“BRIGHTON SCHOOL” ЎҚУВ МАРКАЗИ ЁШЛАРНИНГ СЕВИМЛИ МАСКАНИГА АЙЛАНМОҚДА

Бугунги кунда хорижий тилларни ўрганиш ва билишнинг аҳамияти тобора ортиб бормоқда. Шу боис юртимизда хорижий тилларни ўргатишни таълим сиёсатининг устувор йўналиши сифатида ривожлантириш, ушбу йўналишда таълим сифатини тубдан ошириш, соҳага малакали педагогларни жалб этиш ҳамда аҳолининг хорижий тилларни ўрганишга бўлган қизиқишини ошириш борасида тизимли чора-тадбирлар амалга оширилмоқда.

Олмазор маҳалласида жойлашган, янги ташкил этилган “BRIGHTON SCHOOL” ўқув маркази инглиз ва рус тилларини ўргатишга ихтисослашган. Ёшларнинг хорижий тилларни ўрганишлари учун имконият яратиш мақсадида “BRIGHTON SCHOOL” МЧЖга қарашли ўқув марказини ташкил қилган Нурбек Жуманиёзов ушбу марказ биноси қурилиши ва жиҳозланишига 200 млн. сўм банк кредити ва тадбиркорнинг 1 млрд. сўмга яқин ўз маблағи сарфланган.

Ёш ўқитувчи Нурбек Жуманиёзов изланувчан, интилувчан, шунингдек, ўз касбининг фидойиси. У олий тоифага эга ва СЕFR бўйича B2, C1 даражадаги сертификатлар соҳиби. Ўз фаолияти мобайнида ўқувчиларнинг хорижий тилларни ўрганишларига салмоқли ҳисса қўшиб, кўплаб шогирдлар етиштирди. Бугунги кунда ундан таълим олган ёшлар турли нуфузли олий ўқув юртлари талабалари бўлишди.

Нурбек Жуманиёзовнинг ташаббуси билан ташкил этилган, икки қаватли қилиб қурилган марказ биносида қабул қилиш хонаси, ўқув машғулотлари учун 6 та синфхона, 1 та маърузалар хонаси, ўқитувчилар, менежерлар, дам олиш ва кутиш хоналари мавжуд. Кутубхона ва ошхоналарга ҳам хоналар ажратилган. Марказда шуғулланувчилар учун барча қулайликлар яратилган. Замонавий жиҳозлар, компьютер, проектор, интерактив доска, аудио техникалар билан таъминланган. Мазкур ўқув маркази 1,5 мингдан ортиқ абитуриентга инглиз ва рус тилларини ўқитишга мўлжалланган.

Яқинда иш бошлаган мазкур тил ўқитиш маркази ҳар куни уч навбатда фаолият олиб бормоқда. Унда 10 дан ортиқ малакали тил мутахассислари ҳамда фан ўқитувчилари абитуриентларга сабоқ беришади. Марказда 1-синфдан 11-синфгача бўлган ўқувчи-ёшларга тил ўргатилади. Уларни IELTS ва SEFR халқаро ҳамда миллий сертификатларга ўқитиш курслари ҳам йўлга қўйилган. Шунингдек, абитуриентларни олий ўқув юртларига тайёрлаш курслари ҳам йўлга қўйилган. 1-синфдан 7-синфгача бўлган ўқувчилар учун эса BRIGHTON KIDS ўқув машғулотлари ташкил этилган. Ундан ташқари, марказда математика фани ва ментал арифметикадан ҳам ўқув сабоқлари йўлга қўйилган.

Замонавий кўринишда барпо этилган ушбу маскан барча шароитларга эга бўлиши билан бирга қишда иссиқ, ёзда салқин бўлиши таъминланган. Марказда асосан замонавий педагогик, инновацион усулларда машғулотлар ташкил этилиб, ёшларда инглиз тилида гапириш кўникмаси шакллантирилмоқда. Қисқа фурсат мобайнида ёшларнинг севимли масканига айланган ушбу муассасада малакали устозлар томонидан инглиз ва рус тилларида ўз она тилидек сўзлашишларига, грамматикасини ўзлаштиришларига ёрдам берилмоқда.

Хорижий тилларни ўрганиш муҳим аҳамият касб этаётган айни даврда “BRIGHTON SCHOOL” ўқув маркази кенг кўламда ўзининг ижобий натижаларини кўрсатади ва туманимиз ёшларининг чет тилларини ўрганишларига, нуфузли таълим даргоҳлари талабалари бўлишларига катта имконият яратади.

О.Худойберганова.