FHDYo BOʻLIMIDA KOʻRSATILAYoTGAN XIZMATLARDAN AHOLI MAMNUN

FHDYo tizimi Adliya boʻlimining Davlat xizmatlari markazi tasarrufiga oʻtganidan boshlab, barcha hududlardagi FHDYo boʻlimlarida saqlanayotgan qogʻoz hujjatlar raqamlashtirildi. Shu jumladan, tumanimizda ham tugʻilish, nikoh, ajrim, oʻlim va hokazo qogʻoz hujjatlar elektron bazaga kiritildi.

Oʻtgan yil davomida Amudaryo tumanida 5254 ta tugʻilganlik holati qayd etilib, shundan oʻgʻil bolalar 2652 nafar, qiz bolalar 2602 nafarni tashkil qildi. Ulardan 11 tasi muddatini oʻtkazib qayd etilgan. Shuningdek,  2 tasi sud qarori asosida, 2 tasi 16 yoshdan oʻtganlardan iborat. Nikohdan ajralish holati 183 ta boʻlib, shundan 17 tasi oʻz arizasi asosida FHDYoda, 157 tasi sud qaroriga koʻra amalga oshirilgan. Nikohni qayd etish esa 1724 ta boʻlib, shundan 252 tasi tantanali qayd etilgan. Oʻlimni qayd etish holati 1009 ta boʻlgan.

Tizimga kiritilgan yangiliklardan yana biri sifatida aytish mumkinki, endilikda tugʻilganlik guvohnomasini shakllantirayotganda bir vaqtning oʻzida bolani doimiy yashash turar joyiga roʻyxatga, MTT navbatiga ham qoʻyilmoqda.

Bundan tashqari, bir martalik beriladigan nafaqa puliga roʻyxatga qoʻyish ham shu vaqtning oʻzida amalga oshirilmoqda. Bu bilan fuqarolarga juda katta yengillik yaratildi. Tugʻilganlik haqidagi guvohnomani olishga kelgan murojaatchilardan pul talab qilinmaydi, yaʼni ushbu davlat xizmati bepul koʻrsatiladi.

Yana shuni ham alohida aytib oʻtish kerakki, FHDYo organlari faoliyatida qoʻllanilayotgan eksterritorial tamoyilning yoʻlga qoʻyilgani fuqarolarga yanada qulay boʻlmoqda. Fuqarolar doimiy yoki vaqtincha roʻyxatdan oʻtgan joyidan va yuridik shaxslarning pochta manzili, yaʼni joylashgan yeridan qatʼiy nazar, istalgan hududda FHDYo idoralariga murojaat qilish imkoniyatidan foydalanishmoqda. Zero, bu aholiga FHDYo organlari tomonidan koʻrsatiladigan xizmatlarning sifat jihatidan yaxshilanishi va osonlashishida muhim ahamiyat kasb etmoqda.

J.Abayeva, tuman FHDYo boʻlimi inspektori.