“Баркамол авлод” болалар мактаби тўгаракларида шуғулланаётган болалар ҳожи онахонлар билан учрашдилар

Амударё тумани “Баркамол авлод” болалар мактаби Ўзбекистон Республикаси Президентининг 2019 йил 30 сентябрдаги “Халқ таълими тизимидаги мактабдан ташқари таълим самарадорлигини тубдан ошириш чора-тадбирлари тўғрисида”ги Қарори асосида ташкил қилиниб, “Баркамол авлод” болалар марказлари негизида ўз фаолиятини давом эттириб келмоқда.

Ўтган давр мобайнида мактабда ташкил этилган тўгараклар аъзолари ўзлари танлаган йўналишлари бўйича алоҳида иқтидор ва қобилиятларини амалда намоён этишиб, туман, Республика, ҳатто Ўзбекистон миқёсидаги турли кўрик-танловларда фаол иштирок этишиб, совриндор бўлдилар.

Бугунги кунда мактабда 7 та йўналиш – “Маданият ва санъат”, “Техника, конструкторлик ва моделлаштириш”, “Жисмоний тарбия ва спорт”, “Ҳунармандчилик ва қўл меҳнати”, “Туризм ва экология” ҳамда “Олий таълим муассасалари ва мактабга тайёрлов” йўналишларида 67 та тўгарак мақжуд бўлиб, ушбу тўгаракларга 1668 нафар ўқувчи қамраб олинган.

Тўгараклар фаолиятини жонлантириш, энг фаол, ўз соҳасининг билимдони бўлган тўгарак раҳбарларининг тажрибаларини оммалаштириш, ютуқларини рағбатлантиришга қаратилган чора-тадбирлар натижасида жамоат ва нодавлат ташкилотлар билан ҳамкорлик тизимли шакллантирилиб, тўгаракларнинг фаол, иқтидорли ўқувчилари сафи ошиб бормоқда.

Мактаб 2022-2023 ўқув йилидан бошлаб турли ташкилотлар билан меморандумлар имзолаб, ўқувчиларнинг бўш вақтларини мазмунли ташкил этиш билан бир қаторда тумандаги ташкилотлар билан ҳам ҳамкорликни йўлга қўймоқда. Тузилган ҳамкорлик меморандумлари доирасида турли маънавий-маърифий тадбирлар, давра суҳбатлари ва семинар-тренинглар ташкил этилиб келинмоқда.

Ана шундай тадбирлардан бири 25 февраль куни ўтказилди. “Кексалар ўгити – ҳаёт мактаби” мавзусидаги ушбу тадбирда Гуласал ва Ўғилжон хожи момолар меҳмон бўлишди. Шу куни туман “Маҳалла ва нуронийларни қўллаб-қувватлаш” бўлими билан имзоланган меморандум доирасида ҳожи онахонлар иштирокида “Баркамол авлод” болалар мактаби ҳудудида “Баркамол авлод боғи” ҳам барпо этилди. Боғга турли хил манзарали ва мевали дарахт кўчатлари ўтқазилди.

Барпо этилган “Баркамол авлод боғи”га кўчат экиш тадбирида Гуласал ва Ўғилжон ҳожи оналар ўқувчи-ёшларга дарахт экиш, парваришлаш, боғ яратишнинг хосиятлари хусусида қимматли масалаҳатлар ва тавсиялар бердилар.

Тадбир давомида Тўқиш тўгараги аъзолари орасида тўқиш бўйича кўрик-танлов бўлиб ўтди. Унда 21 нафар ўқувчи-қизлар иштирок этишди. Кўрик-танловда меҳмон онахонлар - Гуласал ва Ўғилжон ҳожи момолар ҳам қатнашдилар ва тўгарак аъзолари томонидан тўқилган турли хил бири-биридан бежирим кийим-кечаклар, юмшоқ ўйинчоқларни кўриб, ўқувчи-қизларнинг эплилигидан мамнун бўлдилар.

Тадбир давомида нуроний ҳожи онахонлар “Баркамол авлод” болалар мактабининг “Шўх болалар” ҳаваскорлик жамоаси томонидан тайёрланган концерт дастурини томоша қилдилар. Она Ватан, Аёл, бахт ва баҳорни, дўстлик ва тинчликни мадҳ этувчи жўшқин наволар, шўх рақслар барчага манзур бўлди.

Робий ЙЎЛДОШЕВА.