонунчилигидаги асосий ўзгаришлар тушунтирилмоқда

Солиқлар − ҳар қандай мамлакат иқтисодиёти шаклланишининг асосий манбаси, давлат ва солиқ тўловчилар ўртасидаги молиявий муносабатларни тартибга солувчи муҳим воситаси ҳисобланади.

2023 йил 20 январь куни Амударё тумани Давлат Солиқ инспекцияси биносида тадбиркорлар учун семинар ташкил этилди. Семинарда Давлат Солиқ қўмитаси томонидан Ўзбекистон Республикасининг 2023 йил учун “Давлат бюджети тўғрисида”ги қонуни ҳамда 2023 йил “Ўзбекистон Республикасининг айрим қонун ҳужжатларига ўзгартиришлар ва қўшимчалар киритиш тўғрисида”ги қонунлари кенг тарзда тушунтирилди.

Қайд этиб ўтилганидек, мазкур қонунчилик ҳужжатлари билан Солиқ кодексининг амалдаги 52 моддасига ўзгартиш ва кўшимчалар киритилди ҳамда янги 2 та модда билан тўлдирилди.

Семинарда қўшилган қиймат солиғи, фойда солиғи, айланмадан олинадиган солиқ, аксиз солиғи ва жисмоний шахслардан олинадиган даромад солиғи бўйича ўзгаришлар ҳақида маълумот берилди.

Жумладан, қўшилган қиймат солиғи бўйича 2023 йил 1 январдан бошлаб солиқ тўловчиларнинг тоифаси, солиқни ҳисоблаб чиқариш ва тўлаш тартиби, солиқ ҳисоботини тақдим этиш муддатлари ўзгармайди. Солиқ ставкаси эса 15 фоиздан 12 фоизгача пасайтирилди. Қопланадиган қўшилган қиймат солиғи суммасининг асослилиги юзасидан камерал солиқ текширувини ўтказиш муддатлари 60 кундан 30 кунгача қисқартирилди.

Шунингдек, аксиз солиғи бўйича қонунчиликка киритилаётган ўзгаришлар ҳақида маълумот берилди. Таъкидланганидек, 2023 йил 1 январдан бошлаб алкоголь маҳсулотларини ишлаб чиқаришда аксиз солиғи аксиз тўланадиган маҳсулот таркибидаги этил спиртининг улушидан келиб чиққан ҳолда ҳисоблаб чиқарилади. Бунда ишлаб чиқариладиган алкогол маҳсулотининг ўлчов бирлиги “литр” деб белгиланди. 2023 йил 1 февралдан нефт маҳсулотлари ҳамда ишлаб чиқариладиган алкоголь ва тамаки маҳсулотлари бўйича аксиз солиғи ставкалари 10 фоизга индексация қилинди.

Жисмоний шахслардан олинадиган фойда солиғи ва ижтимоий солиқ бўйича солиқ тўловчиларнинг тоифаси, солиқларнинг ставкалари, солиқларни ҳисоблаб чиқариш ва тўлаш тартиби ўзгармаганлиги айтиб ўтилди.

Семинар давомида тадбиркорларга Ўзбекистон Республикаси Президентининг 2022 йил 30 декабрдаги “Республика ҳудудларини тоифаларга ажратиш ва тадбиркорликни қўллаб-қувватлашнинг табақалаштирилган тизимини жорий этиш чора-тадбирлари тўғрисидаги” фармони ҳам тушунтириб ўтилди.

Фармонга мувофиқ туман ва шаҳарлар 5 та тоифага ажратилди. 4-тоифага киритилган Амударё туманида юридик шахсларнинг мол-мулкига солинадиган солиқ ва ер солиғи бўйича энг кам қийматларга 0,3, якка тартибдаги тадбиркорлар учун даромад солиғи 0,5 гача камайтирувчи коэффицент киритиш ҳуқуқи берилади.

Бундан ташқари, Ўзбекистон Республикаси Президентининг “Қорақалпоғистон Реcпубликасида тадбиркорлик, инновацион технологиялар ва инфратузилмаларни жадал суръатларда ривожлантириш орқали аҳоли фаровонлигини оширишнинг қўшимча чора-тадбирлари тўғрисида”ги фармонига асосан Қорақалпоғистон Республикасининг барча туманларида жойлашган ва шу ҳудудда фаолият юритадиган тадбиркорлик субъектлари учун 2023 йил 1 январдан 2028 йил 1 январга қадар бўлган даврда фойда солиғи, айланмадан олинадиган солиқ, юридик шахсларнинг мол-мулкига солинадиган солиқ ва юридик шахслардан олинадиган ер солиғи бўйича солиқ ставкалари 50 фоизга камайтирилган ҳолда ижтимоий солиқ 1 фоиз миқдоридаги солиқ ставкасида белгиланди. Шунингдек, якка тартибдаги тадбиркорлар томонидан тўланаётган ижтимоий солиқ шаҳарлар ҳудудида фаолият юритаётганлар учун 12 бараварга, туманлар ҳудудида фаолият юритаётганлар учун 6 бараварга камайтирилиб, йилига базавий ҳисоблаш миқдорининг бир баравари миқдорида белгиланди.

Бунда йирик солиқ тўловчилар, доимий муассасалар, бюджет ташкилотлари ва давлат корхоналари, устав жамғармасида давлат улуши 50 фоиз ва ундан кўпроқ миқдорда бўлган юридик шахсларга мазкур бандда белгиланаётган имтиёзлар татбиқ этилмайди.

Семинарда тадбиркорлар ўзларини қизиқтирган саволлар билан мурожаат қилиб, тегиши жавоблар олдилар.

Туман ҳокимлигининг Ахборот хизмати