2023 йил учун белгиланган солиқ ставкалари бўйича очиқ мулоқот бўлиб ўтди
2023 йил 1 февраль куни Амударё туман Давлат солиқ инспекцияси биносида оммавий ахборот воситалари учун очиқ мулоқот ташкил этилди.
Очиқ мулоқотда туман ҳокимлигининг Ахборот хизмати раҳбари Фотима Эшимбетова, туман Давлат солиқ инспекцияси бошлиғи ўринбосари Одилбек Аширбаев, “Тараққиёт кўзгуси” газетасининг масъул котиби, журналист Озода Худайбергенова ҳамда солиқ инспекцияси ходимлари иштирок этишди.
Очиқ мулоқда Ўзбекистон Республикаси Президентининг “Қорақалпоғистон Реcпубликасида тадбиркорлик, инновацион технологиялар ва инфратузилмаларни жадал суръатларда ривожлантириш орқали аҳоли фаровонлигини оширишнинг қўшимча чора-тадбирлари тўғрисида”ги фармонига асосан Қорақалпоғистон Республикасининг барча туманларига берилган солиқ имтиёзлари хусусида кенг турда маълумот бериб ўтилди.
Таъкидланганидек, Қорақалпоғистон Республикаси ҳудудида фаолият юритадиган тадбиркорлик субъектлари учун 2023 йил 1 январдан 2028 йил 1 январга қадар бўлган даврда фойда солиғи, айланмадан олинадиган солиқ, юридик шахсларнинг мол-мулкига солинадиган солиқ ва юридик шахслардан олинадиган ер солиғи бўйича солиқ ставкалари 50 фоизга камайтирилган ҳолда ижтимоий солиқ 1 фоиз миқдоридаги солиқ ставкасида белгиланди.
Шунингдек, якка тартибдаги тадбиркорлар томонидан тўланаётган ижтимоий солиқ шаҳарлар ҳудудида фаолият юритаётганлар учун 12 бараварга, туманлар ҳудудида фаолият юритаётганлар учун 6 бараварга камайтирилиб, йилига базавий ҳисоблаш миқдорининг бир баравари миқдорида белгиланди.
Очиқ мулоқот давомида туман Давлат солиқ инспекцияси ходимлари томонидан Ўзбекистон Республикаси Президентининг 2022 йил 30 декабрдаги “Республика ҳудудларини тоифаларга ажратиш ва тадбиркорликни қўллаб-қувватлашнинг табақалаштирилган тизимини жорий этиш чора-тадбирлари тўғрисидаги” фармони ҳам тушунтириб ўтилди.
Фармонга мувофиқ туман ва шаҳарлар 5 та тоифага ажратилди.
4-тоифага киритилган Амударё туманида юридик шахсларнинг мол-мулкига солинадиган солиқ ва ер солиғи бўйича энг кам қийматларга 0,3, якка тартибдаги тадбиркорлар учун даромад солиғи 0,5 гача камайтирувчи коэффицент киритиш ҳуқуқи берилади.
Шундан сўнг, журналистлар туман Давлат солиқ инспекцияси ходимларига ўзларини қизиқтирган саволлар билан мурожат қилиб тегишлича жавоблар олишди.
Туман ҳокимлигининг Ахборот хизмати.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
