ҚУТУРИШ КАСАЛЛИГИНИНГ ОЛДИНИ ОЛИШ БЎЙИЧА МАХСУС ЎҚУВ-ТАКТИК МАШҚИ ЎТКАЗИЛДИ

Амударёда “Одамлар ва ҳайвонлар ўртасида қутуриш касаллиги тарқалишининг олдини олиш тадбирларида Фавқулодда вазиятларнинг олдини олиш ва уларни бартараф этиш давлат қуйи тизими Амударё тумани бўғинининг ҳамкорликдаги ҳаракатлари” мавзусида махсус-тактик ўқув машқи ўтказилди.

15 февраль куни Куюк кўпир овули ҳудудида бўлиб ўтган ушбу махсус-тактик ўқув машқига жами 130 та шахсий таркиб ва 6 та техника жалб қилинди. Машғулот давомида ҳудудда қутуриш касаллигига доир фавқулодда вазият содир бўлганида Фавқулодда вазиятларнинг олдини олиш ва уларни бартараф этиш давлат қуйи тизими Амударё тумани бўғинининг ҳамкорликдаги ҳаракатлари амалий кўрсатиб берилди.

Махсус-тактик ўқув машқи 4 та босқичда ўтказилди. Биринчи босқичда овулдаги 19-сонли мактаб биноси олдида тегишли хизматларнинг саф кўриги ташкил этилди. Дастлаб туман Фавқулодда вазиятлар бўлими бўлинма бошлиғи, капитан Бекзод Тажибоев тегишли Фавқулодда вазиятларнинг олдини олиш ва уларни бартараф этиш давлат қуйи тизими Амударё тумани бўғини томонидан аҳоли ўртасида қутуриш касаллиги тарқалишининг олдини олиш ва бартараф қилиш бўйича керакли куч ва воситаларнинг шайлигини кўрикдан ўтказди. Ҳар бир хизмат томонидан ўз функционал вазифаларидан келиб чиққан ҳолда амалга оширилиши лозим бўлган вазифалар белгилаб олинди.

Иккинчи босқичда мактаб биносининг мажлислар залида кўргазмали ўқув семинар бўлиб ўтди. Семинарда туман Фавқулодда вазиятлар бўлими бошлиғи ўринбосари Саламат Бердекеев “Аҳоли ўртасида қутуриш касаллиги тарқалиши билан боғлиқ фавқулодда вазиятлар юзага келиши хавфи, уларнинг олдини олиш ва бартараф этишда Фавқулодда вазиятлар давлат қуйи тизимининг аҳамияти” мавзусида маъруза қилди.

Туман Санитария-эпидемиология осойишталик ва жамоат саломатлиги бўлими шифокори Дурбек Бобожонов “Қорақалпоғистон Республикаси ҳудудида қутуриш касаллигининг эпидемиологияси, этиологияси ҳамда бу борада олиб борилаётган профилактик тадбирлар” мавзусида маъруза қилиб, тушунтиришлар берди.

Туман Тиббиёт бирлашмаси Кўп тармоқли марказий поликлиникаси радиолог шифокори Солий Холимбетов “Қутуриш касаллиги патогенези, клиникаси, даволаш ва профилактика усуллари” мавзусида сўз юритди. Туман Ветеринария ва чорвачиликни ривожлантириш бўлимининг Куюк кўпир овулидаги бўлинмаси мудири Санжар Ражабов эса “Қорақалпоғистон Республикаси ҳудудида қутуриш касаллиги бўйича мавжуд эпизоотик вазият ҳамда унинг олдини олиш борасида олиб борилаётган эпизоотияга қарши тадбирлар” мавзуларида маърузалар қилди.

Машғулотнинг учинчи босқичида қутуриш касаллигига гумон қилинган бемор аниқланганда Фавқулодда вазиятлар давлат қуйи тузилмаси хизматлари томонидан бажариладиган ҳаракатлар амалда кўрсатиб берилди. Тиббиёт бирлашмасида юқумли касалликлар шифокори касалликка гумон қилинган фуқарони қабул қилиб, қутуриш касаллигига хос белгиларини аниқлади ва беморга тегишли тиббий муолажалар қилди. Шундан сўнг, хабарлаш тизимига мувофиқ ушбу ҳолат юзасидан ахборот берди.

Санитария-эпидемиология осойишталик ва жамоат саломатлиги бўлими эпидемиолог-шифокори бемор жабрланган ҳудудда эпидемиологик анамнез йиғди. Ветеринария ва чорвачиликни ривожлантириш бўлими ходимлари томонидан беморга жабр келтирган ҳайвон ва ушбу ҳудудда сақланаётган бошқа уй ҳайвонлари ветеринар текширувидан ўтказилди ва 10 кунга назоратга олинди. Шунингдек, беморга жабр келтирган ҳайвонда қутуриш касаллиги ташхисини қўйилганидан сўнг, Ободонлаштириш бошқармасидан қаровсиз ҳайвонларни тутиш бригадаси ходимларининг ҳайвонни ушлаши ва назорат жойига етказиши амалда кўрсатиб берилди.

Сўнгги босқичда ўқув машғулотининг якуни бўйича Куюк кўпир овул фуқаролар йиғини биноси мажлислар залида йиғилиш ўтказилди. Йиғилишда иштирокчиларнинг камчиликлари кўрсатилиб, келгусида бундай камчиликларга йўл қўймаслик кераклиги тушунтирилди ҳамда таклифлар тингланиб, фикр-мулоҳаза алмашилди.

Ҳ.Матякубов, туман ФВБ бошлиғи.