ТАНЛОВ ҒОЛИБЛАРИ АНИҚЛАНДИ

“Маҳалла” хайрия жамоат фонди Амударё туман бўлинмаси томонидан “Обод маҳаллам” номли грант лойиҳасининг иш режаси асосида турли тадбирлар, учрашувлар, танловлар ўтказилиб келинмоқда.

Мазкур лойиҳанинг мақсади – атроф-муҳитни муҳофаза қилиш ва табиий ресурслардан оқилона фойдаланиш соҳасидаги қонун ҳужжатлари бузилишининг олдини олиш, уни аниқлаш ва унга чек қўйишга, табиатни муҳофаза қилиш фаолияти самарадорлигини оширишга ҳисса қўшиш мақсадида қонун ҳужжатларига мувофиқ фуқароларнинг ўзини ўзи бошлариш органлари нодавлат нотижорат ташкилотлари ва фуқаролар билан ҳамкорликда жамоатчилик экологик назоратини амалга ошириш, аҳолининг экологияга оид билимларини кенгайтириш мақсадида учрашувлар, давра суҳбатлар, танловлар ташкил қилиш, ҳудудларни ободонлаштириш ва кўкаламзорлаштириш, атроф-муҳит муҳофазасига ҳисса қўшишдан иборат.

Шунингдек, лойиҳанинг иш режаси бўйича “Яшил макон” умуммиллий дастури доирасида Тўлқин овулида 70 сотих ерда, Бобур, Қумёп, Чойкўл овулларининг ҳар бирида 20 сотих ерда, Қиличбой овулида 10 сотих ерда, Фаровон маҳалласида 5 сотих ерда “Маҳалла боғи”ни яратиш кўзда тутилган.

Ушбу эзгу ишларга ёшлар, мактаб ўқувчиларини ҳам жалб қилиш мақсадида ҳудудлардаги мактаб ўқувчилари ўртасида иншолар танловлари ўтказилиб келинмоқда.

Бундан кўзланган мақсад эса мактаб ўқувчиларининг она табиат, ўсимликлар ва ҳайвонот олами ҳақидаги билимларини ўзига хос тарзда синовдан ўтказиш, уларнинг орзу умидларини, интилишларини оммага таништиришдир.

Аҳоли, айниқса ёшларни табиатга эҳтиёткорона муносабатда бўлиш, табиий ресурсларни тежашга даъват қилиш, уларнинг экологияга оид билимларини ошириш мақсадида “Тараққиёт кўзгуси” газетаси таҳририяти билан ҳамкорликда Қиличбой ҳудудидаги умумтаълим мактаблари ўқувчилари ўртасида “Кўчат экиш – эзгу анъана” мавзусида иншолар танлови ўтказилди. Танловда ҳудуддаги 14 та умумтаълим мактабларидан келган табиатсевар, ижодкор ўқувчилар иштирок этдилар.

Танлов иштирокчилари табиат, ўсимликлар ва уларни авайлаб асраш борасида чуқур билимларга эга эканликларини намойиш қилдилар.

Танлов якунига кўра, 17-сонли мактабнинг 9-синф ўқувчиси Маржона Эгамберганова “Мавзуга оид энг ёрқин фикрлари учун” 1-ўринга, 73-сонли мактабнинг 11-синф ўқувчиси Комила Гулимматова “Энг яхши таҳлилий фикрлари учун” 2-ўринга, 83-сонли мактабнинг 8-синф ўқувчиси Озода Ражаббоева “Энг яхши, самимий фикрлари учун” 3-ўринга муносиб деб топилди.

Шунингдек, 35-сонли мактабнинг 11-синф ўқувчиси Гуласал Холимбетова, 84-сонли мактабнинг 11-синф ўқувчиси Мардона Рахимбоева, 15-сонли мактабнинг 10-синф ўқувчиси Муниса Имомаддиновалар “Шахсий фикрини равон баён қилгани учун” совриндорлар сафидан жой олдилар.

Ғолиб ва совриндорларга “Маҳалла” хайрия жамоат фонди Амударё туман бўлинмаси томонидан совғалар ва Мақтов ёрлиқлари топширилди. Бўлинма бошлиғи Баҳодир Болтабоев ғолиб ва совриндорларни табриклаб ўқиш ва она табиатни асраш каби эзгу ишларида ютуқлар тилади.

Ўрозали Рейимов.