“БУЮК ШОҲ ВА ШОИР” МАВЗУСИДАГИ АДАБИЙ-МУСИҚИЙ ТАДБИР БАРЧАГА МАЪНАВИЙ РУҲ БАҒИШЛАДИ

Буюк шоҳ ва шоир Заҳириддин Муҳаммад Бобур таваллуд куни ҳар йили нафақат Бобур ватани – Ўзбекистонда, балки дунёнинг жуда кўп мамлакатларида шоҳ ва шоир закосига чексиз эҳтиром сифатида кенг нишонланади. Мамлакатимизда эса февраль ойининг илк ҳафтасиданоқ бошланган Заҳириддин Муҳаммад Бобур ҳаёти ва ижодига бағишланган адабий-мусиқий, маънавий-маърифий тадбирлар бутун февраль ойи давомида кўтаринки руҳда давом эттирилади.

Жорий йилнинг 13 февраль санасида шоҳ ва шоир Заҳириддин Муҳаммад Бобур таваллудининг 540 йиллиги муносабати билан Президент таълим муассасалари Агентлиги тизимидаги Амударё Ихтисослаштирилган мактабининг тантаналар залида мазкур мактаб ўқитувчи ва ўқувчилар жамоаси билан Амударё тумани маданият ва туризм бўлими ҳамкорлигида маънавий-маърифий, адабий-мусиқий тадбир бўлиб ўтди. “Буюк шоҳ ва шоир” мавзусида ўтказилган тадбирда Амударё тумани туризм ва маданият бўлими ходимлари бўлим таркибидаги маданият марказларида фаолият олиб борувчи тўгараклар аъзолари, Амударё Ихтисослаштирилган мактабининг адабиётга қизиқувчи ўқувчи-ёшлари иштирок этишди.

Тадбирни мактабнинг маънавий-маърифий ишлар бўйича директор ўринбосари Муяссар Раҳматуллаева очди ва Бобур ижодий фаолияти, дунё халқлари томонидан юксак эътироф этилган, ҳамон севиб ўқилаётган асарлари, бу асарларнинг маънавий-маърифий, тарбиявий аҳамияти ҳақида қисқача маълумот берди.

Бетакрор шоир, йирик давлат ва маданият арбоби, заковатли олим, таржимон, донишманд тарихчи, моҳир саркарда, юксак маънавиятли, оилапарвар, элпарвар инсон З.М.Бобур жуда қисқа, 47 йил умр кўрди. У ўзининг 47 йиллик ҳаёти давомида асрлар оша дунё халқларини ҳайратга солиб келаётган ижоди билан ҳамон миллатлар, элатлар, маънавиятга, шеъриятга, ғазалиётга ошна халқлар томонидан юксак эътирофга, эътибор ва ҳурматга сазовор бўлаолди.

Шоҳ ва шоир, бетакрор адиб ижодининг сарчашмаси ҳисобланган мемуар асар – “Бобурнома” нафақат миллий адабиётимизнинг ноёб дурдоналаридан, балки жаҳон адабиётининг нодир намуналаридан саналади. “Бобурнома” ўша давр ўзбек адабиётининг наср жанрида яратилган йирик асарлардан бири сифатида муҳим ўрин тутади. Мазкур қомусий асар дунёнинг 30 дан ортиқ тилларига таржима қилинган ва асарнинг таржима нусхалари Бобур ва бобурийлар сулоласига оид манбалар сифатида жаҳоннинг 70 дан зиёд музейларида сақланмоқда.

Тадбирда Ихтисослаштирилган мактабнинг ёш адабиёт ихлосмандлари фақатгина Франциянинг Париж шаҳридаги кутубхонасида сақланаётгани Бобур қаламига мансуб “Рисолайи аруз” асарида арузнинг 537 та вазни ҳақида сўз юритилган ва Бобур бобомиз ўз фикрини исботлаш ниятида 70 дан ортиқ ижодкорларнинг асарларидан мисоллар келтирганини, шунингдек шоирнинг юксак салоҳиятли таржимонлигини исботловчи “Рисолайи волидия” китоби ҳақида фахрланиб сўз юритдилар. Шунингдек, ўқувчилар шоир ҳаётининг муайян йиллари билан боғлиқ бўлган ва бизгача етиб келган 400 дан ортиқ лирик асарлари, шундан 119 та ғазал, 231 та рубоий, туюқ, маснавий ва қитъалари хусусида маълумотлар бердилар.

Тадбирнинг адабий-мусиқий қисмида ўқувчи-ёшлар Заҳириддин Муҳаммад Бобур ижодидан намуналар ўқидилар, шоир ғазаллари, рубоий ва туюқларини ёддан айтишиб, уларнинг маънолари, маънавий-маърифий аҳамияти ҳақида ўз фикрларини билдирдилар. Айниқса, мактаб ўқувчилари талқинидаги Бобур ҳаёти ва ижоди ҳақидаги саҳна кўринишлари тадбир иштирокчиларига маънавий руҳ бағишлади.

Шунингдек, тадбирда Амударё тумани туризм ва маданият бўлими санъаткорлари томонидан Бобур ғазаллари асосида тайёрланган. “Мумтоз наволар” концерт дастури ҳам намойиш этилди. Сўз ва наво уйғунлигида ўтказилган “Буюк шоҳ ва шоир” мавзусидаги тадбир барчага маънавий руҳ бағишлади.

Робия ЙЎЛДОШЕВА.