ФҲДЁ БЎЛИМИДА КЎРСАТИЛАЁТГАН ХИЗМАТЛАРДАН АҲОЛИ МАМНУН

ФҲДЁ тизими Адлия бўлимининг Давлат хизматлари маркази тасарруфига ўтганидан бошлаб, барча ҳудудлардаги ФҲДЁ бўлимларида сақланаётган қоғоз ҳужжатлар рақамлаштирилди. Шу жумладан, туманимизда ҳам туғилиш, никоҳ, ажрим, ўлим ва ҳоказо қоғоз ҳужжатлар электрон базага киритилди.

Ўтган йил давомида Амударё туманида 5254 та туғилганлик ҳолати қайд этилиб, шундан ўғил болалар 2652 нафар, қиз болалар 2602 нафарни ташкил қилди. Улардан 11 таси муддатини ўтказиб қайд этилган. Шунингдек,  2 таси суд қарори асосида, 2 таси 16 ёшдан ўтганлардан иборат. Никоҳдан ажралиш ҳолати 183 та бўлиб, шундан 17 таси ўз аризаси асосида ФҲДЁда, 157 таси суд қарорига кўра амалга оширилган. Никоҳни қайд этиш эса 1724 та бўлиб, шундан 252 таси тантанали қайд этилган. Ўлимни қайд этиш ҳолати 1009 та бўлган.

Тизимга киритилган янгиликлардан яна бири сифатида айтиш мумкинки, эндиликда туғилганлик гувоҳномасини шакллантираётганда бир вақтнинг ўзида болани доимий яшаш турар жойига рўйхатга, МТТ навбатига ҳам қўйилмоқда.

Бундан ташқари, бир марталик бериладиган нафақа пулига рўйхатга қўйиш ҳам шу вақтнинг ўзида амалга оширилмоқда. Бу билан фуқароларга жуда катта енгиллик яратилди. Туғилганлик ҳақидаги гувоҳномани олишга келган мурожаатчилардан пул талаб қилинмайди, яъни ушбу давлат хизмати бепул кўрсатилади.

Яна шуни ҳам алоҳида айтиб ўтиш керакки, ФҲДЁ органлари фаолиятида қўлланилаётган экстерриториал тамойилнинг йўлга қўйилгани фуқароларга янада қулай бўлмоқда. Фуқаролар доимий ёки вақтинча рўйхатдан ўтган жойидан ва юридик шахсларнинг почта манзили, яъни жойлашган еридан қатъий назар, исталган ҳудудда ФҲДЁ идораларига мурожаат қилиш имкониятидан фойдаланишмоқда. Зеро, бу аҳолига ФҲДЁ органлари томонидан кўрсатиладиган хизматларнинг сифат жиҳатидан яхшиланиши ва осонлашишида муҳим аҳамият касб этмоқда.

Ж.Абаева, туман ФҲДЁ бўлими инспектори.