“МИЛЛИЙ ЭСТАРАДА ИЖРОЧИЛИГИ ҲАФТАЛИГИ” ДОИРАСИДА ҚОРАҚАЛПОҒИСТОНДА ХИЗМАТ КЎРСАТГАН АРТИСТ И.СИЙТИМОВ ЁШ ИЖРОЧИЛАР УЧУН МАҲОРАТ ДАРСИ ЎТКАЗДИ

Ўзбек халқининг асрлар давомида шаклланган ва авлоддан-авлодга ноёб мерос сифатида ўтиб келаётган миллий рақс, мусиқа ва анъанавий ижрочилик санъатини замонавий эстрада санъати билан уйғунликда ривожлантириш, янада бойитиш, халқимиз, айниқса, ёш авлод онгига бу бебаҳо бойликларга чуқур ҳурмат ва ҳавас туйғуларини сингдириш, уларда миллий маданиятимиз, қадриятларимизга нисбатан меҳр ва эҳтиром ҳисларини юксалтириш мақсадида Ўзбекистон Республикаси Маданият ва туризм Вазирлиги томонидан жорий йилнинг 21-28 февраль кунлари “Миллий эстрада ижрочилиги ҳафталиги” деб эълон қилинди. Унга кўра мамлакатимизнинг барча ҳудудларидаги маданият ва санъат даргоҳларида мазкур ҳафталик доирасида кўрик-танловлар, миллий эстрада санъати дарғалари билан учрашувлар, ушбу санъат турини миллий рақс, мусиқа ва анъанавий ижрочилик санъати билан уйғунликда ривожлантиришга қаратилган тарғибот тадбирлари, шунингдек, замонавий эстрада санъатининг ёш, умидли вакиллари билан санъатсевар ёшларнинг самимий, дилдан суҳбат тарзидаги учрашувлари ўтказилди.

28 февраль куни Қорақалпоғистон Республикаси Маданият ва туризм вазирлиги тасарруфидаги Амударё туман 9-сонли болалар мусиқа ва санъат мактабининг тантаналар залида “Миллий эстрада ижрочилиги ҳафталиги” доирасида “Устозлар маҳорати – ёшларга ибрат” мавзусида адабий-мусиқий учрашув кечаси ташкил этилди.

Амударё тумани маданият ва туризм бўлими ҳамда 9-сонли болалар мусиқа ва санъат мактаби томонидан ташкиллаштирилган мазкур учрашув тадбирида Қорақалпоғистон Республикасида хизмат кўрсатган артист, таниқли эстрада хонандаси Икром Сийтимов ёш ҳаваскор санъаткорлар ва 9-сонли болалар мусиқа ва санъат мактабининг эстрада хонандалиги йўналиши ўқувчилари учун маҳорат дарсини ўтказди.

Қизғин баҳс-мунозаралар, қизиқарли савол-жавоблар асосида ташкиллаштирилган маҳорат дарси орқали ўқувчи-ёшлар миллий эстрадамиз тарихи, бугунги тараққиёти, миллий эстрада санъатини ривожлантириш ва бойитиш борасида амалга оширилаётган кенг кўламли маданий ислоҳотлар, ёшларнинг ушбу санъат тури билан шуғулланишлари, ўз иқтидорларини намоён этишлари учун яратилган шарт-шароитлар ҳақидаги маълумотларга эга бўлдилар.

Бундан ташқари, Икром Сийтимов эстрада ижрочилигида ёш хонандалар эътибор беришлари керак бўлган энг муҳим жиҳатлар, хусусан, ашула учун матн (шеър) танлаш, маъно ва мазмун, мусиқий уйғунликка ўта жиддий эътибор қаратиш, тақлидчиликдан йироқ бўлиш, ўз овози ва услубига эга бўлиш, ижро маҳоратини тинимсиз ошириш орқали ўзига хос ижро йўлига, санъаткорлар тили билан айтганда, оригиналикка эга бўлиш зарурлиги ҳақида амалий ва назарий тушунчалар берди. Айниқса, сўз ва наво уйғунлигини таъминлашга қаратилган тавсиялар ёш ҳаваскор хонандалар учун жуда қизиқарли ва қимматли фикрларга бойлиги, қолаверса, Икром Сийтимовнинг матн танлаш ва мусиқа яратиш маҳорати учрашув иштирокчиларида катта таассурот қолдирди.

Робия ЙЎЛДОШЕВА.