3 млрд. сўмлик банк кредити ҳисобига иш бошлаган агрофирма самарали фаолият юритмоқда

Паррандачилик – даромадли, шу билан бирга анчайин нозик соҳа. Паррандалар нафақат гўшти, тухуми, балки пати учун ҳам боқилади. Бу соҳа ҳозирга келиб чорвачиликдаги асосий йўналишлардан бирига айланиб улгурди. Бунинг сабаби – парранда боқиш катта харажат талаб қилмайди, сақлаш иншоотлари ҳам жуда оддий.

Мутахассислар фикрича, иқтисодий етакчи давлатларда ҳам паррандачиликка катта эътибор қаратилади. Чунки, айнан паррандачилик аҳолини гўшт, умуман, озиқ-овқат маҳсулотларига бўлган талабини қондиришда муҳим аҳамият касб этади, шунингдек, аҳолини иш билан банд бўлишига ҳисса қўшади.

Амударё туманининг Бештом маҳалласи ҳудудида жойлашган “Ўрта қалъа чорвадори” агрофирмасида паррандачиликнинг гўшт йўналиши бўйича 40 мингта жўжа етиштирилмоқда.

Фирма раҳбари Ғуломжон Расуловнинг такидлашича, Ўзбекистонда парранда гўшти ва тухумга бўлган талаб жуда юқори бўлиб, мазкур соҳа билан шуғулланиш учун туманнинг ўзида барча шароитлар мавжуд.

– Отам Эркин Расуловнинг йўл-йўриқлари ва кўрсатмалари билан 2020 йилда 3 млрд. сўм миқдорида имтиёзли кредит олиб, ушбу агрофирмани очдим. Дастлаб, иш фаолиятимизни 10 минг жўжа боқишдан бошлаганмиз. Ўша вақтда қўл остимда 3 нафар ишчи бор эди. Ҳозир эса 12 нафар ишчимиз бор, дейди тадбиркор Ғуломжон Расулов.

Жўжалар Тошкент ва Гулистон шаҳарларидан олиб келинади. Улар 28-30 кун давомида боқилиб, соф вазни 1 кг 800 гр ва 2 кг бўлгандан кейин шу ернинг ўзида сўйилиб, тозаланади ва дўконларга тарқатилади.

Жўжаларни боқиш жараёни 3 даврга бўлинади. Биринчи давр – кунлик тикланиш даври, иккинчи давр – ўсиш даври ва учинчи давр – етилиш даври. Энг охирги 10 кунликда жўжалар сўйиш учун тайёр ҳолатга келади дейди.

Тадбиркор уй шароитида парранда етиштириш ва ундан фойда олиш сирлари, юқори калорияли озуқа таркиби, парранда етиштиришда эътибор бериш керак бўлган асосий жиҳатлар ҳақида овулдошларига ҳам керакли маълумотлар бериб боради.

Унинг айтишича, парранда учун бахор ва ёз фасли ғоят қулай шароит ҳисобланади. Жониворлар ана шу фаслда тез вояга етиб, куз ойларида тухум бера бошлайди. Соғлом парранда етиштириш ва ундан кўплаб тухум олиш учун парваришга фақат соғлом, тирик вазни 35-40 грамм бўлган, ҳаракатчан, оёғида мустаҳкам турувчи, яхши патли ва қанотлари гавдасига мустаҳкам қисилган жўжалар танланади. Бу билан эса гўшти ва тухуми учун боқиладиган паррандаларни бараварига етиштириш имкони бўлади.

Ўйлаймизки меҳнаткаш тадбиркорнинг паррандачилик соҳасидаги фаолияти ушбу соҳага қизиққан инсонлар учун фойдали бўлади.

Туман ҳокимлигининг Ахборот хизмати.